ايدا بالاەۆا بەلسەندىلەردى "حالىق العىسى" مەدالىمەن ماراپاتتادى

ايدا بالاەۆا Birgemiz رەسپۋبليكالىق اكتسياسى اياسىندا COVID-19 تارالۋىمەن كۇرەسكە قاتىسقان ازاماتتاردىڭ ۇلەسىن اتاپ ءوتىپ, ەل ءومىرى ءۇشىن قيىن-قىستاۋ كەزەڭدە ۇزدىكتەر قاتارىنان تابىلعاندارى ءۇشىن العىس ءبىلدىردى.

«سىن ساعاتتاردا قيىندىققا مويىنسۇنباي, وزدەرىڭىزدىڭ ازاماتتىق ۇستانىمدارىڭىزدى كورسەتۋ ارقىلى, ۇلتجاندىلىق تانىتا بىلگەن سىزدەر ەلىمىزدىڭ ماقتانىشىسىزدار. پرەزيدەنت قايىرىمدىلىق جانە ۆولونتەرلىك ۇيىمدارى وكىلدەرىمەن وتكەن ونلاين كەزدەسۋدە ۆولونتەرلىك قوزعالىستىڭ جالپى ۇلتتىق ماسشتابقا يە بولىپ, ازاماتتاردىڭ كومەك قولىن سوزۋعا دەگەن بەلسەندى ۇستانىمى الەۋمەتتىك نورماعا اينالىپ بارا جاتقانىن اتاپ ءوتتى»,-دەدى ا.بالاەۆا.

ءىس-شارا بارىسىندا «حالىق العىسى» مەدالدەرىمەن ماراپاتتالعاندار دا ءسوز سويلەدى. اتاپ ايتساق, جۋرناليست جانە تەلەجۇرگىزۋشى دينارا ءساتجان: «كەيىن ماعان بىرەۋ العىس ايتادى دەپ ويلامادىم. ول ۋاقىتتا تەك قانا ادامدارعا قالاي كومەك بەرسەك دەگەن وي عانا بولدى». قازاقستان مۇسىلماندارى ءدىني باسقارماسىنىڭ ورتالىق اپپاراتىنىڭ باسشىسى عىلىمبەك ماجيەۆ پاندەميانىڭ تارالۋىمەن كۇرەس كەزىندە ءدىن قىزمەتكەرلەرىنىڭ ماڭىزدى ءرولىن اتاپ ءوتىپ, مەملەكەت تاراپىنان كورسەتىلگەن قولداۋ ءۇشىن ريزاشىلىعىن ءبىلدىردى.

ايتا كەتەيىك, قازاقستان رەسپۋبليكاسى پرەزيدەنتىنىڭ 2020 جىلعى 14 قىركۇيەكتەگى جارلىعىمەن ءبىلىم, دەنساۋلىق ساقتاۋ, الەۋمەتتىك قورعاۋ سالالارىندا جەمىستى ەڭبەك ەتىپ جۇرگەن, سونداي-اق كوروناۆيرۋس پاندەمياسىمەن كۇرەستە ەرەكشە كوزگە تۇسكەن 5000 استام ازامات «حالىق العىسى» مەدالىمەن ماراپاتتالدى.

2020 جىلعى 30 قىركۇيەكتە قايىرىمدىلىق جانە ۆولونتەرلىك ۇيىمدارى وكىلدەرىمەن وتكەن ونلاين كەزدەسۋدە پرەزيدەنت رەسپۋبليكا كولەمىندە ماراپاتتاردى ءوز يەلەرىنە تابىستاۋدى تاپسىردى.

كەزەكتى ماراپاتتاۋ ءراسىمى بارىسىندا مەدالدەر د.ابدينگە,  ا.اگيباەۆاعا, ب.بەككوجيناعا, م.بەكتازينوۆكە, ا.ۆلاسەنكوعا, ا.گازاليەۆكە, ا.گايسيناعا, ا.گورباچەۆاعا, گ.ماجيەۆكە, د.ساتجانعا, ر.تيدەگە, ز.شالاباەۆاعا, م.بازارباەۆقا, ە.كوچەتوۆكە, ا.شاعالاقوۆقا تابىس ەتىلدى.