جاپونيانىڭ ساياسي, مادەني جانە قوعامدىق توپتارىنىڭ, سونداي-اق ديپلوماتيالىق كورپۋستىڭ قاتىسۋىمەن قازاق اقىنى جانە اعارتۋشىسى اباي قۇنانباي ۇلىنىڭ جاپون تىلىندە العاشقى رەت شىعارىلعان شىعارمالار كىتابىنىڭ تۇساۋكەسەرى ءوتتى, دەپ حابارلايدى Egemen.ءkz سىم ءباسپاسوز قىزمەتىنە سىلتەمە جاساپ.
جاپونيا پارلامەنتىنىڭ جوعارعى پالاتاسىنىڭ سپيكەرى اكيكو سانتو ءىس-شارانىڭ باستى قوناعى بولدى. ونىڭ ايتۋىنشا, ابايدىڭ فيلوسوفياسى ادامزاتتىڭ قازىرگى كەزەڭدەگى بارلىق قيىنشىلىقتاردى, سونىڭ ىشىندە كوروناۆيرۋستىق پاندەميانى ەڭسەرۋ ءۇشىن قاجەتتى دانالىق پەن باتىلدىققا ۇيرەتەدى.
ەلشى ەرلان باۋداربەك-قوجاتاەۆ بيىل اباي قۇنانباي ۇلىنىڭ 175 جىلدىعى اياسىندا بۇكىل الەم بويىنشا وتكىزىلىپ كەلە جاتقان ءىس-شارالار قازاقستاننىڭ مادەني ديپلوماتياسىنىڭ دامۋىنا ەرەكشە ۇلەس قوسىپ جاتقان ايتتى.
جاپونيا مادەنيەت جونىندەگى اگەنتتىگىنىڭ توراعاسى ريوحەي مياتا ءوز سوزىندە اباي ولەڭدەرىنىڭ جانە "مانەشيۋ" جاپون ولەڭدەرىنىڭ كونە جيناعىنىڭ جالپى مازمۇنى ۇقساس بولعانىنا ءتانتى بولعانىن اتاپ ءوتىپ, ەكى ەل ەجەلدەن جىبەك جولى ارقىلى بايلانىسقانىن ايتتى.
كىتاپتىڭ تۇساۋكەسەرىن كۇن شىعىس ەلىندە زاماناۋي جاپون پوەزياسىنىڭ "قوزعاۋشى كۇشى" دەپ اتالىپ جۇرگەن اتاقتى اقىن جانە سىنشى كيۆاو نومۋرا جاسادى.
كورەرمەندەر اعىمداعى جىلدىڭ شىلدەسىندە قازاقستان مەن جاپونيادا كەڭىنەن تارالعان وسى انگە بەينەكليپ شىعارعان ءانشى رانكانىڭ ابايدىڭ "كوزىمنىڭ قاراسى" ءانىن جاپون تىلىندە جان داۋىسىمەن ورىنداۋىن ىستىق ىقىلاسپەن قارسى الدى.
ءىس-شارا جاپونيادا قابىلدانعان سانيتارلىق-ەپيدەميولوگيالىق تالاپتار مەن الەۋمەتتىك قاشىقتىق نورمالارىن ساقتاي وتىرىپ وتكىزىلدى. جالپى العاندا, اباي قۇنانباي ۇلىنىڭ 175 جىلدىعىن مەرەكەلەۋ اياسىندا توكيوداعى قازاقستان ەلشىلىگى اعىمداعى جىلى بىرقاتار ءىس-شارالار ۇيىمداستىردى.
اتاپ ايتقاندا, اباي شىعارمالارىن مانەرلەپ وقۋ ەستافەتاسىنا جاپونيا پارلامەنتىنىڭ دەپۋتاتى جانە قازاقستانمەن پارلامەنتتىك دوستىق ليگاسىنىڭ توراعاسى تاكەو كاۆامۋرا قاتىسىپ, قر پارلامەنتىنىڭ سەناتورى مۇحتار قۇل-مۇحاممەدتىڭ "چەللەندجىنە" جاۋاپ رەتىندە جاپون تىلىندە "قارا سوزدەن" ءۇزىندى وقىدى. سونىمەن قاتار, "Abai World Challenge" حالىقارالىق ۆيدەومارافونىندا جاپونيا اقىندار قاۋىمداستىعىنىڭ پرەزيدەنتى يامادا تاكااكي ابايدىڭ كوكتەمگە ارنالعان ولەڭدەرىنىڭ جاپونشا اۋدارماسىن ۇسىندى. توكيو ورتالىق كىتاپحاناسىندا اباي قۇنانباي ۇلىنىڭ 175 جىلدىعىنا ارنالعان كىتاپ جانە يلليۋستراتسيالار كورمەسى ءوتتى.
كىتاپ شىعارۋ جوباسىن مادەنيەت جانە سپورت مينيسترلىگىنىڭ تاپسىرىسى بويىنشا قازاقستاننىڭ جاپونياداعى ەلشىلىگىنىڭ قولداۋىمەن "ۇلتتىق اۋدارما بيۋروسى" قوعامدىق قورى جۇزەگە اسىردى.
ماتىندەردىڭ ادەبي اۋدارماسىن توكيو شەت تىلدەر ۋنيۆەرسيتەتىنىڭ پروفەسسورى حيروكي ساكاي, قازاق ادەبيەتىن زەرتتەۋشى ميكيا نيشيمۋرا, جاپون-قازاق سوزدىگىنىڭ اۋدارماشىسى جانە قۇراستىرۋشىسى شيگەنوبۋ ماسۋدجيما ورىندادى. اباي قۇنانباي ۇلىنىڭ جاپون تىلىندەگى كىتابى كۇن شىعىس ەلىنىڭ كىتاپحانالارى مەن وقۋ ورىندارىنا تاراتىلادى.