باتىس قازاقستان وبلىسىندا ءبىلىم سالاسىن ودان ءارى دامىتىپ, حالىققا ساپالى ءبىلىمدى قولجەتىمدى ەتۋ ءۇشىن كەشەندى جۇمىس اتقارىلۋدا. بۇل پرەزيدەنتتىڭ بيىلعى جولداۋىندا ايتىلعان تاپسىرما بولاتىن.
بيىل وبلىستا 6 مەكتەپ جاڭادان سالىنىپ جاتىر. ونىڭ قۇرىلىسىنا 8 ملرد تەڭگە بولىنگەن. بۇعان قوسا ورال قالاسى مەن اۋدانداردا مەملەكەتتىك باعدارلامالار اياسىندا 4,5 ملرد تەڭگەگە 33 ءبىلىم بەرۋ مەكەمەسى كۇردەلى جوندەۋدەن وتۋدە.
مەملەكەتتىك ماڭىزى بار بۇل ىسكە قازىر جەكە ينۆەستورلار دا تارتىلا باستاپتى. ماسەلەن, وسى كۇندەرى «قاز-حولل» كومپانياسى ورال قالاسىنىڭ №31 مەكتەبىنىڭ عيماراتىن, «نۇركاپستروي» مەكەمەسى №52 مەكتەپتىڭ قۇرىلىسىن جۇرگىزۋدە.
وڭىردە مەكتەپكە دەيىنگى ۇيىمداردا 30 مىڭنان استام بالا تاربيەلەنۋدە. 3 جاستان 6 جاسقا دەيىنگى بالالاردى مەكتەپكە دەيىنگى تاربيەمەن قامتۋ 100 پايىز جولعا قويىلعان. ال 1 مەن 6 جاستاعى بالالار 70% قامتاماسىز ەتىلگەن.
پاندەميانىڭ سەبەبىنەن بولعان وزگەرىستەر, قاشىقتان وقۋ ماسەلەسى العا شىققانىمەن, ۇستازدار قاۋىمى جاڭا جاعدايعا تەز بەيىمدەلدى. وقۋشىلاردىڭ بوس ۋاقىتىن ءتيىمدى ۇيىمداستىرۋ ماقساتىندا وتباسىلىق, تۋريستىك, ەكولوگيالىق, تەحنيكالىق باعىتتاعى شارالار قاشىقتان ۇيىمداستىرىلىپ, وعان 50 مىڭنان استام وقۋشى قامتىلدى.
شىڭعىرلاۋ اۋدانىنىڭ مەتوديكالىق كابينەتى رەسپۋبليكالىق «ۇزدىك اۋداندىق, قالالىق مەتوديكالىق كابينەت» سايىسىندا جەڭىمپاز اتاندى.
ال وبلىستىق ءبىلىم بەرۋدى دامىتۋ مەتوديكالىق ورتالىعى رەسپۋبليكالىق سايىستا جۇلدەلى 2-ورىن الىپ, ۇزدىك شىقتى.
وبلىستىڭ 35 وقۋشىسى رەسپۋبليكالىق جانە حالىقارالىق وليمپيادالار مەن عىلىمي سايىستاردىڭ جۇلدەگەرى بولعان.
– وسكەلەڭ ۇرپاعىمىز دا تابىستارىمەن قۋانتىپ كەلەدى. وبلىسىمىزدىڭ 29 وقۋشىسى دارىندى بالالارىنىڭ «ايقانات» بايقاۋىنىڭ جەڭىمپازى اتانىپ, تۇڭعىش پرەزيدەنت قورىنىڭ گرانتىنا يە بولدى. بۇل كورسەتكىش بويىنشا رەسپۋبليكا بويىنشا ءبىرىنشى ورىندامىز. ءبىزدىڭ بالالار بۋرابايدا ورنالاسقان IQanat High School of Burabay مەكتەبىندە وقۋىن جالعاستىرۋدا, – دەدى وبلىستىق ءماسليحات دەپۋتاتتارى الدىندا ەسەپ بەرگەن ءوڭىر باسشىسى عالي ەسقاليەۆ.
وبلىستا ءبىلىم ساپاسىمەن قاتار, ءبىلىم وردالارىنىڭ ينفراقۇرىلىمىن دامىتۋعا ءمان بەرىلۋدە.
مىسالى, 2020 جىلدىڭ باسىندا وبلىستا وقۋشىنىڭ كوپتىگىنەن ءۇش اۋىسىمدا ساباق بەرەتىن 7 مەكتەپ جانە عيماراتى اپاتتىق جاعدايدا تۇرعان 7 مەكتەپ بار ەدى. جىل بويى جاسالعان جۇمىستىڭ ناتيجەسىندە قازىر 5 مەكتەپتە ءۇش اۋىسىمدىلىق جويىلدى. قالعان 2 مەكتەپتىڭ ماسەلەسىن ءوڭىر باسشىلارى كەلەر جىلى شەشۋگە ۋادە بەرىپ وتىر. جاقىندا 450 ورىندىق مەكتەپ پايدالانۋعا بەرىلىپ, وعان ەستەتيكالىق باعىتتاعى گيمنازيا كوشىرىلدى.
سونداي-اق بيىل اپاتتى جاعدايدا تۇرعان ەكى مەكتەپ جاڭا عيماراتقا كوشەدى. «قالعان مەكتەپتەردىڭ ماسەلەسى دە 2021-2022 جىلدارى شەشىلەدى» دەيدى وبلىستىق ءبىلىم باسقارماسىنىڭ باسشىسى ايگۇل مىڭباەۆا.
بيىل رەسپۋبليكالىق فيزيكا-ماتەماتيكا مەكتەبى باتىس قازاقستان وبلىسىندا مۇعالىمدەردىڭ بىلىكتىلىگىن ارتتىرۋ جانە قوسىمشا ءبىلىم بەرۋ ورتالىعىن اشۋدى جوسپارلاپ وتىر. ال 2021 جىلدىڭ جاڭا وقۋ جىلىندا 1-6 سىنىپ وقۋشىلارىنا ارنالعان «Fizmat Academy» مەكتەبى جۇمىسىن باستاماق.
– ەلباسىنىڭ بەس الەۋمەتتىك باستاماسىنا سايكەس ستۋدەنتتەردى جاتاقحانامەن قامتاماسىز ەتۋ ماقساتىندا جەكە ينۆەستورلار ەسەبىنەن 2020 جىلى ماحامبەت وتەمىس ۇلى اتىنداعى باتىس قازاقستان ۋنيۆەرسيتەتىنە 500 ورىندىق جاتاقحانا جانە كوللەدجدەرگە جالپى قۋاتتىلىعى 200 ورىنعا ارنالعان 2 جاتاقحانا قۇرىلىسى ءجۇرىپ جاتىر, – دەيدى عالي ەسقاليەۆ.
بۇدان بولەك, يندۋستريالدىق كوللەدجدىڭ جاتاقحاناسى قازىر كۇردەلى جوندەۋدەن وتۋدە. جوندەۋ اياقتالعان كەزدە ستۋدەنتتەرگە ارنالعان 300 ورىندىق جاتاقحانا پايدالانۋعا بەرىلمەك.
بيىل 1 قىركۇيەكتە باتىس قازاقستان جوعارى مەديتسينالىق كوللەدجىندە 144 ورىندىق جاتاقحانا تاپسىرىلعان بولاتىن.
سوڭعى جىلدارى جاس تۇلەكتەرگە تەگىن ءبىلىم بەرۋ ءۇشىن وبلىستىق بيۋدجەتتەن ارنايى گرانت بەرىلىپ كەلەدى. بيىل 100 گرانت ءبولىندى. بۇل گرانتتىڭ 37-ءسى – وڭىرگە اسا قاجەتتى مەديتسينالىق ماماندىققا بەرىلگەن ەكەن. سونداي-اق 9 ستۋدەنت – پەداگوگيكا, 4 ستۋدەنت تەولوگيا سالاسى بويىنشا «اكىم گرانتىمەن» ءبىلىم الۋدا.
مەملەكەت باسشىسىنىڭ تاپسىرماسى بويىنشا وڭىردەگى بارلىق مەكتەپ پەن بالاباقشانى بەينەباقىلاۋ جۇيەسىمەن قامتۋ جانە سانيتارلىق تالاپتارعا سايكەستەندىرۋ جۇمىسى قولعا الىنعان.
باتىس قازاقستان وبلىسى