"Junior Eurovision 2020" بايقاۋىنىڭ رەسمي سايتىندا قاراقات باشانوۆانىڭ "Forever" انىنە ارنالعان بەينەبايانى جاريالاندى. ۇلتتىق ىرىكتەۋ جەڭىمپازى ءاندى 29 قاراشادا بايقاۋدىڭ گراند-فينالىندا ورىندايتىن بولادى, دەپ حابارلايدى Egemen.kz
جوبانىڭ اۆتورى اتاقتى قازاقستاندىق ستسەناريست جانە رەجيسسەر – مالىك زەنگەر. ول كوپتەگەن زاماناۋي ارتىستەردىڭ بەينەباياندارىن تۇسىرگەن ءوز ءىسىنىڭ مامانى.
ءاننىڭ نەگىزىندە 7 جاسىندا اكەسىنەن ايىرىلعان جانە وعان ءان ارناۋدى ارمانداعان قىزدىڭ وقيعاسى جاتىر. سوندىقتان, رەجيسسەردىڭ باستى نازارى جۇمىستارى وتە قاۋىپتى جانە ءومىرىن قاتەرگە تىگەتىن قىزمەتتەگى ساربازدار, عارىشكەرلەر, ءورت سوندىرۋشىلەرگە تۇسكەن.
"بۇل – ءومىرىن قاۋىپكە تىككەن ماماندىقتا جۇمىس ىستەيتىن اكەلەرگە ارنالعان بالالاردىڭ وداسى. ياعني ءبىر ادام تۋرالى ءان عانا ەمەس, جالپى اكەلەرى قايتىپ ورالماعان بارشا بالالاردىڭ ءانى", دەدى قىسقاشا بەينەباياننىڭ سيۋجەتى تۋرالى مالىك زەنگەر.
بايقاۋدىڭ گراند-فينالىن "حابار" تەلەارناسىنىڭ تىكەلەي ەفيرىندە كورسەتەدى. الەمدە قالىپتاسقان ەپيدەميالىق جاعدايعا بايلانىستى, ەۋروپالىق حابار تاراتۋ وداعى بۇل بايقاۋدى ءار قاتىسۋشى ءوز ەلىندە تەلەكوپىر فورماتىندا وتكىزۋ تۋرالى شەشىم قابىلدادى. كونكۋرستىڭ جەڭىمپازى قازىلار القاسىنىڭ داۋىس بەرۋى جانە ونلاين-داۋىس بەرۋ ارقىلى انىقتالادى.
اتالعان بايقاۋعا قازاقستاننىڭ وسىمەن ءۇشىنشى مارتە قاتىسۋى "حابار" اگەنتتىگىنىڭ 2016 جىلدان بەرى ەۋروپالىق حابار تاراتۋ وداعىنىڭ (ەۆU) قاۋىمداسقان مۇشەسى اتانۋىنىڭ ارقاسىندا مۇمكىن بولىپ وتىر.