"قازاقستان", "ورال", "سارىارقا" جانە "ماڭعىستاۋ" زىمىران-ارتيللەريالىق كورابلدەرىنىڭ قۇرامىندا ەلىمىزدىڭ اسكەري-تەڭىز كۇشتەرى كورابلدەرىنىڭ توبى كاسپي تەڭىزىنىڭ قازاقستاندىق سەكتورىنىڭ اكۆاتورياسى بويىنشا جيىن-جورىق جاسادى, دەپ حابارلايدى Egemen.kz قورعانىس مينيسترلىگىنىڭ ءباسپاسوز قىزمەتىنە سىلتەمە جاساپ.
ەكيپاجدار اسكەري كەمەلەر ماقساتىنا سايكەس تاپسىرمالاردى شەشەتىن ءجۇزۋ ايماعىن زەرتتەدى.
تەڭىزشىلەر كورابلدىك جاۋىنگەرلىك وقۋ-جاتتىعۋلاردى پىسىقتادى. سونىمەن قاتار, اۋە جانە سۋ ءۇستى نىسانالارىنا وق جاۋدىردى.
"مۇنداي جورىقتار جەكە قۇرامعا تاجىريبەلىك جانە تەوريالىق داعدىلاردى يگەرۋگە, كەمەلەر ەكيپاجدارىنىڭ تەڭىز ماشىعى دەڭگەيىن ارتتىرۋعا مۇمكىندىك بەرەدى", دەپ اتاپ ءوتتى جيىن-جورىقتىڭ جەتەكشىسى, اسكەري-تەڭىز كۇشتەرىنىڭ باس قولباسشىسى كونتر-ادميرال ساكەن بەكجانوۆ.
ونىڭ ايتۋىنشا, كەمەلەر ەكيپاجدارى قويىلعان مىندەتتەردى تولىق كولەمدە ورىندادى. ناۋقان الدىندا كەمەلەردى مۇقيات تەكسەرىلىپ دايىندالعان. بۇعان دەيىن قازاقستان اتك كەمەلەرى اعىمداعى جىلدىڭ ماۋسىم ايىندا جيىن-جورىققا شىققان بولاتىن.
جالپى بيىلعى وقۋ جىلىندا, قاڭتار ايىنان باستاپ قىركۇيەك ايىنا دەيىن قازاقستاننىڭ اسكەري-تەڭىز كۇشتەرى تەڭىزگە 27 رەت شىعىپ, 6200-دەن استام تەڭىز ءميلىن ءجۇرىپ ءوتتى.