اتىراۋدا قاۋىپتى ىندەت ءالى دە انىقتالىپ جاتىر. بۇل مەديتسينا سالاسىنا بارىنشا قولداۋ كورسەتۋدىڭ قاجەتتىگىن كورسەتىپ وتىر. وبلىس اكىمى ماحامبەت دوسمۇحامبەتوۆتىڭ مالىمەتىنە سۇيەنسەك, وسى سالاداعى باستى ءتۇيىن – بىلىكتى مامانداردىڭ جەتىسپەۋشىلىگى. وسىعان وراي بيىل وبلىس اكىمىنىڭ مەكتەپ بىتىرگەن تۇلەكتەرگە بەرىلەتىن گرانتى كوبەيتىلدى. ونىڭ ىشىندە دارىگەر ماماندىعىن قالاعان تۇلەكتەرگە 27 گرانت ءبولىندى. ولاردىڭ ءبارى م.وسپانوۆ اتىنداعى باتىس قازاقستان مەملەكەتتىك مەديتسينالىق ۋنيۆەرسيتەتىندە تەگىن ءبىلىم الادى. سونىمەن بىرگە رەزيدەنتۋرادا ءبىلىم جەتىلدىرەتىندەرگە تاعى دا 50 گرانت بەرىلدى.
بىراق مۇنىمەن سالاداعى قوردالانعان ماسەلەنىڭ ءبارى تولىق شەشىلە قويمايدى. سول سەبەپتەن تۇيىندەر بىرتىندەپ تارقاتىلىپ جاتىر. سونىڭ دالەلىندەي, وتكەن اپتادا وبلىستىق مەديتسينالىق جەدەل جاردەم ستانساسى شەتەلدىك 22 كولىكپەن تولىقتى. زاماناۋي اۆتوكولىكتەر ناۋقاسقا العاشقى كومەك كورسەتۋگە ارنالعان قاجەتتى قۇرال-جابدىقتارمەن تولىق قامتاماسىز ەتىلىپتى. جاڭا كولىكتەر ەكى ساناتقا بولىنگەن. «س» ساناتىنا جاتاتىن 13, «ۆ» ساناتىنداعى 9 «حيۋنداي ن350» ماركالى مەديتسينالىق جەدەل جاردەم كولىگى «جول كارتاسى» اياسىندا ساتىپ الىنىپ وتىر.
– كوروناۆيرۋسپەن كۇرەس كەزىندە دارىگەرلەرىمىز قاجىر-قايراتى مەن ەسەلى ەڭبەگىن كورسەتتى. بۇل – ەرلىككە بەرگىسىز ەڭبەك. پاندەميانىڭ ءبىرىنشى كەزەڭىنەن ۇلكەن ساباق الدىق. كەمشىلىكتىڭ ورنىن تولتىرىپ, قاۋىپتى ىندەتتىڭ ەكىنشى كەزەڭىنە دايىندىقتى تياناقتادىق. وبلىستا ءدارى-دارمەك پەن قۇرال-جابدىقتار جەتكىلىكتى. دارىگەرلەرىمىز مول تاجىريبە جينادى. دەنساۋلىق ساقتاۋ مينيسترلىگىنىڭ قولداۋىمەن ءوڭىردىڭ دەنساۋلىق سالاسى 22 مەديتسينالىق جەدەل جاردەم كولىگىمەن تولىعىپ وتىر. ەندى الداعى قاراشادا تاعى دا 18 مەديتسينالىق جەدەل جاردەم كولىگى جەتكىزىلەدى. COVID-19 پاندەمياسى ۇلتتىڭ ساۋلىعىن ساقتاۋدىڭ ماڭىزىن ارتتىرا ءتۇستى. سوندىقتان ءبىزدىڭ باستى ماقساتىمىز – دەنساۋلىق سالاسىن دامىتۋ, – دەيدى وبلىس اكىمى م.دوسمۇحامبەتوۆ.
اكىمنىڭ ايتۋىنشا, دەنساۋلىق ساقتاۋ سالاسىنا قولداۋ كورسەتۋ جالعاسا بەرەدى. كەلەسى جىلى رەسپۋبليكالىق بيۋدجەتتىڭ ەسەبىنەن قوسىمشا 60 سانيتارلىق اۆتوكولىكتى ساتىپ الۋ جوسپارلانىپتى.
ال وبلىستىق دەنساۋلىق ساقتاۋ باسقارماسىندا قاۋىپتى ىندەتتىڭ ىقتيمال ەكىنشى تولقىنىمەن كۇرەسكە بايلانىستى ارنايى شتاب قۇرىلدى. وسىعان وراي باسقارما باسشىسىنىڭ ورىنباسارى اسحان بايدۋاليەۆ قۇرامىنا وڭىردەگى ەمدەۋ مەكەمەلەرىنىڭ باسشىلارى ەنگەن شتابتىڭ العاشقى وتىرىسىن وتكىزىپ, ناقتى جوسپاردى بەكىتتى.
– كۇن سۋىتقان سايىن ۆيرۋستىق جۇقپالار ءورشيدى. سوندىقتان كوروناۆيرۋس ينفەكتسياسى تۇماۋمەن بىرگە كۇشەيۋى مۇمكىن. ونىڭ ۇستىنە الەم ەلدەرىندە كوروناۆيرۋستى جۇقتىرعاندار سانى كوبەيىپ وتىر. قاۋىپتى ىندەت ءورشي قالعان تۇستا جان-جاقتى دايىن بولۋىمىز كەرەك. سول سەبەپتەن دايىندىقتى شيراتا تۇستىك, – دەيدى ا.بايدۋاليەۆ.
اتىراۋ قالاسىنداعى №2 وبلىستىق ينفەكتسيالىق اۋرۋحاناسىنىڭ ءبولىم مەڭگەرۋشىسى جانتورە ورىسباەۆانىڭ مالىمەتىنە سۇيەنسەك, ناۋرىزدان بەرى قاۋىپتى ىندەتتى جۇقتىرعان ناۋقاستاردىڭ 96,4 پايىزى ساۋىعىپ شىقسا, 3-4 پايىزى كوز جۇمعان.
– قايعىلى جاعدايعا ۇرىندىرعان بىرنەشە سەبەپ بار. بىرىنشىدەن, ناۋقاستار قاۋىپتى ىندەتتىڭ بەلگىسى بارىن دارىگەرگە كەشىگىپ حابارلاعان. ەكىنشىدەن, ناۋقاستاردا بۇرىننان بار قوسىمشا سوزىلمالى اۋرۋلارىنىڭ اسقىنۋى سەبەپ بولدى. ءبىزدىڭ اۋرۋحانادان, سونداي-اق كوروناۆيرۋس ينفەكتسياسىمەن 30 بالا, 134 جۇكتى ايەل ەمدەلىپ شىقتى. ءتورت ايەلگە شۇعىل وپەراتسيا جاسالدى. جۇكتى ايەلدەردى قوسىمشا اۋرۋلارىنا بايلانىستى ەندوكرينولوگ, گەماتولوگ, كارديولوگ سەكىلدى ارنايى دارىگەرلەردەن ونلاين كەڭەس الۋ ارقىلى ەمدەدىك, – دەيدى ج.ورىسباەۆا.
اتىراۋ وبلىسى