ەلباسى جارقىن كەلەشەككە دەگەن سەنىم مەن سىندارلى ارەكەتتىڭ ارقاسىندا پاندەميا اكەلگەن ۋاقىتشا قيىندىقتى بىرگە ەڭسەرەتىنىمىزدى ايتتى. بۇل تۋرالى ول "Egemen Qazaqstan" گازەتىندە جاريالانعان "اباي اماناتى" اتتى ماقالاسىندا جازدى, دەپ حابارلايدى Egemen.kz.
" ۇلى ابايدىڭ 175 جىلدىعى بيىل ادامزاتقا قاتەر ءتوندىرىپ, كوروناۆيرۋس ىندەتى جايلاعان ۋاقىتپەن تۇسپا-تۇس كەلىپ قالدى. اتالعان دەرتتىڭ زاردابى جەر جۇزىندەگى مەملەكەتتەردىڭ ەشبىرىن اينالىپ وتكەن جوق. بىراق جارقىن كەلەشەككە دەگەن سەنىم مەن سىندارلى ارەكەتتىڭ ارقاسىندا بۇل ۋاقىتشا قيىندىقتى دا ەڭسەرەمىز", دەي كەلە ەلباسى ابايدىڭ ءسوزى مەن ويى ءبىزدىڭ كۇنبە-كۇنگى تىرلىگىمىزگە, وركەندى ومىرىمىزگە كىرپىش بولىپ قالانىپ, بۇگىنگى وركەنيەت پەن الداعى بولاشاق تالابىنا لايىق ۇمتىلىستارىمىزدان جانە يگى ىستەرىمىزدەن ناقتى كورىنىس تاباتىنىنا سەنىم ءبىلدىردى.