قاراقيا اۋدانىنىڭ قۇلاندى اۋىلىندا تۇرعىن ۇيلەرگە تالشىقتى وپتيكالىق ينتەرنەت جەلىسىن تارتۋ جۇمىستارى قارقىندى. بۇل تۋرالى قۇلاندى اۋىلدىق وكرۋگىنىڭ اكىمى سانات توكەنوۆ ءمالىم ەتتى, دەپ حابارلايدى ماڭعىستاۋ وبلىستىق كوممۋنيكاتسيا ورتالىعى.
قۇلاندى اۋىلىنا تارتىلىپ جاتقان تالشىقتى وپتيكالىق ينتەرنەت جەلىسىن «ترانستەلەكوم» اق جۇرگىزىپ جاتىر. قۇلاندى اۋىلدىق وكرۋگىندە 280 تۇرعىن ءۇي جانە 3 الەۋمەتتىك نىسان بار. 28 قىركۇيەكتەن باستاپ كۇنى بۇگىنگە دەيىن 30 تۇرعىن ۇيگە تولىقتاي تالشىقتى وپتيكالىق ينتەرنەت جەلىسى تارتىلدى. 200 تۇرعىن ءۇي جانە الەۋمەتىك نىساندار ينتەرنەت ورناتۋعا ءوتىنىش بەردى. جوسپارعا سايكەس, ءوتىنىش بەرىلگەن بارلىق تۇرعىن ۇيگە ينتەرنەت جەلىسى تارتىلاتىن بولادى.
«بۇرىن پايدالانىپ كەلگەن ۇيالى تەلەفوننىڭ ءموبيلدى ينتەرنەتىنىڭ جىلدامدىعى تومەن بولىپ, ينتەرنەتكە كىرۋ ماسەلە بولاتىن. اۋىل تۇرعىندارى قازىرگى ورناتىلىپ جاتقان تالشىقتى وپتيكالىق ينتەرنەت جەلىسىنىڭ جىلدامدىعى جوعارى ەكەندىگىن كورىپ ريزاشىلىقتارىن ءبىلدىرىپ, العىستارىن ايتىپ جاتىر. ەندىگى كەزەكتە بالالار ينتەرنەت جەلىسىنىڭ جىلدامدىعىنا كەلىپ تىرەلەتىن ونلاين ساباقتى قيىندىقسىز وقيتىن بولادى», - دەدى اۋىلدىق وكرۋگىنىڭ اكىمى.
ماڭعىستاۋ وبلىسى