2020 جىلعى 6 قازاندا ساعات 10.40-تا ساراتوۆ تاس جولىنىڭ بويىنداعى پياتيمار كوشەسىمەن قيىلىسقان جەردە «كاماز» جانە «ۆاز-2108» ماركىلى اۆتوماشينالارى سوقتىعىسىپ, ءبىر ادام قازا بولدى دەپ حابارلايدى Egemen.kz.
جول اپاتىنان «ۆاز» كولىگىنىڭ جۇرگىزۋشىسى ءتۇرلى دەنە جاراقاتىمەن اۋرۋحاناعا جەتكىزىلگەن, ال سول كولىكتە بولعان جولاۋشى ايەل وقيعا ورنىندا كوز جۇمعان.
«وسى وقيعا بويىنشا قىلمىستىق كودەكستىڭ 345-بابى 3-بولىگى بويىنشا سوتقا دەيىنگى تەرگەپ-تەكسەرۋ باستالدى» دەپ حابارلادى باتىس قازاقستان وبلىستىق پوليتسيا دەپارتامەنتىنىڭ رەسمي وكىلى بولاتبەك بەلگىبەكوۆ.
ايتا كەتەيىك, 2020 جىلعى 9 ايدا وبلىس جولدارىندا 213 جول-كولىك وقيعاسى تىركەلگەن, سونىڭ سالدارىنان 50 ادام كوز جۇمىپ, 251 ادام ءار ءتۇرلى دەنە جاراقاتىن العان. ال 2019 جىلعى 9 ايدا – 226 اپات بولىپ, 78 ادام قازا تاپسا, 294 ادام جاراقات العان ەدى.
بيىل جىل باسىنان بەرى بالالار زارداپ شەككەن 28 جول اپاتى بولىپ, 1 بالا كوز جۇمعان, 31 بالا جاراقات العان. ال 2019 جىلعى 9 ايدا – 5 بالا قايتىپ, 50-ءى جاراقات العان ەدى.
اڭداپ قاراعاندا وتكەن جىلعىمەن سالىستىرعاندا جول اپاتى سانى ازايعانى كورىنەدى. بىراق بۇل ناۋرىز بەن ماۋسىم ارالىعىندا قازاقستاندا ەنگىزىلگەن كارانتيندىك شەكتەۋ ناتيجەسى ەكەندىگى بەلگىلى. شەكتەۋ اياقتالعاننان بەرى وڭىردە جول-كولىك وقيعالارى قايتا كوبەيىپ بارادى. ەكى كۇن بۇرىن عانا وسى ساراتوۆ كۇرە جولىندا بولعان اپاتتان ەكى ادام قازا تاپقان بولاتىن.
پوليتسيا دەپارتامەنتى كولىك جۇرگىزۋشىلەرىن جولدا ءجۇرۋ ەرەجەلەرىنە نەمقۇرايلى قاراماي, ەرەجە ساقتاۋعا, جاياۋ جۇرگىنشىلەردى جولدىڭ بەلگىلەنگەن بولىگىنەن عانا وتۋگە شاقىرىپ جاتىر.
باتىس قازاقستان وبلىسى