الماتى وبلىسىندا جاڭادان سالىنعان مەديتسنا نىسانى پايدالانۋعا بەرىلدى. ەكى ءجۇز ناۋقاستى ءبىر مەزەتتە قابىلداپ, ەم-دوم جاساۋعا مۇمكىندىك بەرەتىن ينفەكتسيالىق اۋرۋحانا وڭىردەگى ساناۋلى مەرزىم ارالىعىندا سالىنعان عيمارات رەتىندە ەرەكشەلەندى. قۇرىلىستى ىرگەتاسىنان باستاپ, تولىقتاي اياقتاۋ ءۇشىن قۇرىلىسشىلارعا 55 كۇن جەتكىلىكتى بولدى, دەپ حابارلايدى Egemen.kz.
"مەملەكەت باسشىسى قاسىم-جومارت توقاەۆتىڭ تاپسىرماسىنا وراي, كوروناۆيرۋس ينفەكتسياسىنىڭ ەكىنشى تولقىنىنا دايىق جوعارى دەڭگەيدە ۇيىمداستارىلۋدا. تاپسىرماعا سايكەس بىرنەشە وبلىستا ءمودۋلدى جۇقپالى اۋرۋلار اۋرۋحاناسىن سالۋ قولعا الىنعان بولاتىن. ءبىزدىڭ وبلىس تاپسىرما بەرىلىسىمەن جۇمىستى باستاپ كەتتى. بۇگىن, مىنە, قىسقا مەرزىمدە اۋرۋحانانى پايدالانۋعا بەرىپ وتىرمىز", دەدى وبىلستىق جۇقپالى اۋرۋلار اۋرۋحاناسىنىڭ اشىلۋىنا كەلگەن وبلىس اكىمى اماندىق باتالوۆ.
اۋماعى 4,18 گەكتار جەردى الىپ جاتقان ينفەكتسيالىق اۋرۋحانا 200 ورىنعا ارنالعان. ونىڭ قۇرىلىسى مەن قاجەتتى قۇرال-جابدىقتار الۋعا 7,5 ملرد تەڭگە قارجى جۇمسالعان ەكەن. قازىر اۋرۋحانا جۇقپالى ىندەت جۇقتىرعان ناۋقاستاردى ەمدەۋگە تولىقتاي دايىن. 20 توسەكتەن تۇراتىن جانساقتاۋ بولىمىنەن بولەك, مرت مەن تسيفرلى رەنتگەن اپپاراتى قويىلعان بولمەلەر دە قاجەتتى كومەك كورسەتۋگە ءازىر. ناۋقاستار ءۇشىن سوڭعى ۇلگىدەگى ەكى گەمودياليز اپپاراتى دا جاڭادان قويىلعان. جانساقتاۋ ءبولىمى تولىقتاي جاساندى تىنىس الدىرۋ اپپاراتتارىمەن جابدىقتالعان.
"نىساندى قىسقا مەرزىمدە ساپالى ەتىپ سالىپ شىققان "BI Group" قۇرىلىس كومپانياسىنا العىس ايتامىن. قۇرىلىسشىلارعا ريزاشىلىعىمدى بىلدىرەمىن. ءوزىم دە قۇرىلىسشى بولعاندىقتان جۇمىستىڭ قانداي دەڭگەيدە جاسالىپ جاتقانىن قابىرعاسى قالانعان كەزدە-اق بايقاعانمىن. مىنە, ءىشىن ارالاپ شىقتىق. ءبارى كەرەمەت, ءتۇپ-ءتۇزۋ, تالاپقا ساي. قاۋىپسىز جانە جىلى بولاتىنىنا سەنىم مول", دەدى ايماق باسشىسى اماندىق باتالوۆ جاڭا نىساندى ارالاۋ بارىسىندا.
جالپى, جاڭادان اشىلعان اۋرۋحانادا جۇمىس ىستەيتىن دارىگەرلەر سانى 400 مامانعا دەيىنگە كوبەيەدى ەكەن. اۋرۋحانىڭ ءوزى 8 بولىمنەن تۇراتىن بولعاندىقتان, دەرتتى انىقتاۋ مەن ەمدەۋگە دەيىنگى ارالىقتاعى قاجەتتى مەديتسينالىق كومەكتىڭ بارلىعى تىزبەك بويىنشا وسى عيمارات ىشىندە جۇزەگە اسۋى ءتيىس. ناۋقاستى قابىلداۋدان باستالعان ءۇردىس دەرتتىڭ دەڭگەيىن انىقتاۋ مەن ەم-دوم تاعايىنداۋعا دەيىن بىرىزدىلىكپەن جۇزەگە اسادى. سونداي-اق, اۋرۋحانادا سوڭعى ۇلگىدەگى قۇرال-جابدىق قويىلعان وپەراتسيا بولمەسى مەن شاعىن ۇلگىدەگى پەرزەنتحانا دا جۇمىسىن باستادى.
ايپاقشى, جاڭادان اشىلعان مەكەمەنىڭ جۇمىسى تولىقتاي تسيفرلى جۇيەمەن باسقارىلادى. ياعني, بۇل اۋرۋحانا الماتى وبلىسىنداعى العاشقى "اقىلدى" اۋرۋحانا بولىپ وتىر. بۇل جاڭالىق ايماقتىڭ مەديتسنا سالاسىن تسيفرلاندىرۋدى جاڭا بەلەسكە كوتەرگەنى انىق. جالپى وبلىس دەنساۋلىق ساقتاۋ سالاسىن تسيفرلاندىرۋ بويىنشا اۋىلدىق وڭىرلەردىڭ ءوزىن 84 پايىزعا جەتكىزگەنبولاتىن. ال وبلىستىق, قالالىق جانە اۋداندىق دەڭگەيدەگى اۋرۋحانالاردىڭ ينتەرنەتكە قوسىلۋى 100 پايىزدىق مەجەدەن كورىنگەن. جالپى, مەديتسينالىق قۇجاتتامانى قاعازسىز جۇرگىزۋگە 53 مەديتسينالىق مەكەمە قوسىلىپ, ەلەكتروندى فورماتقا 224 نىسان كوشىرىلگەن ەكەن. ونىڭ ىشىندە تۇرعىنداردىڭ 98,1 پايىزىندا ەلەكتروندى دەنساۋلىق پاسپورتى بار. ناتيجەسىندە, 1 997 750 ادامنىڭ ناۋقاس تاريحىن تسيفرلى جۇيە ارقىلى زەردەلەۋگە تولىق مۇمكىندىك تۋىپ وتىر.
سونداي-اق, وبلىستاعى دارىگەر كادرلاردىڭ جەتىسپەۋشىلىگىن جويۋدىڭ جولدارى شەشىلۋدە. اسىرەسە, مامانداردىڭ الەۋمەتتىك جاعدايىن جاساۋعا كوڭىل ءبولىنىپ وتىر. مىسالعا, جاڭادان اشىلعان وسى اۋرۋحاناعا مامان تارتۋ ءۇشىن تالدىقورعانداعى كوتتەدجدى قالاشىقتان 47 باسپانا ءبولىنىپتى. ال جاس مامانداردىڭ باسپانا ماسەلەسىن شەشۋ ءۇشىن جاتاقحانا سالىنۋدا. عيمارات قاراشا ايىندا قولدانىسقا بەرىلمەكشى. قازىردىڭ وزىندە ون جاس مامان جۇمىسقا قابىلدانىپ, وسى جاتاقحانانىڭ اشىلۋىن كۇتىپ ءجۇر. جالپى, وبلىستا رەانيماتولوگ, كارديولوگ, ەندوكرينولوگ دارىگەرلەردىڭ جەتىسپەۋشىلىگى بار. بۇل ماسەلەنى مەديتسينالىق ءبىلىم بەرەتىن جوعارعى وقۋ ورىندارىمەن كەلىسىمگە وتىرۋ ارقىلى شەشۋ قولعا الىنعان. وسى ماقساتقا وبلىس اكىمى گرانتى ءبولىنىپ, قاجەتتى مامانداردى دايارلاۋعا تاپسىرىس بەرىلگەن.
الماتى وبلىسى