قازاقستان دۇنيەجۇزىلىك بانكتىڭ جىل سايىنعى زەرتتەۋىندەگى كورسەتكىشتەرىن جاقسارتتى

WGI - دۇنيەجۇزىلىك بانك توبىنىڭ مەملەكەتتىك باسقارۋدىڭ ساپاسى مەن تيىمدىلىگى سالاسىنداعى الەم ەلدەرىنىڭ جەتىستىكتەرىن باعالايتىن كەشەندى زەرتتەۋى.

زەرتتەۋ ادىستەمەسىندە مەملەكەتتىك باسقارۋ ساپاسىنىڭ بارلىق نەگىزگى پارامەترلەرىن كەشەندى تۇردە كورسەتەتىن التى نەگىزگى ينديكاتور قولدانىلادى.

جاڭارتىلعان ەسەپتە قازاقستان 6 كورسەتكىشتەن 5-ءۋى بويىنشا جەتىستىكتەرگە قول جەتكىزدى:

ۇكىمەت جۇمىسىنىڭ تيىمدىلىگى; رەتتەۋشىلىك كليمات ساپاسى; ساياسي تۇراقتىلىق; زاڭنىڭ ۇستەمدىگى; جەمقورلىقپەن كۇرەس.

دۇنيەجۇزىلىك بانك ۇكىمەتتىڭ بيلىك ينستيتۋتتارىن كۇشەيتۋ, ولاردىڭ تيىمدىلىگىن, اشىقتىعىن جانە بولجامدىلىعىن ارتتىرۋ جونىندەگى جۇيەلى جۇمىسىن جوعارى باعالادى.

زەرتتەۋگە سايكەس, ۇكىمەت جۇمىسىنىڭ تيىمدىلىگى مەملەكەتتىك اپپارات جۇمىسىنىڭ ساپاسى سالاسىنداعى كورسەتكىشتەر مەن ساياسي جانە ەكونوميكالىق باعىتتاعى تۇراقتىلىقتى, سونداي-اق حالىقتىڭ نەگىزگى مەملەكەتتىك قىزمەتتەردى (كولىك, ينفراقۇرىلىم) كورسەتۋگە قاناعاتتانۋ دەڭگەيىن ارتتىرۋ ەسەبىنەن جاقساردى.

رەتتەۋشىلىك كليماتتىڭ ساپاسى بويىنشا قازاقستان بىرنەشە جىلدان بەرى قالعان بەس كورسەتكىشپەن سالىستىرعاندا, ەڭ ۇزدىك ناتيجەلەردى كورسەتىپ كەلەدى. 2019 جىلى قازاقستان شەتەلدىك ينۆەستورلار ءۇشىن بيزنەس جۇرگىزۋ تاۋەكەلدەرىن تومەندەتۋ بويىنشا ءتيىمدى شارالاردى قابىلداۋى ەسەبىنەن ءوز پوزيتسياسىن جاقسارتتى.

سونىمەن قاتار بانك بيلىكتىڭ ساباقتاستىعىن قامتاماسىز ەتۋ, سونداي-اق ىشكى جانە سىرتقى كيكىلجىڭدەردىڭ بولماۋى ەسەبىنەن ەلىمىزدەگى ساياسي تۇراقتىلىق كورسەتكىشتەرىنىڭ جاقسارعانىن اتاپ ءوتتى.

زاڭنىڭ ۇستەمدىگى كورسەتكىشى بويىنشا داۋلاردى بالامالى رەتتەۋ جۇيەسىن دامىتۋ, قۇقىقتىق ءتارتىپتى قامتاماسىز ەتۋ جانە ازاماتتىق جانە قىلمىستىق زاڭنامالاردى جاقسارتۋ ەسەبىنەن ىلگەرىلەۋ بايقالدى.

سىبايلاس جەمقورلىققا قارسى كۇرەس ينديكاتورى حالىقتىڭ سىبايلاس جەمقورلىقتى قابىلداۋ سۋبينديكاتورلارى بويىنشا جاقسارۋلاردىڭ بايقالۋى جانە بيزنەس جۇرگىزۋ ءۇشىن سىبايلاس جەمقورلىق تاۋەكەلدەرىنىڭ تومەندەۋى ەسەبىنەن ارتتى.

WGI ەسەبىن وزىق حالىقارالىق قارجى ۇيىمدارى, دامۋ ينستيتۋتتارى جانە رەيتينگ اگەنتتىكتەرى ۇلتتىق ەكونوميكالاردىڭ بولجامدارى مەن نەسيەلىك باعالاۋلارىن قالىپتاستىرۋ ءۇشىن كەڭىنەن قولدانادى.

زەرتتەۋ ناتيجەلەرى بويىنشا Fitch رەيتينگ اگەنتتىگى دە ۇلتتىق ەكونوميكانىڭ كرەديتتىك باعاسىن «BBB» دەڭگەيىندە نىعايتا وتىرىپ, ۇكىمەت جۇمىسىنىڭ تيىمدىلىگىندەگى وڭ ديناميكانى اتاپ ءوتتى.

بيىل تامىز ايىندا پاندەميادان تۋىنداعان الەمدىك ەكونوميكالاردىڭ كرەديتتىك باعالاۋلارىن اۋقىمدى قايتا قاراستىرۋ اياسىندا Fitch قازاقستان ەكونوميكاسىنىڭ "BBB" دەڭگەيىندەگى پاندەمياعا دەيىنگى باعالاۋىن راستادى, بولجام - "تۇراقتى".

كرەديتتىك اگەنتتىك ۇلتتىق ەكونوميكانىڭ كرەديتتىك رەيتينگىن ۇستاپ تۇرۋعا مۇمكىندىك بەرگەن فاكتورلار مەملەكەتتىك بورىشتىڭ تومەن دەڭگەيى, مەملەكەتتىك ينستيتۋتتاردىڭ كۇشەيۋى, ەلەۋلى فيسكالدىق رەزەرۆتەر, ونىڭ ىشىندە شەتەل ۆاليۋتاسىنداعى رەزەرۆتەر بولعانىن اتاپ ءوتتى.

بۇدان باسقا, Fitch سىرتقى نارىقتاردىڭ قۇبىلمالىلىعىنا قاراماستان, ءوندىرۋ جانە وڭدەۋ سەكتورلارىنداعى ەكونوميكانىڭ ءوسۋ الەۋەتىن, سونداي-اق ۇكىمەتتىڭ داعدارىسقا قارسى شارالاردى قالىپتاستىرۋداعى يكەمدىلىگى مەن جەدەلدىگىن جوعارى باعالادى.