بۇگىن كونفەرەنتسيا بارىسىندا ەكولوگيا, اۋىل شارۋاشىلىعى مينيسترلىكتەرىنىڭ, دەپۋتاتتىق كورپۋستىڭ, نۇر-سۇلتان قالاسى اكىمدىگىنىڭ, حالىقارالىق ەپيزووتيالىق بيۋرونىڭ, ءتۇرلى زوولوگيالىق قورعاۋ جانە زاڭ ۇيىمدارىنىڭ وكىلدەرى جانۋارلارعا جاۋاپكەرشىلىكپەن جانە ىزگىلىكتى قاراۋدى رەتتەۋ ماسەلەلەرىن تالقىلادى, دەپ حابارلايدى Egemen.kz ەكولوگيا مينيسترلىگىنىڭ ءباسپاسوز قىزمەتىنە سىلتەمە جاساپ.
"سوڭعى ۋاقىتتا ءبىز ءبارىمىز جانۋارلارعا وتە قاتال قاراۋ فاكتىلەرىنىڭ كۋاسى بولدىق. سوندىقتان, جەكە زاڭ جوباسىن جاساۋ قاجەتتىلىگى ءپىسىپ-جەتىلدى دەپ ەسەپتەيمىز. ءبىز بارلىق جاعىمسىز كورىنىستەرگە ناقتى زاڭنامالىق توسقاۋىل قويۋىمىز كەرەك", دەپ اتاپ ءوتتى ءوزىنىڭ قۇتتىقتاۋ سوزىندە ەكولوگيا مينيسترلىگىنىڭ جاۋاپتى حاتشىسى ءسابيت نۇرلىباي.
مەملەكەت باسشىسى قاسىم-جومارت كەمەل ۇلى توقاەۆ جانۋارلار پروبلەمالارىنا اسا كوڭىل بولۋدە, سول سەبەپتى ۇكىمەتكە ازاماتتىق سەكتورمەن بىرلەسىپ "جانۋارلاردى قورعاۋ تۋرالى" زاڭ جوباسىن ازىرلەۋدى تاپسىردى. بۇگىنگى تاڭدا زاڭ جوباسى ازىرلەنىپ, پرەزيدەنت اكىمشىلىگىنىڭ قاراۋىندا جاتىر. بۇل قازاقستانداعى ادامگەرشىلىك ماسەلەلەرىن كوتەرەتىن العاشقى رەسمي زاڭ جوباسى. وعان قر پارلامەنتى ءماجىلىسىنىڭ دەپۋتاتتارى باستاماشى بولدى.
"زاڭ جوباسىن ىسكە اسىرۋ جانۋارلارعا جاۋاپكەرشىلىكپەن قاراۋدى جانە ولارعا ىزگىلىكتى قاراۋدى قالىپتاستىرۋدى, ءارتۇرلى ساناتتاعى جانۋارلارعا قاراۋ كەزىندە جالپى جانە ارنايى تالاپتاردى بەلگىلەۋدى, قاتىگەز قاراۋدان قورعاۋدى قامتاماسىز ەتۋگە مۇمكىندىك بەرەدى", دەپ اتاپ ءوتتى س.نۇرلىباي.
بۇل رەتتە, جانۋارلارعا قاتىگەزدىكپەن قاراۋ نەمەسە كەزكەلگەن زاڭ نورمالارىن بۇزۋشىلىق ءۇشىن جاۋاپكەرشىلىك "جانۋارلارعا جاۋاپتى قاراۋ ماسەلەلەرى بويىنشا كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى" ىلەسپە زاڭ جوباسىندا كوزدەلەتىن بولادى. اتاپ ايتقاندا, اكىمشىلىك-ءىس جۇرگىزۋ جانە قىلمىستىق كودەكستەردەگى نورمالاردى قاتاڭداتۋ كوزدەلەتىن بولادى.
سونداي-اق, كونفەرەنتسيا بارىسىندا زوولوگيالىق ۇيىمدار مەن قوعامدىق بىرلەستىكتەردىڭ وكىلدەرى ءوز ۇسىنىستارىن ءبىلدىردى.
ۇكىمەتتىڭ قورىتىندىسى ماجىلىسكە ەنگىزىلگەننەن كەيىن پارلامەنت الاڭىندا جۇرتشىلىقپەن تالقىلاۋ باستالادى.