ترانزيتتىك تاسىمالداۋدا تىڭ سەرپىن بايقالادى

تاۋلىك بويى تىنىمسىز جۇمىس ىستەيتىن قۇرعاق پورتتا قىتايدان ەۋروپاعا باعىتتالعان ءتۇرلى تاۋارلار  تيەلىپ, ءتيىستى مەكەن-جايعا جونەلتىلەدى.  نەگىزىنەن نىساندا جۇمىس ىستەيتىن 180 ازاماتتىڭ بارلىعى دەرلىك جەرگىلىكتى تۇرعىندار.  قۇرعاق پورت اۋماعىندا جالپى اۋدانى 102,8 گا جوعارى كلاستى لوگيستيكالىق سەرۆيستى قامتاماسىز ەتۋ ءۇشىن ۇزىندىعى 24 شاقىرىم تەمىرجول مەن 6 كىرمە جول, بىرجولعى ساقتاۋعا ارنالعان 18 مىڭنان استام مامانداندىرىلعان كونتەينەرلىك الاڭ ورنالاسقان. ودان بولەك ەكى بىردەي ۋاقىتشا ساقتاۋ قويماسى جۇمىس ىستەيدى. ونىڭ ءبارى زاماناۋي سوڭعى ۇلگىدەگى اۆتوماتتاندىرىلعان تەحنيكامەن جابدىقتالعان. مۇنداعى قىزۋ جۇمىس ىندەت كەزىندە دە ءبىر ءسات توقتاماپتى. ويتكەنى حالىققا كۇندەلىكتى قاجەتتى تاۋارلاردىڭ نەگىزگى لەگى قىتاي شەكاراسىنداعى ءدال وسى «قورعاس – شىعىس قاقپاسى» ارقىلى جەتكىزىلگەن.

بۇگىنگى تاڭدا قىتايدان قازاقستانعا كەلەتىن يمپورت سانى 20 پايىزدى قۇراسا, قازاقستاننان ەكسپورتتالاتىن تاۋار 20-25 پايىز كولەمىندە. ترانزيتتىك ەلدەر بويىنشا قازاقستاننىڭ تاۋار وتكىزۋ جىلدامدىعى  تاۋلىگىنە 1100 شاقىرىمنان استام. الداعى ۋاقىتتا مۇنى 1500 شاقىرىمعا جەتكىزۋ كوزدەلىپ وتىرعان كورىنەدى.

جاۋاپتى مامانداردىڭ ايتۋىنشا, قىتايدان ەۋروپاعا, رەسەيگە جانە ورتالىق ازياعا باراتىن مارشرۋتتار – ءداستۇرلى تۇردە قازاقستان اۋماعى ارقىلى وتەتىن ەڭ سۇرانىسقا يە باعىتتار ساناتىندا.

"2020 جىلعى قاڭتار – تامىز ايىندا قىتاي – ەۋروپا – قىتاي باعىتى بويىنشا تاسىمالداۋ كولەمى 306,6 مىڭ جفە قۇرادى, بۇل 2019 جىلعى ۇقساس كەزەڭ كولەمدەرىمەن سالىستىرعاندا 62% – عا ءوستى. قىتاي – ورتالىق ازيا-قىتاي باعىتى بويىنشا ءوسىم 29% - دى نەمەسە 149,2 مىڭ جفە قۇرادى. سونداي-اق ەسەپتى كەزەڭدە قىتايدان رەسەيگە 31,2 مىڭ جفە تاسىمالداندى, ءوسىم وتكەن جىلدىڭ ۇقساس كەزەڭىمەن سالىستىرعاندا 47% - عا ارتىپ وتىر. ەگەر التىنكول ستانتسياسى مەن قۇرعاق پورت ارقىلى تاسىمالداناتىن جۇكتەردىڭ نومەنكلاتۋراسى تۋرالى ايتاتىن بولساق — بۇل حالىق تۇتىناتىن تاۋارلار, مەتالدار, حيميكاتتار جانە گاباريتتى ەمەس جۇكتەر, مىسالى, اعىمداعى جىلدىڭ قىركۇيەك ايىندا "KTZE-Khorgos Gateway" قۇرعاق پورتىنىڭ تيەۋ تەرمينالىن ىسكە قوسۋ ارقىلى قىتايدان تۇرىكمەنستانعا 300 گاباريتتى ەمەس تەحنيكا – John Deere اۋىل شارۋاشىلىعى كومبايندارى جىبەرىلدى. ايتا كەتەيىك, John Deere كومپانياسى 2017 جىلدان بەرى اۋىل شارۋاشىلىعى تەحنيكاسىن تاسىمالداۋ ىسىندە  بىزگە سەنىم ءبىلدىرىپ كەلەدى. وسى كەزەڭدە ءبىز 1 474 كومبايننىڭ قاۋىپسىز تاسىمالدانۋىن جۇزەگە اسىردىق", – دەيدى "KTZ Express" اق لوگيستيكا جونىندەگى ۆيتسە-پرەزيدەنتى نۇرلان يگەمباەۆ.

نۇرلان يگەمباەۆتىڭ سوزىنشە, التىنكول ستانتسياسى  ارقىلى بيىل بىرقاتار جاڭا كونتەينەرلىك مارشرۋتتار ىسكە قوسىلعان. بۇل تسزينحۋا (قحر) – باكۋ ء(ازىربايجان), سيان (قحر)- يزميت (تۇركيا) ترانسكاسپي حالىقارالىق كولىك باعىتى بويىنشا, چەنسيان (قحر) – جودينو (بەلورۋسسيا), تسزينان نان (قحر) – قىپشاق (تۇرىكمەنستان), تۇركمەنباشى (تۇرىكمەنستان) – تسينداو (قحر), سونداي – اق التىنكول - ماسكەۋ ءتۇيىنى ستانتسياسىنىڭ تۇراقتى كونتەينەرلىك سەرۆيسى.

«KTZ Express» اق كومپانياسى بۇگىنگى تاڭدا ەڭ قولايلى تاريفتىك شارتتاردى جاساپ, قازاقستان ارقىلى وتەتىن بارلىق باعىتتارداعى جۇكتەردىڭ جىلدامدىعى مەن ساقتالۋىنىڭ تولىق پارامەترلەرىن ۇستانىپ وتىر. ۇزىندىعى 3128 كم قۇرايتىن التىنكولدەن اقتاۋ پورتىنا دەيىنگى ۋچاسكەنى كونتەينەرلەر ءۇش تاۋلىك ىشىندە وتسە, 2019 جىلعى 16 ساۋىردەن باستاپ «قازاقتەڭىزكولىكفلوتى» كومپانياسىنىڭ فيدەرلىك كەمەسى اپتا سايىن باكۋ پورتىنا 210-عا جۋىق كونتەينەر جەتكىزەدى, سول جەردەن جۇكتەر تەمىر جول ارقىلى گرۋزيا مەن تۇركياعا جونەلتىلەدى. مىسالى, قىتايلىق سياننان تۇركيانىڭ ستامبۋلىنا دەيىنگى ساپاردىڭ جالپى ۋاقىتى 16 كۇندى قۇراسا كەرەك.

زامان تالابىنا ساي تاسىمالداۋ  قىزمەتىمەن قاتار  جۇكتەرتى تەكسەرۋ, تيەۋ, ساقتاۋ ماسەلەسى دە جۇيەلى جولعا قويىلعان. ماسەلەن قىتايدان كەلەتىن 56 ۆاگونداعى جۇكتى ءوزىمىزدىڭ  ۆاگوندارعا قايتا تيەۋ 1 ساعاتتىڭ اينالاسىندا اتقارىلادى.  15 مىڭ كونتەينەردى ءبىر ۋاقىتتا قابىلداپ, ءبىر كۇندە 15 پويىزدى قايتا جونەلتۋدىڭ ارقاسىندا بارلىق باعىت بويىنشا ترانزيت كولەمى 40 پايىزعا دەيىن وسكەن. «KTZE-Khorgos Gateway» قۇرعاق پورتىنىڭ ديرەكتورى  يبراگيم ماناباەۆ, اعىمداعى جىلدىڭ 8 ايىنا جوسپارلانعان 23 مىڭ توننا  جۇكتى ەكى ەسە مولشەردە ورىنداپ,  46 مىڭ توننا جۇك جونەلتىلگەنىن ايتادى. 1350 پويىزدىڭ 40 پايىزى ەۋروپاعا, 26 پايىزى وزبەكستانعا جىبەرىلگەن.

التىنكول ستانتسياسى باستىعىنىڭ مىندەتىن اتقارۋشى نۇرجان قۇرمانالى ۇلىنىڭ شەكارالىق جۇك ستانتسياسىنىڭ جۇمىسى تۋرالى بەرگەن مالىمەتىنە سۇيەنسەك, بيىلعى جىلدىڭ 8 ايىندا ستانتسيا ارقىلى بارلىق سانيتارلىق-ەپيدەميولوگيالىق نورمالارعا سايكەس 1551 كونتەينەرلىك پويىز وتكەن. بۇل وتكەن جىلدىڭ وسى كەزەڭىمەن سالىستىرعاندا 110,7%-عا ارتىق. تار تاباندى جول بويىنشا 2600 جۇك پويىزى, كەڭ تاباندى جول بويىنشا 3500-دەن استام پويىز قابىلدانعان.