وسكەمەن پوليتسياسى استانادان كەلىپ ەسىرتكى ساتقان ەرلى-زايىپتىلاردى انىقتادى, دەپ حابارلايدى Egemen.kz Altaynews.kz سايتىنا سىلتەمە جاساپ.
پوليتسيا دەپارتامەنتىنىڭ حابارلاۋىنشا, "جەڭىل جولمەن اقشاعا كەنەلۋدى ويلاعان" وتباسى استانادان وسكەمەنگە قىركۇيەكتە كەلگەن. پسيحوتروپتى زاتتاردى ساۋدالاۋمەن اينالىسقان. ولار كولەمدى پسيحوتروپتى زاتتاردىڭ دوزاسىن شاعىن دوزاعا ءبولىپ, جاسىرىن تۇردە ساتىپ كەلگەن.
ء"تىنتۋ بارىسىندا كۇدىكتىلەردەن 150 گرامم پسيحوتروپتى زاتتار تابىلدى. بۇل 500 رەتتىك دوزاعا تەڭ. قارا نارىقتا ءتورت ميلليون تەڭگەدەن باستاپ ساتىلادى. سونىمەن قاتار دوزالاردى قاپتاۋعا جانە ولشەۋگە ارنالعان قۇرىلعى دا تابىلدى", دەدى پوليتسيا دەپارتامەنتىنىڭ باستىعى ساعات ماديەۆ.
كۇدىكتىلەر قازىرگى ۋاقىتتا ۋاقىتشا قاماۋ يزولياتورىندا. ولاردىڭ ۇستىنەن قىلمىستىق كودەكستىڭ 297-بابى (ەسىرتكى, پسيحوتروپتىق زاتتاردى, سول تەكتەستەردى وتكىزۋ ماقساتىندا زاڭسىز دايىنداۋ, قايتا وڭدەۋ, يەمدەنۋ, ساقتاۋ, تاسىمالداۋ, جونەلتۋ نە وتكىزۋ) بويىنشا سوتقا دەيىنگى تەرگەۋ امالدارى جۇرگىزىلىپ جاتىر. ايىپ راستالعان جاعدايدا 15 جىلعا دەيىن باس بوستاندىعىنان ايىرىلۋى مۇمكىن.