باتىس قازاقستان وبلىسى اۋماعىنداعى ءدارىحانالاردا ءبىر ايعا جەتەتىن ءدارى-دارمەك قورى بار.
ءدارىحانا سورەلەرىندە 5 112 قوراپ ۆيرۋسقا قارسى پرەپاراتتار, 50 274 قوراپ انتيبيوتيكتەر, 16 416 وراما ىستىق تۇسىرەتىن دارىلەر جانە 142 425 دانا بەتپەردە ساتىلىمدا تۇر. ال كوتەرمە ساۋدا قويمالارىندا الداعى ءۇش ايعا جەتەرلىك دارۋمەن بار. سوندىقتان كوروناۆيرۋستىڭ ەكىنشى تولقىنى كەلە مە دەپ ۋايىمداپ وتىرعان تۇرعىنداردىڭ الاڭداۋىنا ەش نەگىز جوق.
بۇعان قوسا «مەدسەرۆيس پليۋس» مەكەمەسى جاقىندا 3 مىڭ دانا ەلەكتروندى تەرمومەتر قۇرالىن الدىرعالى وتىر. ال مەديتسينا سالاسىندا كوپ جىلعى تاجىريبەسى بار «تالاپ» اق قازان ايىنىڭ باسىندا تابلەتكا تۇرىندەگى اتسەتيلساليتسيل قىشقىلىن جەتكىزبەك.
ورال قالاسى مەن اۋداندارداعى ءدارىحانالاردىڭ ءدارى-دارمەكپەن قامتىلۋ جايى www.stopcovid.kz سايتىندا ونلاين رەجىمدە قاداعالانىپ وتىر. سايتتىڭ موبيلدىك قوسىمشاسى ءار ادامعا قولجەتىمدى.
– تۇراقتاندىرۋ قورى بويىنشا قاجەتتى ءدارى-دارمەكتىڭ ءتورت ايعا جەتەتىن قورى جاساقتالادى. قازىر 25 ءتۇرلى دارىگە سۇرانىس ءتۇستى. بۇل قور «اقجايىق» الەۋمەتتىك-كاسىپكەرلىك كورپوراتسياسى ارقىلى جاسالادى. قاجەتتى ءدارى-دارمەكتى ساتىپ الۋ ءۇشىن كەلىسىمشارتتار جاسالعان. قازان ايىنىڭ ورتاسىنا قاراي تولىق جەتكىزىلەدى, – دەيدى باسقارمانىڭ ءباسپاسوز حاتشىسى ساۋلە زاعيدۋللينا.
مىنە, وسىنداي شارالاردىڭ ناتيجەسىندە وڭىردە قازىر ءزارۋ دارمەك جوق. سونىڭ ىشىندە كوروناۆيرۋسقا قارسى كۇرەستە قاجەت بولاتىن ەمدىك قۇرالداردىڭ ەكى ايلىق قورى جاساقتالعان. وتكەن ماۋسىم-شىلدە ايلارىندا وڭىردەگى مەديتسينا مەكەمەلەرى جالپى كولەمى 488 ملن تەڭگەنىڭ مەديتسينالىق پرەپاراتتارى مەن قۇرال-جابدىعىنا تاپسىرىس بەرگەن ەدى. بۇگىندە 338,7 ملن تەڭگەنىڭ تاپسىرىسى ورىندالعان.
قازىرگى تاڭدا وبلىستا وكپەنى جاساندى تىنىستاندىراتىن 138 اپپارات, 476 وتتەگى كونتسەنتراتورى, 10 كومپيۋتەرلىك توموگراف, 47 رەنتگەن اپپاراتى, 675 پۋلسوكسيمەتر, 198 وتتەگى تولىقتىرعىش ورىن, 172 دانا بوبروۆ اپپاراتى بار. بۇعان قوسا جەرگىلىكتى بيۋدجەت پەن ترانسفەرتتەر ەسەبىنەن تاعى دا 15 دانا تىنىستاندىرۋ اپپاراتى, 7 رەنتگەن جابدىعى ساتىپ الىنباق. ءۇش وتتەگى ستانساسىن الۋعا 113 ملن تەڭگە قاراستىرىلعان.
– بۇعان قوسا يندۋستريا جانە ينفراقۇرىلىمدىق دامۋ مينيسترلىگى ارقىلى وكپەنى جاساندى تىنىستاندىراتىن اپپاراتتىڭ تاعى 35 داناسى, اۋداندىق اۋرۋحانالار ءۇشىن 9 دانا جىلجىمالى مەديتسينالىق كەشەن كەلمەك. ورال قالاسىندا قۇنى 7,2 ملرد تەڭگەلىك مودۋلدىك اۋرۋحانا قۇرىلىسى باستالدى. قازىردىڭ وزىندە 4,2 ملرد تەڭگە بولىنگەن, – دەيدى باسقارمانىڭ ءباسپاسوز حاتشىسى.
وبلىستا وسى كۇندەرى 63 جەدەل جاردەم كولىگى تاۋلىگىنە 700 مارتە تاپسىرىس قابىلداپ, ناۋقاستارعا كومەك كورسەتۋدە. «برك-ليزينگ» كومپانياسى ارقىلى قىركۇيەك-قازان ايلارىندا وڭىرگە تاعى 37 رەانوموبيل اكەلىنەدى. قازىر ەمحانالار جانىنان 123 ءموبيلدى بريگادا قۇرىلعان, ولار COVID-19 دەرتىنىڭ بەلگىلەرى بار ناۋقاستارعا, بۇرىن وسى ىندەتپەن اۋىرعان ادامدارعا جانە سوزىلمالى دەرتى بار جاندارعا, جۇكتى ايەلدەر مەن بالالارعا جەدەل كومەك كورسەتۋگە ءازىر وتىر. بۇل توپتاردا 144 دارىگەر مەن مەدبيكە بار, قوسىمشا 38 مامان كەرەك. مەديتسينا مەكەمەلەرى قورعانىش جابدىقتارىمەن قامتىلعان.
كادر تاپشىلىعى دەمەكشى, بيىل ەلىمىزدىڭ دەنساۋلىق ساقتاۋ مينيسترلىگى 118 دارىگەردى وڭىرگە جولداعان بولاتىن. قازىر 106 جاس مامان كەلىپ, قىزمەتكە ورنالاسىپ ۇلگەردى. ونىڭ 70-ءى – اقتوبەدەن, 19-ى – الماتىدان, 10-ى نۇر-سۇلتان قالاسىنان كەلگەن. س.ج.اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنەن كەلگەن 7 مامان باتىس قازاقستان وبلىسى اكىمىنىڭ گرانتىمەن وقىعان ەدى. ولار قازىر ورال قالاسىنداعى ستاتسيونارلارعا قىزمەتكە ورنالاستى.
قىركۇيەك ايىنىڭ 28-ىندەگى مالىمەت بويىنشا دەنساۋلىق ساقتاۋ سالاسىنىڭ 326 قىزمەتكەرى الەۋمەتتىك تولەمدەر مەن قوسىمشا اقى الۋ ءۇشىن ءوتىنىش بىلدىرگەن ەكەن, سونىڭ 229-ىنىڭ قۇجاتى قابىلدانعان. الەۋمەتتىك ساقتاندىرۋ جونىندەگى مەملەكەتتىك قوردىڭ مالىمەتىنە قاراعاندا, 210 قىزمەتكەرگە تولەم بەرىلەتىن بولىپتى. 130 ادام ونى الىپ ۇلگەرگەن.
جالپى, ناۋرىز بەن تامىز ايلارى ارالىعىندا وسىنداي تولەمدەر ءۇشىن وبلىستا 2 630,6 ملن تەڭگە جۇمسالعان. ول قارجىنى العانداردىڭ ىشىندە 1 280 دارىگەر, 4 918 ورتا, 1 691 كىشى مەديتسينالىق قىزمەتكەرلەر, 894 جەدەل جاردەم جۇرگىزۋشىسى بار.
وسى كەزگە دەيىن وبلىستا covid-19 دەرتىنە شالدىققان 6 855 ادام تىركەلسە, سونىڭ 6 746-سى جازىلىپ شىققان. وكىنىشكە قاراي, 106 ادام كوروناۆيرۋستان, 206 ناۋقاس پنەۆمونيادان قايتىس بولدى.
سوڭعى مالىمەتتەرگە قاراعاندا, قازىر وبلىستا 61 ادام پنەۆمونيامەن تىركەلگەن, ونىڭ 28-ءى – ستاتسيوناردا, ال 33 ناۋقاس امبۋلاتوريالىق جاعدايدا ەمدەلۋدە.
باتىس قازاقستان وبلىسى