عالىمدار كوروناۆيرۋس ينفەكتسياسى تارالماي جاتىپ-اق ىندەت وشاعىنا اينالۋى مۇمكىن جەردى Google ارقىلى انىقتاۋعا بولادى دەگەن پىكىردە. بۇل تۋرالى زەرتتەۋ ناتيجەلەرى Massachusets General Hospital-دىڭ رەسمي سايتىندا جاريالاندى.
بۇگىنگى تاڭدا ادامدار ءوزىن الاڭداتقان كەز كەلگەن ساۋالدىڭ جاۋابىن ينتەرنەتتەن ىزدەۋدى ادەتكە اينالدىرعانى بەلگىلى. ينفەكتسيانىڭ وشاعىن الدىن الا انىقتاۋعا دا سول ادەتى كومەكتەسەدى. ايتالىق, Google-ءدىڭ ىزدەۋ جۇيەسىندە ەڭ كوپ سۇراۋ سالىنعان سوزدەردى زەرتتەي كەلە عالىمدار ء«دام سەزۋ قابىلەتىنىڭ تومەندەۋى», «تابەتتىڭ ازايۋى», ء«ىش اۋىرۋ» دەگەن سىندى تىركەستەردىڭ كوروناۆيرۋسپەن بايلانىستى ەكەندىگىن انىقتاعان.
اقش-تىڭ نيۋ-يورك, نيۋ-دجەرسي, كاليفورنيا, ماسساچۋسەتس جانە يللينويس شتاتتارىندا Covid-19 ۆيرۋسى قاتتى تارالعانى بەلگىلى. وسى 5 شاتتا پاندەميا ەتەك الاردان 2-3 اپتا بۇرىن جوعارىدا اتالعان تىركەستەردى ينتەرنەتتەن ىزدەۋشىلەردىڭ قاتارى كوپ بولىپتى.
– ءبىز جيناعان جانە سارالاعان دەرەكتەرگە سۇيەنسەك, ادامداردىڭ ءوز اعزاسىنا قاتىستى ساۋالدارى Covid-19 ۆيرۋسىنىڭ تارالۋ قاۋپىنەن حابار بەرەدى. ياعني Google trends پاندەمياعا قاتىستى بولجام جاسايتىن باعالى قۇرالدىڭ ءرولىن اتقارا الادى, – دەلىنگەن سايتتا.
جالپى, Google پاندەمياعا قارسى الەمدىك كۇرەسكە ماڭىزدى ۇلەس قوسىپ جاتقانىن ايتا كەتۋ كەرەك. ايتالىق, ول Apple-مەن بىرلەسىپ كوروناۆيرۋس جۇقتىرعان ادامداردى تەز تابۋعا, ولاردىڭ كىممەن بايلانىسقا تۇسكەنىن انىقتاۋعا كومەكتەسەتىن تەحنولوگيا جاساپ شىعاردى.
كوروناۆيرۋس تۋرالى جالعان اقپارات تاراتۋشىلاردىڭ جولىن كەسۋگە دە Google كورپوراتسياسى بەلسەنە اتسالىستى. ىندەتتى ەمدەۋگە كومەكتەسەدى دەگەن جالعان پرەپاراتتاردىڭ جارناماسىنا دا تىيىم سالدى.