11 ساۋىردە ۆاشينگتوندا وتكەن كەزدەسۋدىڭ بارىسىندا قازاقستان پرەزيدەنتى ن.نازارباەۆ پەن اقش پرەزيدەنتى ب.وباما قازاقستان مەن اقش اراسىنداعى ستراتەگيالىق ارىپتەستىكتى نىعايتۋ ماسەلەلەرىن تالقىلادى ءارى يادرولىق قاۋىپسىزدىكتى جانە تاراتپاۋ ۇدەرىسىن, ورتالىق ازياداعى وڭىرلىك تۇراقتىلىقتى كۇشەيتۋ, سونداي-اق ەكونوميكالىق وركەندەۋ مەن جالپىعا ورتاق قۇندىلىقتاردىڭ يگىلىگى جولىنداعى وزدەرىنىڭ ەكىجاقتى ىنتىماقتاستىعىن بەلسەندى ەتە تۇسۋگە ۇمتىلىسىن قۋاتتادى.
يادرولىق قاۋىپسىزدىك پەن تاراتپاۋ: مەملەكەتتەر باسشىلارى قازاقستان رەسپۋبليكاسى مەن امەريكا قۇراما شتاتتارىنىڭ اراسىنداعى 15 جىلدىق تىعىز ىنتىماقتاستىقتىڭ ماڭىزىن جانە قازاقستان مەن بۇكىل الەمدەگى يادرولىق قاتەردى ازايتۋ ىسىندەگى تابىستى اتاپ ءوتتى. ولار يادرولىق قارۋدان ادا الەمگە قاتىستى وزدەرىنىڭ كوزقاراستارىن بايان ەتتى. اقش پرەزيدەنت ن.نازارباەۆتىڭ ەلدى باسقارۋىن, سونداي-اق قازاقستاننىڭ يادرولىق قارۋسىزدانۋ جانە تاراتپاۋ ىسىنە قوسقان ۇلەسىن جوعارى باعالايدى. ەكى ەلدىڭ پرەزيدەنتتەرى قاتەردى بىرلەسە ازايتۋ جونىندەگى باعدارلامانىڭ تابىستى جۇزەگە اسىرىلۋىن جانە جالعاسىپ جاتقان ىنتىماقتاستىقتى, سونىڭ ىشىندە اقتاۋداعى BN-350 يادرولىق رەاكتورىن قولدانىستان شىعارۋ, الماتىداعى ورتالىق انىقتامالىق زەرتحانا قۇرىلىسىن قاناعاتتانۋ سەزىمىمەن اتاپ ءوتتى. ىنتىماقتاستىق سونىمەن بىرگە الاتاۋداعى زەرتتەۋ رەاكتورىن رەكونسترۋكتسيالاۋ جانە سوندا ساقتاۋلى جوعارى بايىتىلعان ۋراندى جويۋ ماسەلەلەرىندە دە جۇزەگە اسىرىلىپ جاتىر, مۇنىڭ ءوزى يادرولىق قاۋىپسىزدىك جونىندەگى ءسامميتتىڭ مازمۇنداماسىندا كوزدەلگەن. پرەزيدەنت ن.نازارباەۆقا ونىڭ قازاقستان تەرريتورياسىندا يادرولىق وتىننىڭ حالىقارالىق بانكىن قۇرۋ جونىندەگى ۇسىنىسىنا العىس ايتا كەلىپ, پرەزيدەنت وباما قازاقستاننىڭ ماگاتە باسقارۋشىلارىنىڭ كەڭەسى قۇرامىنا كىرۋ نيەتىنە قولداۋ بىلدىرەتىنىن مالىمدەدى. قازاقستان پرەزيدەنت وبامانىڭ پراگادا اقساۋلى يادرولىق ماتەريالداردىڭ سەنىمدى قورعالۋىن قامتاماسىز ەتۋ جونىندەگى ءىس-ارەكەتتەردى جەدەلدەتۋگە شاقىرعان سوزىنە قولداۋ رەتىندە بۇرىنعى يادرولىق پوليگونداعى جۇمىستاردى تەزدەتۋگە ۇمتىلاتىن بولادى. اۋعانستان: پرەزيدەنتتەر اۋعانستانداعى جاعدايعا بايلانىستى تۋىنداعان جالپى قاتەرلەر مەن قىر كورسەتۋلەردىڭ اۋقىمىن ەكى جاقتىڭ دا تۇسىنەتىنىن اتاپ ءوتتى. پرەزيدەنت وباما قازاقستانعا اۋعانستان حالقىنا گۋمانيتارلىق, ەكونوميكالىق جانە ءبىلىم بەرۋ تۇرعىسىنان كومەك كورسەتۋ, سونىڭ ىشىندە قازاقستان رەسپۋبليكاسى ۇكىمەتىنىڭ اۋعان ستۋدەنتتەرىن قازاقستاننىڭ جوعارى وقۋ ورىندارىندا وقىتۋدىڭ جاڭا باعدارلاماسىن جۇزەگە اسىرۋعا 50 ميلليون دوللار ءبولۋ جونىندەگى شەشىمىنە ريزالىعىن ءبىلدىردى. پرەزيدەنتتەر قازاقستاننىڭ سولتۇستىك توراپتاعى اتقارار ءرولىن ارتتىرۋدىڭ جولدارىن تالقىلادى جانە اقش-قا قازاقستان تەرريتورياسى ارقىلى جۇك جەتكىزۋدى جۇزەگە اسىرۋعا مۇمكىندىك بەرەتىن ەكى جاقتى جاڭا كەلىسىمدى قابىل الدى. ينۆەستيتسيالار مەن ساۋدا: قازاقستاننىڭ الەۋمەتتىك-ەكونوميكالىق دامۋداعى جەتىستىكتەرىن تانىپ-بىلە وتىرىپ, اقش الداعى كەزدە دە ەكونوميكالىق دامۋ باعدارلاماسى مەن قازاقستان مەن اقش اراسىنداعى مەملەكەتتىك-جەكەشە ەكونوميكالىق ارىپتەستىكتى دامىتۋ باستاماسىنىڭ اياسىندا قازاقستاننىڭ كوپ سالالى ەكونوميكاسىنىڭ وركەندەۋىنە قولداۋ كورسەتە بەرەتىن بولادى. مەملەكەت باسشىلارى ەكىجاقتى ەكونوميكالىق ءوزارا ىقپالداستىقتىڭ اعىمداعى جاي-كۇيىن وڭ باعالادى. ولار قازاقستاننىڭ بسۇ-عا كىرۋىن اياقتاۋ جونىندەگى كۇش-جىگەردى ەسەلەۋگە جانە ورتالىق ازياداعى ساۋدا جانە ينۆەستيتسيالار جونىندەگى ارالىق كەلىسىم جۇمىسىنا قولداۋ بىلدىرۋگە كەلىستى. پرەزيدەنتتەر ەكى مەملەكەت اراسىنداعى ۇزاق مەرزىمدى ەنەرگەتيكالىق ارىپتەستىكتىڭ ماڭىزدىلىعىن قۋاتتادى. قۇراما شتاتتار قازاقستاننىڭ جەتەكشى الەمدىك ۋران ءوندىرۋشى رەتىندە كورىنۋىن قۇپتايدى, مۇنىڭ ءوزى ەنەرگيا رەسۋرستارىن جاھاندىق جەتكىزىپ بەرۋدى ءارتاراپتاندىرۋ سالاسىندا ماڭىزدى وقيعا بولدى. قازاقستان مەن قۇراما شتاتتار يادرولىق ەنەرگەتيكا جانە بالامالى ەنەرگيا كوزدەرىن دامىتۋ سالاسىنداعى ىنتىماقتاستىقتى نىعايتۋ نيەتىن ءبىلدىردى. كوشباسشىلار ەكىجاقتى عىلىمي-تەحنيكالىق كەلىسىمگە قول قويىلۋىن قاناعاتپەن اتاپ ءوتتى, بۇل كەلىسىم وسى سالاداعى ىنتىماقتاستىق پەن ايىرباستى ارتتىرۋعا مۇمكىندىك بەرەدى. تاراپتار اۋىل شارۋاشىلىعى سالاسىنداعى ەكىجاقتى ءىرى كوممەرتسيالىق جوبالاردى ىنتالاندىرۋعا ازىرلىكتەرى تۋرالى مالىمدەدى, بۇل جوبالار بۇۇ مەن اقش-تىڭ جاھاندىق ازىق-ت ۇلىك قاۋىپسىزدىگى جونىندەگى باستامالارىن دامىتۋعا سۇبەلى ۇلەس قوسا الار ەدى. قازاقستان مەن اقش اراسىنداعى ەكىجاقتى كونسۋلتاتسيالار: ەكى ەلدىڭ كوشباسشىلارى ۇستىمىزدەگى جىلدىڭ 8-9 ناۋرىزىندا ۆاشينگتوندا وتكەن جىل سايىنعى ەكىجاقتى كونسۋلتاتسيالاردىڭ ءبىرىنشى سەسسياسىنىڭ وتكىزىلۋىن قۇپتادى, ولاردىڭ ماقساتى – قاۋىپسىزدىك جانە تاراتپاۋ, امبەباپ قۇندىلىقتار سالاسىنداعى ىنتىماقتاستىق ماسەلەلەرىن, ەكونوميكا جانە ەنەرگەتيكا سالاسىنداعى ەكىجاقتى ارىپتەستىك ماسەلەلەرىن قوسا العاندا ەكىجاقتى قارىم-قاتىناستىڭ بارلىق قىرلارىن دامىتۋ. دەموكراتيا: قۇراما شتاتتار قازاقستاندى ءوزىنىڭ الىستى كوزدەيتىن ادام قۇقىعى سالاسىنداعى 2009-2012 جىلدارعا ارنالعان ۇلتتىق ءىس-قيمىل جوسپارى مەن 2010-2020 جىلدارعا ارنالعان قۇقىقتىق ساياسات تۇجىرىمداماسىن ورىستەتۋگە شاقىرادى. قۇراما شتاتتار قازاقستان رەسپۋبليكاسى ۇكىمەتىنىڭ ءوزىنىڭ بۇقارالىق اقپارات قۇرالدارىن ليبەراليزاتسيالاۋ جانە ساياسي جۇيەنى دەموكراتيالاندىرۋ, سونىڭ ىشىندە قۇقىقتىق رەفورما جۇرگىزۋ جولىمەن دەموكراتيالاندىرۋ جونىندەگى كۇش-جىگەرىنە قولداۋ كورسەتۋگە ازىرلىگىن بىلدىرەدى. الەۋمەتتىك جۇيەلەر اراسىنداعى بايلانىستاردى نىعايتۋ: پرەزيدەنت وباما مەن پرەزيدەنت نازارباەۆ ۇكىمەتتىك ەمەس ۇيىمداردى, ءدىني ۇيىمدار مەن ءبىلىم بەرۋ مەكەمەلەرىن قوسا العاندا امەريكالىق جانە قازاقستاندىق ازاماتتىق قوعامدار اراسىنداعى بايلانىستاردى نىعايتۋدىڭ ماڭىزدىلىعىن اتاپ كورسەتتى. ن.نازارباەۆ ب.وبامانىڭ كايردەگى ءسوزىن جانە مۇسىلمان الەمىمەن بايلانىسىن قۇپتادى. پرەزيدەنتتەر تۇراقتى قوعامداردى دامىتۋداعى ءدىني ەركىندىك پەن توزىمدىلىككە ايرىقشا ءمان بەرىپ, قازاقستاننىڭ ەقىۇ-عا جانە يكۇ-عا تيىسىنشە 2010 جانە 2011 جىلدارعى توراعا رەتىندەگى كۇش-جىگەرىنە ءوز قولداۋلارى تۋرالى مالىمدەدى. ەۋروپاداعى قاۋىپسىزدىك جانە ىنتىماقتاستىق جونىندەگى ۇيىم (ەقىۇ): پرەزيدەنت وباما بۇرىنعى كەڭەس وداعى رەسپۋبليكالارىنان ءبىرىنشى بولىپ ەقىۇ-عا توراعالىق ەستافەتاسىن قابىلداعان قازاقستاننىڭ بۇل ۇيىمعا توراعالىعىنىڭ تاريحي ءمانىن اتاپ كورسەتتى. كوشباسشىلار قازاقستاننىڭ ەقىۇ-عا توراعالىعىنا قاتىستى ماسەلەلەردى, سونداي-اق قازاقستاننىڭ ەقىۇ ءسامميتىن وتكىزۋ تۋرالى ۇسىنىسىن تالقىلادى. ولار قازاقستاننىڭ اۋعانستاندى تۇراقتاندىرۋ ۇدەرىسىنە ەقىۇ-نىڭ الدەقايدا كەڭىرەك قاتىسۋىنا جاردەمدەسۋ, قازاقستاندا ادامي ولشەمدەر سالاسىنداعى مىندەتتەمەلەردى ورىنداۋ جونىندە شولۋ كونفەرەنتسياسىن وتكىزۋ جونىندەگى, سونداي-اق كورفۋ ۇدەرىسىن جەدەلدەتۋ ماقساتىنداعى وڭ باستامالارىن اتاپ ءوتتى. قۇراما شتاتتار مەن قازاقستان ەقىۇ ءسامميتىنىڭ نەگىزگى كۇن ءتارتىبىن ازىرلەۋدە ىنتىماقتاسۋعا ۋاعدالاستى.