ءان – قۇدىرەت, ءان – كيە, ءان – سەزىم, ءان – تاعدىر... جۇدىرىقتاي جۇرەكتىڭ تۇكپىرىنە بويلاپ, الپىس ەكى تامىرىڭدى ءيدىرىپ, سان ءتۇرلى سەزىم تولقىنىسىنا تۇسىرەتىن اۋەزدى اۋەننىڭ قۇدىرەتىن سوزبەن ايتىپ جەتكىزۋ مۇمكىن ەمەس, ءسىرا دا!؟. ونى تەك جۇرەكپەن سەزىنۋ كەرەك. بەلگىلى سازگەر ەرجان سەرىكباەۆتىڭ اندەرىن تىڭداعاندا ءدال وسىنداي سەزىم تولقىنىسىنا تۇسەسىز.
تالانت – اللادان بەرىلگەن ەرەكشە سىي دەسەك, كەز كەلگەن ادام ول تارتۋدى ەنشىلەي بەرمەسى انىق. ەنشىلەگەن جاعدايدا دا اتاق پەن تانىمالدىلىقتىڭ بۋىنان تۋما تابيعاتىن ساقتاپ, قاراپايىم ادامي بولمىسىنا قىلاۋ تۇسىرمەي وتەتىندەرى سيرەك. ەرجان سەرىكباەۆتى سول قاراپايىمدىلىعىنا ءومىرىنىڭ سوڭىنا دەيىن نوقاتتاي دا داق تۇسىرمەي وتكەن جان دەيدى كوزكورگەن زامانداستارى. 50-گە تولۋىنا ءۇش اي قالعاندا پەشەنەسىنە بۇيىرتقان ءدام-تۇزى تاۋسىلعان كومپوزيتوردىڭ باقيلىق بولعانىنا قىركۇيەك ايىنىڭ 25-ىندە توعىز جىل تولادى ەكەن. سازگەردىڭ ۇيىندەگى جەڭگەمىز كاميلا سەرىكباەۆا جارىنا دەگەن ساعىنىشىمەن ءبولىستى:
– ەكەۋىمىز ءبىر سىنىپتا وقىپ, كەيىن ءبىر جەردە جۇمىس ىستەدىك. ءبىزدىڭ ەرجان تابيعاتىنان وتە قاراپايىم, ۇياڭ بولاتىن. بالا كۇنىنەن سپورتپەن اينالىستى. ساباعىن جاقسى وقىپ, مۋزىكانى جانىنا سەرىك ەتتى. مەكتەپتە وقىعان كەزىندە ءاندى كوپ ايتپايتىن. كەيىن اسكەرگە بارىپ اشىلدى عوي دەيمىن, كەلگەننەن سوڭ ءان جازا باستادى. شىنى كەرەك, مەن ەرجانعا ەمەس, ەڭ ءبىرىنشى انىنە عاشىق بولعانمىن. اۋەلدە ءسابي, ماحاببات تۋرالى اندەرمەن باستالعان ىڭكارلىك كەيىن ۇلكەن تۋىندىلارعا قاراي اۋىستى. ەڭ العاشقى اندەرىنىڭ ءبىرى – «ادەمى», ودان كەيىن مەنىڭ تۋعان كۇنىمە ارنالعان ء«ىنجۋ-مارجان» ەدى. بىراق باستاپقىدا ەرجانعا كومپوزيتور رەتىندە قارامادىق. اۋەسقويلىقپەن تۋعان اندەرىنىڭ ءبىرى عوي دەپ جۇرە بەردىك. كەيىنىرەك بايقادىق, ەرجاننىڭ جۇرەگىنەن ماحاببات, ساعىنىش سەزىمى بۋىرقانا توگىلىپ, جانىمىزدى باۋراپ الدى, – دەيدى كومپوزيتوردىڭ جارى.
ءيا, سابيگە, جارعا دەگەن ماحابباتتان تۋعان اندەر كەيىن اتا-انا, تۋعان جەر, وتانعا دەگەن ۇلى سەزىمدەرگە ۇلاستى. ەرجان سەرىكباەۆ ءان الەمىنە وزگەشە باعىت, ايرىقشا بەتالىسپەن كەلدى. سازگەردىڭ ءبىر ءانى ەكىنشىسىنە ۇقسامايدى. اناعا دەگەن ماحابباتى بولەك بولسا, تۋعان جەر, وتباسى, دوسقا دەگەن سەزىمدەرى مۇلدەم باسقا قىرىنان جارقىراي اشىلىپ, شىنايى جەتكىزىلگەندىگىنەن بولسا كەرەك, كەز كەلگەن ءانى قىسقا عانا ۋاقىت ىشىندە ءار جۇرەكتەن ءوز ورنىن الىپ ۇلگەرەتىن. ءان ارقىلى حالقىن قۋانتاتىن دا, جىلاتا دا الاتىن. ءتىپتى ەل اراسىندا «ەرجاننىڭ اندەرى قازاقتىڭ توي داستۇرىنە دەندەپ ەنىپ العان وزبەك اۋەنىن كەيىن سىرعىتتى» دەيتىن قۇرمەت لەبىزى دە ءالى كۇنگە دەيىن كوپ ايتىلادى. اسىرەسە سازگەردىڭ سوڭعى جازىلعان تۋىندىلارىنىڭ ءبىرى سانالاتىن ءانشى داۋرەن سەيىتجانوۆتىڭ ورىنداۋىندا حالىققا كەڭىنەن تانىلعان «تاڭعى قالا» ءانى ءوزىنىڭ جانرلىق ەرەكشەلىگىمەن دە, اۋەن قۇنارىمەن دە تىڭدارمان جۇرەگىنە مىقتاپ بەكىدى. «العا, قازاق جىگىتتەرى!», «قازاقستان», «الماتى تاڭى», «نەتكەن ءومىر», «الىستاعى ارمان», «اۋىلىم, اڭسادىم», «ارىسىم», «جان اكە», «سەن قاسىمدا بولماساڭ» اندەرى قازاقى بوياۋىمەن دارالانسا, «سەكا», «اي-اي-اي», «شىمكەنتتىڭ سالقىن سىراسى» سىندى ءازىل-قالجىڭعا قۇرىلعان اندەرى جۇرتشىلىق تاراپىنان جىلى قابىلداندى. ءتىپتى سوڭعى ءانى شىمكەنت حالقىنىڭ بويتۇمارىنا دا اينالىپ ۇلگەردى. جۇرەكتەن شىققان ءاننىڭ جۇرەككە جەتۋى دەگەن وسى شىعار.
توپىراق تارتتى ما ەكەن, ومىرىنەن قايتارىنان ءبىر كۇن بۇرىن تۋعان جەرى ارىسقا اسىعىس اتتانىپتى. ەرتەڭگى كۇنى قايعىلى قازاعا سەبەپشى بولعان اپاتقا ۇشىرايدى. جارىنىڭ ايتۋىنشا, كومپوزيتور قاي جەردە جۇرسە دە: «الماتىدا, شىمكەنتتە ءجۇرىپ ءولىپ قالماسام ەكەن, مەنىڭ ارمانىم – سوڭعى دەمىمنىڭ ارىسىمنىڭ توپىراعىندا ۇزىلگەنى», – دەپ ءسوز اراسىندا ءجيى ايتادى ەكەن. سول تىلەگى تاعدىرىندا ورىندالدى.
– اڭسارى اۋىلعا اۋاتىن دا تۇراتىن. قالادا ەڭ كوپ دەگەندە ەكى اپتا عانا جۇرەدى دە, «ەلىمدى, دوستارىمدى ساعىندىم» دەپ اۋىلعا كەتىپ قالاتىن. ارىستىڭ جاعاسىندا سۋ كەشىپ, جاڭا انگە شابىت الاتىن. «مەن ادەمى كيىنىپ جۇرۋدەن دە شارشايمىن, جالاڭ اياق, جالاڭ باس اۋىلدىڭ توپىراعىن تاپتاعىم كەلەدى» دەيتىن. اندەرىنىڭ دەنى سول اۋىلدىڭ شاڭىنا اۋناپ-قۋناپ كەلگەننەن كەيىن تۋاتىن. ادامنىڭ ىشىندە ءبىر نازىك سەزىمدەر بولادى عوي. ء«وزىنىڭ ومىردەن ەرتە كەتەتىنىن سەزىپ ءجۇردى مە؟», دەپ ويلايمىن كەيدە. «تاعدىر جولى», «بايقامايمىز» سىندى اندەرى ارقىلى ومىرگە دەگەن قيماستىق سەزىمىن بىلدىرگەندەي. ورىندالماي كەتكەن ارماندار دا اندەرىنىڭ نەگىزگى ارقاۋى بولاتىن. 40 جاسىنان شىعارماشىلىعىن مۇڭ «مەڭدەي» باستادى. ۇنەمى جۇرەگىندە ءبىر ساعىنىش جۇرەتىن. شىمكەنت پەن ارىستىڭ جاعاسى ءبىر-اق ساعاتتىق جول عوي. بىراق سوعان ساعىنا ءان شىعاراتىن. الماتىدا بولسا, شەتەلدە جۇرگەندەي كوڭىلى ورەكپىپ, ساعىنىشىنا ەرىك بەرەتىن. ەرجان ءبىر ورىندا وتىرا المايتىن, «باراتىن جەرىم, ىستەيتىن شارۋام كوپ» دەپ ۇنەمى اسىعىس جۇرەتىن. ومىردەن دە وسىلاي اسىعىس اتتاندى. جالعىز-اق كوڭىلگە جۇبانىش – پەشەنەسىنە جازىلعان كەلتە عۇمىرىندا ەرجانىمنىڭ وسىنشا دۇنيە جاساپ, حالقىنىڭ ۇلىنا اينالا العانى. اينالاسىنداعى ادامدارعا جاساعان جاقسىلىعى ودان دا كوپ. كىشىپەيىل بولاتىن, قولىنان كەلگەن كومەگىن ىركىپ قالعان ەمەس. ونى كۇنى بۇگىنگە دەيىن بارلىعى ايتىپ تا ءجۇر. سوڭىنان قالعان جالعىز تۇياعى – بالام بەيبارىس ەكەۋمىز وسىعان شۇكىرشىلىك ەتەمىز, – دەپ جارى كاميلا سەرىكباەۆا كوز جاسىنا ەرىك بەردى. ۋاقىت – ءوزى ەمشى. ءبىز جۇباتۋعا تىرىسپادىق.
ۋاقىت-اعزامنىڭ سازگەر پەشەنەسىنە بۇيىرتقان عۇمىرى نەبارى جارتى عاسىرمەن تۇيىقتالىپتى. وسىدان تۋرا توعىز جىل بۇرىن اجال جاستىعىنا باس قويعان تالانتتىڭ بەينەسى بۇگىندە ساعىنىشقا اينالىپ ۇلگەرگەنىمەن, جازىپ كەتكەن اندەرى سۇلۋلىققا جانى قۇشتار ءار تىڭدارماننىڭ جۇرەگىن سىرلى سازىمەن تەربەتۋدە. دەمەك, سازگەردىڭ ءوزى وتكەنىمەن, ءان-عۇمىر ماڭگى جاسايدى, جىر-جۇرەك ۇزدىكسىز سوعا بەرەدى...