ماڭعىستاۋ مەديتسيناسىنداعى ولقىلىقتاردىڭ ءبىرى – جەدەل جاردەم كولىگىنىڭ جەتىسپەۋى. قولدا بار ارناۋلى كولىكتەر جىلدان-جىلعا سانى ارتا تۇسكەن تۇرعىندارعا تولىققاندى قىزمەت كورسەتۋگە ۇلگەرمەيدى. ونىڭ ىشىندە جۇرىسكە جاراماي, ىستەن شىعىپ قالاتىن كولىكتەر دە بارشىلىق.
ەلىمىزدىڭ دەنساۋلىق ساقتاۋ جۇيەسى ىندەتتىڭ قايتا ورشۋىنە بارىنشا دايىندالىپ جاتىر. ماڭعىستاۋدا مەديتسينالىق مەكەمەلەرگە سۋ جاڭا جەدەل جاردەم كولىگىنىڭ بەرىلۋى – وسىنىڭ ءبىر دالەلى.
«سامۇرىق-قازىنا» اق مەن دەنساۋلىق ساقتاۋ مينيسترلىگى اراسىنداعى ىنتىماقتاستىق تۋرالى مەموراندۋم اياسىندا ماڭعىستاۋعا جاڭا كولىكتەر مەن قۇرال-جابدىقتار جەتكىزىلدى. ءوڭىر مەديتسيناسى 10 وتتەگى كونتسەنتراتورى جانە 40 پۋلسوكسيمەترمەن, سونداي-اق 4 «Shevrolet Damas» ماركالى جەدەل جاردەم كولىگىمەن تولىقتى.
– ءبىز ايماقتاعى مەديتسينالىق مەكەمەلەرگە قولداۋ كورسەتكەن بارلىق ۇيىمدار مەن ەل قامىن ويلاعان جاندارعا العىس ايتامىز. كارانتيننىڭ العاشقى كەزىندە ءبىز قيىندىقتارعا تاپ بولدىق. قازىر ەكىنشى تولقىنعا دايىندالىپ جاتىرمىز. ءبىزدىڭ ىنتىماقتاستىعىمىز ءوز جالعاسىن تاباتىنىنا سەنىمدىمىن, – دەدى ماڭعىستاۋ وبلىسىنىڭ دەنساۋلىق ساقتاۋ باسقارماسى باسشىسىنىڭ ورىنباسارى ساكەن مىرزاقۇلوۆ.
وڭىرگە جەدەل جاردەم كولىگى بەرىلۋىنىڭ بۇل باسى ەمەس, بۇعان دەيىن دە «سامۇرىق-قازىنا» اق قولداۋىمەن جانە ەكىنشى دەڭگەيلى بانكتىڭ كومەگىمەن ون كولىك ماڭعىستاۋ وبلىستىق دەنساۋلىق باسقارماسىنا تابىستالعان بولاتىن. جەدەل جاردەم كولىكتەرى قاجەتتىلىگىنە قاراي اۋداندارعا بولىنبەك.
ماڭعىستاۋ وبلىسى