«اۋىرىپ ەم ىزدەگەنشە, اۋىرمايتىن جول ىزدە». دەگەنمەن جاھان ەلدەرىن شىرماۋىقتاي شىرماعان قاۋىپتى ىندەتتىڭ الەگى اتىراۋلىقتارعا دا وڭايعا سوقپادى. وڭىردە ءدارى دە, دەم دە جەتپەي, تاتار ءدامى تاۋسىلعاندار جوق ەمەس. دەسەك تە قيىندىق ارتتا قالدى.
قازىر ەپيدەميالىق احۋال تۇراقتاندى دەۋگە بولادى. سوعان قاراماستان قايتالانۋى مۇمكىن كوروناۆيرۋس ينفەكتسياسىنىڭ ەكىنشى تولقىنىنا دايىندىق جۇمىسى كۇشەيتىلىپ وتىر. بۇل ماسەلە وبلىس اكىمى ماحامبەت دوسمۇحامبەتوۆ وتكىزگەن سەلەكتورلىق كەڭەستە تاعى ءبىر مارتە تالقىعا ءتۇستى.
وبلىستىق دەنساۋلىق ساقتاۋ باسقارماسىنىڭ باسشىسى نۇرلىبەك قابدىقاپاروۆتىڭ ءمالىم ەتۋىنشە, كوروناۆيرۋستىڭ ەكىنشى تولقىنىنا جان-جاقتى دايىندىق جۇرگىزىلۋدە. مەديتسينالىق مەكەمەلەر مەن ءدارىحانالاردا ءدارى-دارمەكتىڭ جەتكىلىكتى قورى جاساقتالدى. بۇعان قوسا كۇزدە ءورشيتىن تۇماۋعا قارسى قولدانىلاتىن 60 مىڭ دوزا ۆاكتسينا ساتىپ الىنىپ, ەكپە جۇرگىزۋ باستالدى.
– بىرىنشىدەن, مەديتسينالىق مەكەمەلەردە ناۋقاستارعا شۇعىل كومەك كورسەتۋ ىسىنە باسا نازار اۋدارىلىپ وتىر. وسى ماقساتتا اۋرۋحانالار وكپەنى جاساندى جەلدەتەتىن 224 اپپاراتپەن, 27 رەنتگەن, 10 كومپيۋتەرلىك توموگرافيا, 977 وتتەگى گەنەراتورىمەن, سونداي-اق 1100 پۋلسوكسيمەترمەن قامتاماسىز ەتىلدى. كوروناۆيرۋستىڭ ەكىنشى تولقىنى ورىن العان جاعدايدا 2080 ينفەكتسيالىق كەرەۋەت جاساقتاۋ جوسپارلاندى. ونىڭ ىشىندە 120 رەانيماتسيالىق ورىن بولادى. ال مەديتسينا قىزمەتكەرلەرىنىڭ قاۋىپتى ىندەتتى جۇقتىرماۋى ءۇشىن جەكە قورعانىش قۇرالدارىنىڭ ەكى ايلىق قورىمەن قامتىلدى, – دەيدى باسقارما باسشىسى ن.قابدىقاپاروۆ.
ونىڭ اقپاراتىنا قاراعاندا, ەكىنشىدەن, شالعاي ەلدى مەكەندەردە ورنالاسقان تۇرعىنداردى مەديتسينالىق كومەكپەن قامتاماسىز ەتۋ دە ۇدايى نازاردان تىس قالمايدى. وسى ماقساتتا جاقىندا 7 جىلجىمالى مەديتسينالىق پۋنكت كەلەدى دەپ كۇتىلىپ وتىر. سونىمەن قاتار دەمەۋشىلىك كومەك ارقىلى الىنعان 8 اۆتوكولىك وبلىستىڭ مەديتسينالىق ۇيىمدارىنا تاراتىلدى. ەندى الداعى قازان-قاراشا ايلارىندا ليزينگ ارقىلى 40 سانيتارلىق اۆتوكولىك جەتكىزىلەدى.
ۇشىنشىدەن, وڭىردەگى 8 مەديتسينالىق مەكەمەگە ورتالىقتاندىرىلعان وتتەگى ستانساسىن ورناتۋ جوسپارلانعان ەكەن. بۇگىندە 6 ستانسانىڭ قۇرىلىس-مونتاج جۇمىستارى جۇرگىزىلۋدە. تورتىنشىدەن, وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى – باس مەملەكەتتىك سانيتارلىق دارىگەر اسىلبەك شاروۆتىڭ مالىمەتىنشە, پتر ادىسىمەن COVID-19 ينفەكتسياسىنا تەستىلەۋ جاسايتىن زەرتحانالار قورىندا 161 682 تەست سىناماسى بار. ەندى تاعى 126 700 تەست سىناماسىن الۋ جوسپارلانىپ وتىر. قازىر اتىراۋ وبلىسىندا پتر ءادىسى ارقىلى زەرتتەۋ جۇرگىزەتىن 2 مەملەكەتتىك, 4 جەكەمەنشىك زەرتحانا, سونداي-اق تەڭىز كەنىشىندە ەكى زەرتحانانىڭ فيليالى جۇمىس ىستەيدى.
– وبلىس كولەمىندە COVID-19 ينفەكتسياسىن انىقتاۋ ءۇشىن 233 319 پتر-تەست جاسالدى. تەست قورىتىندىسىمەن 16 قىركۇيەكتە 11 023 جاعداي راستالدى. اتىراۋ – تەست وتكىزۋدەن ەلىمىزدەگى الدىڭعى ورىنداعى وڭىرلەردىڭ ءبىرى. سوندىقتان ستاتيستيكاعا سۇيەنەر بولساق, وبلىستىڭ ءاربىر ءۇشىنشى تۇرعىنى تەست تاپسىردى دەۋگە بولادى. اتىراۋدا جۇمىس بابىمەن جۇرگەن وزگە وڭىرلەردىڭ ازاماتتارى دا بار. ولار دا ءبىزدىڭ وبلىستىڭ ستاتيستيكاسىنا ەندى, – دەيدى ا.شاروۆ.
وبلىس اكىمى م.دوسمۇحامبەتوۆتىڭ پىكىرىنشە, ەپيدەميالىق احۋال تۇراقتانعانىنا بايلانىستى باقىلاۋدى بوساڭسىتۋعا بولمايدى. ويتكەنى كوروناۆيرۋس ينفەكتسياسىن جەڭۋدىڭ باستى جولى – كۇرەستى ءالى دە جالعاستىرۋ. وسى ورايدا اسىرەسە تۇرعىندار اراسىندا اقپاراتتىق ناسيحاتتى ودان ءارى كۇشەيتۋ قاجەت.
– كوروناۆيرۋس ىندەتىنىڭ ءبىرىنشى تولقىنى كەزىندە ناۋقاس ادامداردى ەمدەۋگە ارنالعان توسەك ورىندارىنىڭ تاپشىلىعى انىق بايقالدى. وسى ماسەلەنى شەشۋ باعىتىندا اتىراۋ قالاسىندا 200 ورىندىق, ال جىلىوي اۋدانىندا 275 ورىندىق اۋرۋحانانىڭ قۇرىلىسى جۇرگىزىلىپ جاتىر. قۇرىلىس جۇمىستارى جۋىق ارادا اياقتالۋى ءتيىس, – دەيدى وبلىس اكىمى م.دوسمۇحامبەتوۆ. – اتىراۋ قالاسىندا سالىنىپ جاتقان ءمودۋلدى تيپتەگى جۇقپالى اۋرۋلار اۋرۋحاناسىنىڭ قۇرىلىسىن جۇرگىزۋ كەستەدەن كەشىكپەگەنى ءجون. وڭىردەگى ەپيدەميالىق جاعدايدى باقىلاۋدا ۇستاپ, سانيتارلىق نورمالاردىڭ قاتاڭ ساقتالۋى قاداعالانىپ وتىر. دەگەنمەن كوروناۆيرۋستىق ينفەكتسيانىڭ تارالۋى قاۋپى مەن اۋرۋ كورسەتكىشىنىڭ ءوسىمى بايقالسا, جەدەل شارالاردى قابىلداپ, بارلىق ساناتتاعى مەديتسينالىق قىزمەتكەرلەردىڭ قاۋىپسىزدىگىن قامتاماسىز ەتۋىمىز كەرەك.
اتىراۋ وبلىسى