ىستە ىركىلىس بولماۋى ءتيىس

اتالعان كوميسسيا كوممۋنال­دىق قىزمەتتەردىڭ قىسقى ماۋ­سىمعا دايىندىعى مەن «ماقات-سولتۇستىك كاۆكاز» ماگيسترالدى گاز قۇبىرىنداعى اعىمدىق جوندەۋ جۇمىسىنا باسا نازار اۋدارىپ وتىر.

وبلىس اكىمىنىڭ ءبىرىنشى ورىن­با­سارى جەتەكشىلىك ەتەتىن ۆەدوم­ستۆوارالىق كوميسسيا ناقتى اتقارىلاتىن ءىس-شارالاردىڭ جوس­­پارىن بەكىتىپ, ورىندالۋىن­ قاداعالاۋعا الدى. جىلۋ بە­رۋ ماۋسىمىنا دايىندىق جۇمى­سىن جۇرگىزۋ ءۇشىن 5,7 ملرد تەڭ­گە ءبولىندى. قولداعى دەرەككە قاراعاندا, اتىراۋ قالاسىندا كوپپاتەرلى 1 737 تۇرعىن ءۇي, 409 ءبىلىم بەرۋ, 147 دەنساۋلىق ساقتاۋ نىسانى بار.

پاتەر يەلەرىنىڭ كووپەرا­تيۆتەرى مەن كوممۋنال­دىق مەكە­مەلەردىڭ بىرلەسكەن جۇمى­سىنىڭ ناتيجەسىندە 1 402 تۇرعىن ءۇي, 392 ءبىلىم بەرۋ جانە 135 دەنساۋلىق ساقتاۋ نىسانى گيدراۆليكالىق سىناقتان وتكىزىلدى. بىراق ءالى دە كوممۋنالدىق كاسىپورىندار جىلۋ بەرۋ ماۋسىمىنا دايىندىق شارالارىن تولىق اياقتاي قويعان جوق. ويتكەنى 19,6 شاقىرىمدىق جىلۋمەن قامتيتىن جەلىنىڭ 11,4 شاقىرىمىنا, 781,19 شا­قى­رىم­عا سوزىلعان ەلەكتر جەلى­لەرىنىڭ 679,47 شاقىرىمىنا, 3,08 شاقىرىم سۋ جانە كارىز جۇيە­سىندەگى جەلىلەردىڭ 2,3 شا­قى­رىمىنا عانا اعىمداعى جون­دەۋ جۇمىستارى جۇرگىزىلدى. دەسەك تە, كوممۋنالدىق سالاداعى كاسىپورىنداردىڭ باسشىلارى ءبىر ايعا جەتپەيتىن مەرزىمنەن كەيىن باستالاتىن جىلۋ بەرۋ ماۋسىمىنا ساقاداي ساي بولامىز دەگەندى ۇستانىپ وتىر.

قىسقا ازىرلىك باستالىسى­مەن اسىرەسە ىستىق سۋ بەرۋ ءجيى توق­تايدى. مۇنىڭ بىر­نە­شە سە­بەبى بار. «اتىراۋ جى­لۋ ەلەكتر ورتالىعى» اق ما­مان­­دا­رىنىڭ تۇسىندىرۋىنشە, بىرىنشىدەن, قۇبىر جەلىسىن جوندەۋ كەزىندە تۇربا اۋىستىرىلادى. ەكىنشىدەن, گيدراۆليكالىق سىناق جۇرگىزىلەدى. كەيدە وسىنداي جوندەۋ جۇمىستارى بىرەر اپتادا اياقتالسا, اتىراۋ قالاسىنىڭ «تۇرعىن ءۇي قالاشىعى», «نۇر­سايا» شاعىن اۋداندارىندا ءبىر ايعا جۋىق مەرزىمگە سوزىلدى. تۇرعىندارعا جازدىڭ اپتابى بولسا دا, وسىنشا ۋاقىت ىستىق سۋسىز وتىرۋىنا تۋرا كەلدى. ەندى مىنە, اتىراۋ قالاسىندا 16-27 قىركۇيەكتە ىستىق سۋ بەرۋ تاعى دا توقتاتىلماق.

مۇنداي ىركىلىس تابيعي گاز جەلىسىندە دە بايقالادى. ماسە­­لەن, «ينتەرگاز ورتالىق ازيا» اق-تىڭ ماگيسترالدى گاز قۇبى­رىنا جوسپارلى جوندەۋ جۇر­گىزىلدى. سونىڭ ىشىندە «ماقات – سولتۇستىك كاۆكاز» ماگيسترال­دى گاز قۇبىرىنداعى جوندەۋ جۇمىستارىن جۇرگىزۋ كەزىندە, ناقتىراق ايتقاندا, 1-7 قىر­كۇيەكتە ماقات اۋدانىنىڭ دوسسور كەنتىندە, ال 8-11 قىركۇيەك ارا­لى­عىندا اتىراۋ قالاسىنىڭ سول جاق جاعالاۋىنداعى تۇرعىن ۇي­لەر مەن كاسىپورىندارعا گاز بەرۋ توق­تاتىلدى.

وڭىردەگى قىسقى ماۋسىمعا ازىرلىك كەزىندە كورىنىس تاباتىن مۇنداي جايت جىل سايىن قاي­تالانىپ تۇرادى. سول سەبەپتەن اتىراۋ قالاسىنىڭ, ىرگەلەس ەلدى مەكەندەر مەن ماحامبەت اۋدانىنا قاراستى العا, ورتاقشىل, ەسبول, اقجايىق, ەڭبەكشىل اۋىلدارىنىڭ تۇرعىندارى دا از كۇن تابيعي گازسىز وتىرۋعا تۇسىنىستىكپەن قاراپ كەلەدى. ارينە «كوگىلدىر وتىن» توقتاتىلعان كەزدە تۇتىنۋشىلار ەلەكتر قۋاتىن ادەتتەگىدەن كوبىرەك تۇتىنارى داۋ­سىز. سوندىقتان «اتىراۋ جىلۋ ەلەكتر ورتالىعى» اق ەلەكتر ەنەر­گياسىمەن ۇزدىكسىز قامتۋ ءۇشىن مازۋت وتىنىن جاعۋعا ءماجبۇر بولدى.

اتىراۋ وبلىسى