تابيعاتقا جاسالعان تاعىلىقتىڭ كەسىرىنەن اتىراۋدىڭ اۋاسى ءجيى-ءجيى لاستانادى, دەپ حابارلايدى Egemen.kz.
بىرەسە كۇكىرتتىڭ ءيىسى قولقانى قابادى. ەندى بىردە قامىس ورتەنىپ, كوك ءجۇزىن قارا ءتۇتىن قاپتايدى. ەندى مىنە, تاعى دا قارا ءتۇتىننىڭ بۋداقتاعانى انىقتالىپ وتىر.
"ەكولوگيا دەپارتامەنتى الەۋمەتتىك جەلىلەردەگى جازبالارعا مونيتورينگ جۇرگىزۋ كەزىندە قاراباتان ەلدى مەكەنى اۋماعىندا اتموسفەرالىق اۋادا قارا ءتۇتىن ىزدەرى بار لاستاۋشى زاتتاردىڭ شىعارىلعانىن انىقتادى. وسىعان بايلانىستى ۆەدومستۆو قىزمەتكەرلەرى ءموبيلدى جىلجىمالى زەرتحانامەن قاراباتان ەلدى مەكەنىنىڭ اۋماعىنا باردى.
اۋانى لاستاۋشى شىعارىندىلاردىڭ (قارا ءتۇتىننىڭ) كوزى نورت كاسپيان وپەرەيتينگ كومپاني ن.ۆ. كومپانياسىنىڭ فيليالى "بولاشاق" مۇناي مەن گازدى كەشەندى دايىنداۋ قوندىرعىسىنىڭ فاكەلدى قوندىرعىسى ەكەنى انىقتالدى. سونداي-اق, دەپارتامەنت قىزمەتكەرلەرى سانيتارلىق قورعانىش ايماعى شەكاراسىنىڭ ىرگەلەس اۋماعىندا اتموسفەرالىق اۋانى ولشەدى. وسىعان بايلانىستى ونەركاسىپتىك نىسانعا جوسپاردان تىس تەكسەرۋ جۇرگىزىلەدى. ونىڭ ناتيجەلەرى تۋرالى قوسىمشا حابارلاناتىن بولادى", دەپ حابارلادى اتىراۋ وبلىسى بويىنشا ەكولوگيا دەپارتامەنتىنىڭ ءباسپاسوز قىزمەتى.