«ۆولونتەر جىلى» اياسىندا ورال قالاسىندا «اشىق جۇرەك» الەۋمەتتىك جوبالار ورتالىعى اشىلدى. شاراعا قالا اكىمى ابات شىنىبەكوۆ قاتىسىپ, ورتالىقتىڭ قىزمەتىمەن, جوسپارىمەن تانىستى.
الەۋمەتتىك ورتالىق اقپارات جانە قوعامدىق دامۋ مينيسترلىگىنىڭ قولداۋىمەن اشىلىپ وتىر. ءدال وسىنداي جوبا ەلىمىزدىڭ 17 قالاسىندا قولعا الىنعان. ۇيىمداستىرۋشىلاردىڭ حابارلاۋىنشا, ورتالىق 7 باعىت بويىنشا «Birgemiz» جالپىۇلتتىق تۇجىرىمداماسى اياسىندا جۇمىس ىستەيدى.
– قازىرگى تاڭدا «ەرىكتىلەر ليگاسىندا» جۇزگە جۋىق ۆولونتەر بار. بىزدەگى ۆولونتەرلەرگە دە كومەك قاجەت. باستى ماقساتىمىز – جاستاردىڭ جاڭا جوبالارىنا قولداۋ ءبىلدىرۋ. ءبىز الدىن الا تاڭداپ العان 7 باعىت بويىنشا جوبالاردىڭ جۇزەگە اسۋىنا مۇمكىندىك بەرەمىز. جالپى, ۆولونتەرلەر ليگاسى وسىنداي ورتالىقتار ارقىلى رەسپۋبليكامىزدا ۆولونتەرلىكتىڭ دامۋىنا ۇلەس قوسپاق. ليگا 2013 جىلدان بەرى جۇمىس ىستەپ كەلەدى. وسى جىلدار ىشىندە اتقارىلعان يگى ىستەر جەتكىلىكتى. ورتالىعىمىزعا كەز كەلگەن يدەياسى بار, قايىرىمدىلىققا جانى جاقىن جاس كەلىپ جوباسىن ۇسىنا الادى. ياعني كومەك سۇراپ كەلگەن بولاشاعى بار جوبالار نازاردان تىس قالمايتىنى انىق, – دەدى «قازاقستان ۆولونتەرلەر ليگاسىنىڭ» باتىس قازاقستان وبلىسى بويىنشا ديرەكتورى التىنبەك بيسەنوۆ.
اۋقىمدى جوبالاردى جۇزەگە اسىرۋدا ەرىكتىلەر قوزعالىسىنىڭ ماڭىزى زور ەكەنىن اتاپ وتكەن شاھار باسشىسى ابات اباي ۇلى:
– بيىلعى جىلدىڭ ەڭ باستى جاڭالىعىنىڭ ءبىرى – مەملەكەت باسشىسىنىڭ بۇل جىلدى «ۆولونتەر جىلى» دەپ جاريالاۋى. بۇگىنگى تاڭدا ورالدا 100-دەن اسا ەرىكتىلەر ۇيىمى, 2 مىڭعا جۋىق ۆولونتەر جاس بار. «قازاقستان ۆولونتەرلەر ليگاسى» شتابىنىڭ ءبىزدىڭ قالامىزدا اشىلعانى قۋانتادى. ەلىنە, جەرىنە جانى اشيتىن, قوعامدىق ومىرگە بەلسەندى اتسالىسىپ, جاناشىرلىق تانىتىپ جۇرگەن جاستاردىڭ باسىن بىرىكتىرەتىن ۇيىمنىڭ اشىلعانى ىزگى ءىستىڭ الداعى ۋاقىتتا دا جالعاسىن تابۋىنا سەبەپشى بولماق. ال مۇنداي باعىت-باعدار بەرۋشى ورتالىق قايىرىمدىلىق سانىن ارتتىرىپ قانا قويماي, ەلىمىزدە ۆولونتەرلىك مادەنيەتىنىڭ قالىپتاسۋىنا جاقسى جاعداي جاساماق. پرەزيدەنت كەزەكتى جولداۋىندا دا ازاماتتىق قوعامدى دامىتۋ قاجەتتىلىگىن, ازاماتتاردىڭ بەلسەندىلىگىن ارتتىرۋ ماسەلەسىنە كەڭىنەن توقتالدى. جاستاردىڭ ەڭبەككە قىزىعۋشىلىعىن وياتىپ, قاي ماماندىقتى بولسىن قادىرلەۋ قاجەتتىگىن ايتتى. ۆولونتەرلەر پاندەميا كەزىندە دە ۇلكەن كۇش ەكەنىن دالەلدەپ, العى شەپتە ايانباي ەڭبەك ەتتى. وسىنداي ورتالىقتار ازاماتتىق پوزيتسياسى بار, بەلسەندى جاستاردىڭ شوعىرلانۋىنا, يدەيالارىن ايتىپ, جوسپارىن بولىسەتىن الاڭعا اينالادى دەپ سەنەمىن, – دەدى.
ليگا ۆولونتەرلەرىن وڭىردەگى جاستار ۇيىمدارىمەن تىعىز بايلانىستا جۇمىس ىستەۋگە شاقىرعان وبلىستىق جاستار ساياساتى ماسەلەلەرى باسقارماسى باسشىسىنىڭ مىندەتىن اتقارۋشى نۇرحات وراش ورتالىق جۇمىسىنا ساتتىلىك تىلەپ, بىرلەسكەن جۇمىستاردىڭ جەمىستى بولارىن اتاپ ءوتتى.
ورال قالاسىنىڭ ۆولونتەرى, ليگانىڭ مۇشەسى مارجان مىرزاعاليەۆا ورتالىققا كەلىپ ءوزى سياقتى دوستار تاپقانىن, ەڭ ماڭىزدىسى ءوزىنىڭ ماقساتىن تۇسىنگەنىن ايتادى. «حالقىمىز ءۇشىن سىنعا اينالعان پاندەميا كەزىندە باسقا ۆولونتەرلەرمەن بىرگە جۇمىس ىستەدىك. دارىگەرلەر مەن پوليتسيالارعا تاماق تاسىدىق, مۇقتاج جاندارعا كوڭىل ءبولىپ, ولارعا ازىق-ت ۇلىك سەبەتتەرىن جەتكىزدىك. سول كەزدە قانشا مۇقتاج وتباسىنىڭ بارىن كوردىك. ولاردى كورىپ, ءبىزدىڭ كومەگىمىز قاجەت ەكەنىن ءتۇسىندىم. سوندىقتان ۆولونتەرلىكتى ءومىرىمنىڭ بولىگىنە اينالدىرۋدى ءجون سانادىم. كونكۋرستارعا قاتىسىپ, ءوزىمنىڭ جوبامدى دا ۇسىنسام دەگەن جوسپارىم بار», دەدى ەرىكتى.
جيىن بارىسىندا الداعى ۋاقىتتا اتالمىش جوبا اياسىندا شاعىن گرانتتار بەرىلەتىنى بەلگىلى بولدى. ورتالىق قىزمەتكەرلەرىنىڭ ايتۋىنشا, 300 مىڭ تەڭگەدەن باستالاتىن بارلىعى 107 گرانت رەسپۋبليكا جاستارىنىڭ جاڭا باستامالارىن جۇزەگە اسىرۋعا مول مۇمكىندىك سىيلاماق.
شاعىن گرانتتار كونكۋرسىنا ۇكىمەتتىك ەمەس ۇيىمدار, باستاماشى توپتار جانە جەكە تۇلعالار قاتىسا الادى. تولىق اقپاراتپەن liga.org.kz رەسمي سايتىندا تانىسۋعا بولادى.