1 قىركۇيەكتە “قاراسورا-2020” رەسپۋبليكالىق جەدەل-الدىن الۋ ءىس-شاراسىن وتكىزۋ بارىسىندا جامبىل وبلىسىنىڭ پوليتسيا دەپارتامەنتى ەسىرتكى بيزنەسىنە قارسى ءىس-قيمىل باسقارماسىنىڭ قىزمەتكەرلەرى تاراز قالاسىنىڭ 60 جاستاعى تۇرعىنىن ۇستادى, دەپ حابارلايدى Egemen.kz Polisia.kz سايتىنا سىلتەمە جاساپ.
تۇرعىننىڭ جەكە مەنشىك ءۇيىنىڭ باقشاسىنان جالپى سالماعى 60 كەلى ماريحۋانا ەسىرتكى زاتى تابىلىپ, تاركىلەندى. ۇستالعان ازامات كىناسىن مويىندادى. قازىر قر قك-ءنىڭ 300-بابىنىڭ 1-بولىگى بويىنشا سوتقا دەيىنگى تەرگەۋ امالدارى جۇرگىزىلۋدە.
جامبىل وبلىسىنىڭ پوليتسيا دەپارتامەنتى تۇرعىندارعا تىيىم سالىنعان قاراسورا, كوكنار نەمەسە قۇرامىندا ەسىرتكى زاتتارى بار باسقا دا وسىمدىكتەردى وسىرگەنى ءۇشىن ءۇش جىلدان سەگىز جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلاتىنىن ەسكەرتەدى.