شەتەلدىك كاسىپورىندار شاراپاتى­

وسىعان بايلانىستى جەرگىلىكتى بي­لىك وبلىستىق اۋرۋحانانىڭ, اتىراۋ قالاسى مەن اۋداندارداعى وزگە دە ەمدەۋ ورىندارىنىڭ جانىنان قوسىمشا ستاتسيونارلار اشۋعا ءماجبۇر بولدى.

مىنە, وسى سەبەپتەن, تاعى ءبىر ين­فەك­تسيالىق اۋرۋحانانىڭ قاجەتتىگى تۋىن­دادى. ارينە, الدىن الا بيۋدجەتتەن قارجى قاراستىرىلماعاندىقتان, قاپەلىمدە مۇنداي ەمدەۋ ورنىنىڭ قۇرىلىسىنا قارجى تابۋ دا وڭاي ەمەس. دەگەنمەن وبلىس اكىمى ماحامبەت دوس­مۇحامبەتوۆ وڭىردەگى مۇناي-گاز ونەركاسىبىندە جوباسى بار كومپانيالاردى دەمەۋشىلىككە تارتتى. ءسويتىپ, كاسپي تەڭىزىنىڭ قازاقستاندىق سەكتو­رىنداعى «قاشاعان» جوباسىنىڭ وپە­را­تورى – NCOC كومپانياسىنىڭ قا­رجىلاي قولداۋىمەن تامىزدا اتىراۋ قالاسىندا ءمودۋلدى اۋرۋحا­نانىڭ قۇرىلىسى باس­تالدى. وب­لىستىق دەنساۋلىق ساقتاۋ باسقارما­سىنىڭ باسشىسى نۇرلىبەك قابدىقاپاروۆتىڭ مالىمەتىنە سۇيەنسەك, قازاندا پايدالانۋعا بەرىلەتىن جاڭا اۋرۋحانانىڭ بۇرىنعى ەمدەۋ ورىندارىنان وزگەشەلىگى كوپ بولماق. ماسەلەن, مەديتسينالىق بلوكتا زەرتحانا, كت, رەنتگەن اپپاراتتارى, برونحوسكوپيكالىق قۇرال-جابدىقتار, ۋزي, ەلەكتروكار­ديو­گرافتار ورنالاستىرىلادى.

– بۇل وڭىردەگى ەكىنشى جۇقپالى اۋرۋلار اۋرۋحاناسى بولعاندىقتان, مۇن­داعى ورىن سانى 200 كەرەۋەتكە ارنالىپ وتىر. مۇنداي اۋرۋحانادا جۇ­مىس ىستەۋگە ىرىكتەلەتىن جەرگىلىكتى مەدي­تسي­نا قىزمەتكەرلەرىنە تالاپ كۇشەيتى­لەدى. سول سەبەپتەن, ولاردى قايتا وقى­تۋ ار­قىلى قابىلداۋدى ويلاستىرىپ وتىر­مىز, – دەيدى ن.قابدىقاپاروۆ. قا­زىر جاڭا نىساننىڭ قۇرىلىسىن «BI Industrial» كومپانياسى جۇرگىزىپ جاتىر. اۋرۋحانا عيماراتى جىلدام قۇراستىرىلاتىن ءمودۋلدى بلوكتاردان تۇرعىزىلۋدا. مەديتسينا قىزمەتكەرلەرى مەن ەم الۋشىلاردىڭ قاۋىپسىزدىگىن قامتاماسىز ەتەتىن زاماناۋي دياگنوس­تيكالىق قۇرال-جابدىقتارمەن جاب­دىقتالادى. مەديتسينالىق نىساندا ەكى ورىنعا ارنالعان 56 پالاتا, ءۇش ورىندىق 16 پالاتا, ءبىر ورىندىق 6, سونداي-اق ارنايى ەكى ورىندىق 7 بوكس اۋلاعا شىعاتىن ارنايى ەسىگىمەن سالىنۋدا. ال قارقىندى تەراپيا بولىمىندە 20 كەرە­ۋەت, قابىلداۋ-دياگنوستيكالىق بولىمىندە بەس بوكس جاساقتالادى.

تاعى ءبىر شەتەلدىك كومپانيانىڭ دەمەۋشىلىگىمەن اۋرۋحانانىڭ قۇ­رى­­لىسى جىلىوي اۋدانىندا ءجۇ­رىپ جاتىر. اۋدان ورتالىعى – قۇل­سارى قالاسىنداعى بۇل نىساننىڭ قۇرى­لى­سىنا «تەڭىزشەۆرويل» جشس-نىڭ «يگى­لىك» باعدارلاماسىمەن 7175,4 ملن تەڭگە ءبولىندى. بيىلعى مامىردا باستاۋ العان قۇرىلىس جۇمىستارى كەلەسى جىلى پايدالانۋعا تاپسىرىلماق.

جوباعا سايكەس, العاشقىدا اۋرۋحا­نانىڭ نەگىزگى كورپۋسىندا 55 ورىن بو­لاتىنى جوسپارلانىپتى. بالالار بولىمشەسىنە 10, ينفەكتسيالىق بولىمشەگە 10 ورىن ارنالىپ وتىر. الايدا وبلىس اكىمى ماحامبەت دوسمۇحامبەتوۆ ەلىمىزدە العاش قۇرىلىپ, «تەڭىز» كەنىشىن يگەرىپ جاتقان «تەڭىزشەۆرويل» جشس-نىڭ باسشىلارىنا اۋرۋحاناداعى ورىندى كوبەيتۋدى ۇسىندى. بۇل ارينە بەكىتىلگەن قوسىمشا وزگەرىسكە ۇشىرايتىنى داۋسىز. دەسەك تە, شەتەلدىك ينۆەستورلارمەن بىرلەسە قۇرىلعان كومپانيا باسشىلارى بۇل ۇسىنىسقا تۇسىنىستىكپەن قاراپ, اۋرۋحانا جوباسىنا قوسىمشا ناقتىلاۋلار ەنگىزدى. ءسويتىپ قۇرىلىس جۇمىستارى ەندى قارقىن العان جاڭا اۋرۋحاناداعى كەرەۋەت سانى 200 ورىنعا كوبەيەتىن بولدى.

جوبالاۋشىلاردىڭ تۇسىندىرۋىنشە, اۋداندا بوي كوتەرىپ جاتقان اۋرۋحانانىڭ ۇلكەن قالالارداعى نىسانداردان كەمدىگى جوق. وسى زامانعى جابدىقتارمەن قامتىلاتىن كىر جۋاتىن بولمەلەر, كولىك گاراجى, باقىلاۋ-تەكسەرۋ بەكەتتەرى, ءورت ءسوندىرۋ جابدىقتارى دا جاڭا نىساننىڭ ەرەكشەلىگىن ايقىنداي تۇسەدى. ءتىپتى مۇندا 65 تەكشە مەتر تازا سۋ جينايتىن تسيستەرنا, سەپتيك, پاتسيەنتتەر ءۇشىن اۆتوتۇراق قاراستىرىلىپتى. قۇرىلىس جۇمىسىنا جەرگىلىكتى تۇرعىندار تارتىلدى.

تاعى ءبىر ماسەلە – دەربەس وتتەگى جە­لىسىنىڭ جوقتىعى. تەك وبلىستىق اۋرۋحا­ناداعى وتتەگى تاسىمالىن جۇزەگە اسىراتىن 60 نۇكتە ەپيدەميالىق احۋال ۋشىققان كەزدە ازدىق ەتتى. سوندىقتان بۇل اۋرۋحانادا وتتەگى جەلىسىن 300 نۇك­تەگە دەيىن كوبەيتۋ قولعا الىندى. ونىڭ 260 نۇكتەسى اۋرۋحانانىڭ جاڭا عيماراتىنا تارتىلدى. دەربەس تسەح وزدىگىنەن وتتەگى وندىرەدى.

وبلىستىق دەنساۋلىق ساقتاۋ باس­قارماسىنىڭ باسشىسى ن.قابدى­قا­پا­روۆتىڭ اقپاراتىنا سۇيەنسەك, بۇعان قوسا وبلىستىق كارديولوگيالىق ورتالىق پەن №2 وبلىستىق ينفەكتسيالىق اۋرۋحانادا دا وتتەگى تسەحىن جاساقتاۋ جوس­پارلانىپتى.

– بۇدان بۇرىن ماحامبەت اۋدانىن­داعى 100 كەرەۋەتتىك ينفەكتسيالىق ستاتسيوناردا 12 وتتەگى نۇكتەسى تارتىلعان بولاتىن. الداعى ۋاقىتتا ونىڭ سانىن كوبەيتۋدى جوسپارلاپ وتىرمىز. سو­نىمەن قاتار قۇرمانعازى اۋدانىندا جاڭادان سالىنىپ جاتقان اۋرۋحاناعا دا وتتەگى جەلىسىنىڭ نۇكتەسى تولىقتاي تارتىلادى. ودان كەيىن قىزىلقوعا, ما­قات, باسقا دا اۋداندارعا وتتەگى جەلى­لەرىن تارتۋدى جوسپارلادىق, – دەيدى ن.قابدىقاپاروۆ.

اتىراۋدىڭ تابيعي بايلىعىنان تا­بىس تابۋعا كەلگەن شەتەلدىك كاسىپ­ورىنداردىڭ شاراپاتى اۋرۋحانالار قۇرىلىسىن جۇرگىزۋگە ءتيىپ وتىر.

اتىراۋ وبلىسى