بۇل تۋرالى سىبايلاس جەمقورلىققا قارسى ءىس-قيمىل اگەنتتىگى اتىراۋ وبلىسى بويىنشا دەپارتامەنتىنىڭ ءبىرىنشى ورىنباسارى ا. مامىتوۆتىڭ ءمالىم ەتتى, دەپ حابارلايدى Egemen.kz.
اۋدان اكىمى قايرات نۇرتاەۆتىڭ ورنىن بوساتۋىنا ورىنباسارىنىڭ جەمقورلىق ارەكەتكە بارۋى سەبەپ بولعان.
«سىبايلاس جەمقورلىققا قارسى قىزمەت بۇعان دەيىن قۇرمانعازى اۋدانى اكىمىنىڭ ورىنباسارى ءو.تاجىباەۆقا قاتىستى سوتقا دەيىنگى تەرگەۋدى اياقتادى. 3 شىلدەدە اۋداندىق سوت قۇرمانعازى اۋدانى اكىمىنىڭ بۇرىنعى ورىنباسارى وركەن تاجىباەۆقا ۇكىم شىعاردى.
ول تۋىسقاندارىنا تىركەلگەن جشس مەن جك باسقارماسىنا قاتىسىپ, ولارعا ارتىقشىلىق بەردى. بالىقشى كۇنىنە ارنالعان ءىس-شارانى وتكىزۋ سىلتاۋىمەن جشس قۇرىلتايشىسىنىڭ 150 مىڭ تەڭگە مولشەرىندەگى اقشالاي قاراجاتىن يەمدەگەن. وندىرىستىك كووپەراتيۆتەردىڭ بىرىنە 500 مىڭ تەڭگە زيان كەلتىردى. سونداي-اق اۋداننىڭ از قامتىلعان ازاماتتارى ءۇشىن قورعانىس مەديتسينالىق ماسكالارىن ساتىپ الۋعا قارجىلىق كومەك كورسەتۋ سىلتاۋىمەن كاسىپكەرلەردىڭ جالپى سوماسى 125 مىڭ تەڭگە اقشالاي قاراجاتىن يەمدەنىپ, كەيىننەن ءوز قاجەتتىلىگىنە جۇمسادى.
ناتيجەسىندە ەكس-شەنەۋنىككە 2 ملن 750 مىڭ تەڭگە كولەمىندە ايىپپۇل سالىپ, مەملەكەتتىك قىزمەتتە قىزمەت اتقارۋ قۇقىعىنان ءومىر بويىنا ايىرىلدى» -دەدى دەپارتامەنتتىڭ ءبىرىنشى ورىنباسارى ا.مامىت.
ونىڭ ايتۋىنشا, «مەملەكەتتىك قىزمەت جانە سىبايلاس جەمقورلىققا قارسى ءىس-قيمىل ماسەلەلەرى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» زاڭنىڭ جاڭا رەداكتسياسىنا سايكەس ءبىرىنشى باسشى ايىپتاۋ ۇكىمى كۇشىنە ەنگەننەن كەيىن 10 كۇنتىزبەلىك كۇن ىشىندە وتستاۆكاعا كەتۋگە مىندەتتى.
«وسىعان بايلانىستى, بيىلعى 8 قىركۇيەكتە قۇرمانعازى اۋدانىنىڭ اكىمى ق.نۇرتاەۆ قول استىنداعىلارعا قاتىستى سىبايلاس جەمقورلىق جانجالىنان كەيىن وتستاۆكاعا كەتۋگە ءوتىنىش بەردى» -دەپ حابارلادى سىبايلاس جەمقورلىققا قارسى ءىس-قيمىل اگەنتتىگى اتىراۋ وبلىسى بويىنشا دەپارتامەنتىنىڭ ءبىرىنشى ورىنباسارى ا. مامىتوۆ.