اقتوبەلىك يگور بۇدان 20 جىل بۇرىن اۋىر قىلمىسپەن 25 جىلعا بوستاندىعىنان ايىرىلىپ, تەمىر تورعا توعىتىلعان. ول كەزدە 30 جاسقا دا تولىپ ۇلگەرمەگەن جىگىتكە ءوزى جاساعان قىلمىسقا وراي قاتاڭ رەجىمدەگى كولونيادا جازاسىن وتەۋگە ۇكىم شىقتى, دەپ حابارلايدى Egemen.kz
يگورعا كوپتەن كۇتكەن قۋانىشتى كۇن تۋدى. كەشە عانا ول شارتتى تۇردە مەرزىمىنەن بۇرىن بوساتۋ ارقىلى اقتاۋداعى كولونيادان بوستاندىققا شىقتى.
– جازامدى وتەۋ كەزىندە قىلمىستىق اتقارۋ جۇيەسىنىڭ ءتورت مەكەمەسىندە بولدىم, قازىر سونىڭ ۇشەۋى جابىلعان. مەن قاماۋداعى كەزىمدى بوسقا وتكىزگەن جوقپىن. ترانسپورتتىق-تەحنولوگيالىق كولىك جانە كەشەندەردى پايدالانۋ سالاسىندا ارناۋلى ورتا ءبىلىم ديپلومىنا قول جەتكىزدىم, – دەيدى يگور.
يگور وزىنە ۇكىم وقىلعان كەزدى, سول ساتتەگى كوڭىل كۇيىن ۇمىتقان جانە ول تۋرالى ەسىنە دە العىسى كەلمەيدى. قازىر ول تەك قاپاستان بوساعان ءساتىنىڭ قۋانىشىن عانا ويلاپ, اسەرىن تاۋىسا الار ەمەس. جاسى 50-گە كەلسە دە ءوزى ءۇشىن ناعىز ءومىر ەندى باستالعانداي. سوتتالاردان 5 جىل بۇرىن وتباسىنان اجىراسقان يگورعا مەكەمە اكىمشىلىگى قىزمەتكەرلەرى قولداۋ كورسەتىپ, 2012 جىلى ونىڭ بالالارىمەن بايلانىسىن جولعا قويۋعا قول جەتكىزدى. الايدا, ول بوستاندىقتا تۋعان قالاسى اقتوبەنى ەمەس, اقتاۋدى تاڭدادى. تەڭىز جاعاسىنداعى كورىكتى قالادا قالىپ, ەركىن ومىرگە ارالاسۋدى ءجون دەپ تاپقان. وعان مۇمكىندىك تە بار, ويتكەنى مەكەمە اكىمشىلىگى يگورعا جۇمىس جانە باسپانا ماسەلەسىن شەشۋگە كومەك بەرۋدە. جىلدار بويى تۇرمەدە وتىرعان ادامنىڭ ازات ومىرگە بەيىمدەلىپ, قوعامعا ءسىڭىسىپ كەتۋى ءۇشىن قىلمىستىق-اتقارۋ جۇيەسى ماڭعىستاۋ وبلىسى بويىنشا دەپارتامەنتى جان-جاقتى قولداۋ كورسەتىلەدى دەپ وتىر.
– قاماۋدان بوساتىلعان ازامات اقتاۋدا قالاتىندىعىن ايتقاندا ءبىز جۇمىس جانە باسپانا ماسەلەسىن شەشۋگە كىرىستىك. دەرەۋ جەرگىلىكتى اتقارۋ ورگاندارىمەن حابارلاستىق. سونداي-اق, بوستاندىققا شىعۋى ءۇشىن يگورعا قاجەتتى قۇجاتتاردى دايىندادىق. ءبىز ۇزاق ۋاقىت قاماۋدا بولىپ, قوعامنان وقشاۋلانعان بۇل ازاماتتىڭ بۇدان ءارى بوستاندىقتا قىلمىستى قايتالاماي, قاتەلىككە ۇرىنباي ءومىر سۇرۋىنە مۇمكىندىك بەرەمىز. شارتتى تۇردە مەرزىمىنەن بۇرىن بوسۋشىلاردى قاداعالاۋ ءبىزدىڭ ۆەدومتسۆونىڭ قۇزىرىنا جاتپاسا دا, بۇرىنعى ءوز قامقورلىعىمىزداعى جاندى قولداۋسىز قالدىرمايمىز, دەيدى قىلمىستىق-اتقارۋ جۇيەسى ماڭعىستاۋ وبلىسى بويىنشا دەپارتامەنتى باستىعىنىڭ ورىنباسارى قانات جارىلعاپوۆ.
بوساعان كۇنى-اق قاجد قىزمەتكەرلەرى يگوردى اقتاۋ قالاسىنا سەرۋەنگە شىعارىپ, تەڭىز جاعالاۋىنا قىدىرتتى.
– ءبارى وتە قاتتى وزگەرگەن. مۇندا, ءتىپتى, اۋا دا باسقا, سوندىقتان ماعان جاڭا ومىرگە بەيىمدەلۋ قاجەتتىگى اڭعارىلىپ تۇر. جان-جاعىما قاراسام تاڭعالارلىق نارسەلەر كوپ-اق. ءبىر قىزىعى, ادامداردىڭ بارلىعى تەك تەلەفونعا ءۇڭىلىپ وتىر, كۇندە كورىپ جۇرگەندىكتەن ولار ءۇشىن قورشاعان ورتاسى تاڭعالارلىق ەمەس, دەيدى جان-جاعىنا قۋانا ءارى تاڭدانا قاراعان يگور.