ماۋلەن اشىمباەۆ "حابار 24" تەلەارناسىنا بەرگەن سۇحباتىندا پاندەميامەن كۇرەس كەزەڭىندە مەملەكەتتىك باسقارۋ جۇيەسىندە قانداي ماسەلەلەر بار ەكەنى بەلگىلى بولعانىن ايتتى, دەپ حابارلايدى Egemen.kz.
سونداي-اق, سەنات توراعاسى بارلىق مەملەكەتتىك اپپارات ءۇشىن كارانتين ناعىز سىن ساعاتى بولعانىن جەتكىزىپ, وسى جايتقا ەرەكشە نازار اۋداردى. شىن مانىندە, بۇل كەزەڭدە مەملەكەتتىك ورگانداردىڭ تيىمدىلىگىنە قاتىستى كوپتەگەن پروبلەمالار تۋىنداعانى بەلگىلى. سۇحبات بارىسىندا ماۋلەن اشىمباەۆ كەيبىر شەشىمدەردىڭ دەر كەزىندە قابىلدانباۋىنا, جەكەلەگەن مەملەكەتتىك ورگاندار مەن ۆەدومستۆو قىزمەتكەرلەرى كوپ جاعدايدا ءبىر-ءبىرىنىڭ قىزمەتىن قايتالايتىنىنا, كوپتەگەن ۇدەرىستەردىڭ ەسكىرگەنىنە جانە ولاردى تسيفرلىق فورماتقا اۋىستىراتىن كەز كەلگەنىنە توقتالىپ ءوتتى.
"مەملەكەتتىك اپپاراتتى وڭتايلاندىرۋ كەرەك. جۇيەنى قايتا جاڭعىرتىپ, بۇل باعىتتا جاڭا, زاماناۋي تەحنولوگيانى قولدانۋ قاجەت. حالىققا جەدەل قىزمەت كورسەتۋگە, دەر كەزىندە شەشىم قابىلداۋعا جانە اقپاراتتى جەتكىزۋگە مۇمكىندىك بەرەتىن تسيفرلاندىرۋ جۇمىستارىن جۇيەلى تۇردە جۇرگىزگەن ءجون. باتىستا كەڭىنەن قولدانىلىپ, ءوزىنىڭ تيىمدىلىگىن دالەلدەگەن جوبالىق مەنەدجمەنت ءتاسىلىن ءبىزدىڭ مەملەكەتتىك باسقارۋ جۇيەسىنە ەنگىزۋ كەرەك. مىسالى, ۇلىبريتانيادا ۇكىمەت جوبالىق مەنەدجمەنت جۇيەسىن كەڭ اۋقىمدا جانە ماقساتقا ساي قولدانادى", – دەدى سەنات توراعاسى.
سونىمەن قاتار ماۋلەن اشىمباەۆ مەملەكەتتىك قىزمەتشىلەردىڭ كادرلىق الەۋەتىن ارتتىرۋ, جۇمىسقا بولاشاعىنان ءۇمىت كۇتتىرەتىن, بەلسەندى, باستاماشىل مامانداردى جۇمىلدىرۋ قاجەت ەكەنىنە توقتالىپ ءوتتى.
سۇحبات كەزىندە مەملەكەت باسشىسى قاسىم-جومارت كەمەل ۇلى توقاەۆتىڭ جاڭا جولداۋىندا ايتىلعان اۋىل اكىمدەرىن سايلاۋ ماسەلەسىنە قاتىستى دا سۇراق قويىلدى.
"اكىمدەردى سايلاۋ مەملەكەتتىك قىزمەتكە باستاماشىل, بەلسەندى ازاماتتاردى تارتۋ ءۇشىن قولعا الىنعان ءتيىمدى تەتىكتەردى ءبىرى ەكەنى ءسوزسىز. بۇل اكىمشىلىك-اۋماقتىق بىرلىككە باسشىلىق ەتەتىن ادامدى اۋىل تۇرعىندارىنىڭ وزدەرى تاڭداۋىنا مۇمكىندىك بەرەدى. اتالعان ءۇردىس كەلەسى جىلدان باستالاتىن شىعار. ويكەنى, پرەزيدەنتىمىز جولداۋدا الداعى جىلى بىرقاتار اكىمنىڭ مەرزىمى اياقتالاتىنىن اتاپ ءوتتى", – دەدى ماۋلەن اشىمباەۆ.
سەنات توراعاسى اۋىل اكىمدىگىنە ءوز كانديداتۋراسىن ۇسىنعىسى كەلگەن ازاماتتارعا ەشقانداي كەدەرگى كەلتىرمەي, بارىنە تەڭ مۇمكىندىك بەرۋدىڭ ماڭىزدى ەكەنىن تىلگە تيەك ەتتى.
"اكىمدىككە كانديداتتارعا ارنالعان بازالىق شارتتاردى انىقتاۋ كەرەك. ولار: ازاماتتىعى, ءبىلىمى جانە كاسىبي تاجىريبەسى. بۇل بەلسەندى جانە باستاماشىل ازاماتتارعا, ونىڭ ىشىندە جاستارعا سايلاۋعا قاتىسۋ ارقىلى ءوز قارىم-قابىلەتتەرىن كورسەتۋگە مۇمكىندىك بەرەدى. ەگەر سول وكرۋگتىڭ تۇرعىندارى كىمدى لايىقتى دەپ تانىسا, سونى سايلايدى. ءبىز بۇل باعىتتاعى زاڭ جوباسىن قاراعان كەزدە وسى ايتىلعانداردى ەسكەرەمىز", – دەدى ماۋلەن اشىمباەۆ.