قاراعاندى وبلىسىندا قۋاتتىلىعى 26 مۆت كۇن ەلەكتر ستانتسياسى پايدالانۋعا بەرىلدى. جىل سايىن كۇن پاركى شامامەن 34 ملن كۆت*ساع ەلەكتر ەنەرگياسىن وندىرەدى دەپ جوسپارلانۋدا. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتى حابارلادى, دەپ جازادى Egemen.kz.
"قازسولار 50" جشس ينۆەستورلارىنىڭ جوباسى KAZAKH INVEST ۇلتتىق كومپانياسىنىڭ قولداۋىمەن جۇزەگە اسىرىلدى. وعان 62 مىڭ فوتوۆولتايكالىق پانەلدەر ورناتىلعان كۇن پاركىنىڭ قۇرىلىسى كىرەدى. ستانتسيانىڭ جالپى جوبالىق قۇنى 5,6 ملرد تەڭگەنى قۇرادى. مامانداردىڭ ايتۋىنشا, ينۆەستيتسيالىق جوبانى ىسكە اسىرۋ اتموسفەراعا كومىرقىشقىل گازىنىڭ شىعارىندىلارىن جىلىنا 24 مىڭ تونناعا قىسقارتادى.
ەلەكتر ستانتسياسىنىڭ قۇرىلىسى 2020 جىلدىڭ مامىر ايىندا باستالدى. 120-دان استام قازاقستاندىق قىزمەتكەر جۇمىلدىرىلدى. بۇگىنگى تاڭدا كومپانيا قوسىمشا 7 تۇراقتى جۇمىس ورنىن قۇردى.
"بۇل جوبا ۇزدىك تەحنيكالىق جانە حالىقارالىق ستاندارتتارعا سايكەس جۇزەگە اسىرىلدى. جوبا ەكولوگيالىق تازا ەلەكتر ەنەرگياسىن وندىرۋگە, قورشاعان ورتانى قورعاۋعا جانە قازاقستاننىڭ ۇلتتىق ەلەكتر جەلىسىنىڭ ۇزدىكسىز جۇمىسىن قامتاماسىز ەتۋگە باعىتتالعان. بۇل ءبىزدىڭ وڭىردەگى ءۇشىنشى جوبامىز. ءبىزدىڭ ەلەكتر ستانتسيالارىمىزدىڭ جالپى قۋاتى 176 مۆت - قا جەتتى", - دەپ اتاپ ءوتتى "قازسولار 50" جشس باس ديرەكتورى ەۆگەني گرەبەننيكوۆ.
ينۆەستيتسيالىق جوبالاردى جۇزەگە اسىرۋدان باسقا, ينۆەستورلار ءوڭىردىڭ الەۋمەتتىك جوبالارىنا بەلسەندى قاتىسادى.
"جەرگىلىكتى باستامالاردى قولداۋ اياسىندا كومپانيا قاراعاندى وبلىسىنىڭ شەت اۋدانىنا $30 مىڭ كولەمىندە اقسۋ-ايۋلى اۋىلىنداعى بۇلاق سۋ كوزى ۋچاسكەسىندە دەمالىس ايماعىن سالۋ ءۇشىن قايىرىمدىلىق كومەك كورسەتۋدى جوسپارلاپ وتىر", - دەپ حابارلادى "KAZAKH INVEST" ۇك" اق ايماقتىق ديرەكتورى ءمادي يسەكەەۆ.
سونىمەن قاتار, 15 جىل ىشىندە ينۆەستورلار ءبىلىم گرانتتارىن بولۋگە جانە جاستار جوبالارىن قولداۋعا شامامەن $150 مىڭ باعىتتاۋدى جوسپارلاپ وتىر.