تۇركىستان وبلىسىندا كوروناۆيرۋس ينفەكتسياسىنىڭ الدىن الۋ ماقساتىندا 5 شىلدە مەن 1 قىركۇيەك ارالىعىندا 53 ءموبيلدى توپ كارانتين رەجيمى كەزىندە قىزمەتىن جۇزەگە اسىراتىن وبەكتىلەرگە مونيتورينگىلەۋ جۇمىستارىن جۇرگىزگەن. ناتيجەسىندە 19 489 نىسان تەكسەرىلىپ, كارانتين تالاپتارىن بۇزعان 2 181 نىسان انىقتالدى, دەپ حابارلايدى Egemen.kz.
تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ ءباسپاسوز قىزمەتى حابارلاعانداي, قر اقب كودەكسىنىڭ 425 بابىنىڭ 1 تارماعىمەن 2097 جەكە تۇلعاعا 30 اەك كولەمىندە, 67 جەكە كاسىپكەرگە, 7 زاڭدى تۇلعاعا, 10 لاۋازىمدى تۇلعاعا حاتتامالار تولتىرىلىپ 230 اەك كولەمىندە ايىپپۇل سالىنعان. جالپى, اكىمشىلىك قۇقىق بۇزۋشىلىق تۋرالى 2181 حاتتاما تولتىرىلىپ, 114 ملن 217 470 تەڭگە كولەمىندە ايىپپۇل سالىنىپ, ونىڭ 86 ملن 985 960 تەڭگەسى ءوندىرىلدى.
بۇگىنگى كۇنگە دەيىن 41 بەتاشار, 6 كەلىن ءتۇسىرۋ, 23 قىز ۇزاتۋ, 5 قۇدايى تاماق, 16 قۇدالىق, 5 بەسىك توي, 2 تۇساۋ كەسەر, سۇندەت توي, 10 ۇجىمدىق جيىن, جالپى 108 وتباسىلىق, مەرەكەلىك ءىس-شارالار انىقتالىپ, توقتاتىلدى.
وبلىس بويىنشا 1 قىركۇيەككە دەيىن قىزمەتىن قايتا باستاۋعا InfoKazakhstan.kz سايتى ارقىلى سانيتارلىق نورمالارعا سايكەستىك اكتىسىن الۋعا 27 410 ءوتىنىش كەلىپ تۇسكەن. سونىڭ ىشىندە 23 617 نىسانعا حابارلاما بەرۋ ارقىلى, 165-ىنە كورىپ تەكسەرۋ ارقىلى رۇقسات بەرىلگەن. 1220 ءوتىنىشتى قاناعاتتاندىرۋدان باس تارتىلعان جانە 75 نىسان قارالۋدا.