ەندى قىلمىستىق-اتقارۋ جۇيەسى كوميتەتىنە (قاج) ۇيالى تەلەفوننان حابارلاما جىبەرۋگە بولادى, ياعني ازاماتتار ءۇشىن WhatsApp مەسسەندجەرىندە «جەدەل جەلى» ۇيىمداستىرىلدى.
– ءبىز وسى ۋاقىتقا دەيىن جۇمىس ىستەپ تۇرعان, ياعني سەنىم تەلەفونى, ەلەكتروندى ۇكىمەت پورتالىنداعى توراعانىڭ بلوگى سەكىلدى كەرى بايلانىس قۇرالدارىنا قوسىمشا ازاماتتارمەن بايلانىسۋ ءۇشىن تاعى ءبىر كوممۋنيكاتسيا ارناسىن اشتىق. حابارلامانى قاج تاراپىنان زاڭسىزدىقتارعا تاپ بولعان كەز كەلگەن ادام جىبەرە الادى. بۇنداي بايلانىس باس بوستاندىعىنان ايىرۋ ورىندارىنداعى ادامداردىڭ قۇقىقتارىن قورعاۋ مەن ساقتاۋدى جەتىلدىرۋگە ىقپال ەتەدى, – دەيدى قاج كوميتەتىنىڭ توراعاسى جانات ەشماعامبەتوۆ.
ول ءۇشىن حابارلامانى نەمەسە مەديا-فايلداردى WhatsApp مەسسەندجەرىندەگى 8-776-677-80-77 تەلەفون نومىرىنە جىبەرەدى. ولارعا جاۋاپ وسى ءنومىر ارقىلى جولداناتىن بولادى.
قاج كوميتەتى توراعاسىنىڭ ايتۋىنشا, كەرى بايلانىستىڭ بۇل ءتۇرى ازاماتتاردىڭ وتىنىشتەرى مەن شاعىمدارىن قاراۋدى جەڭىلدەتەدى. بۇل جۇمىس ءۇشىن وپەراتور بەكىتىلگەن, ول ونلاين تۇرىندە تۇسكەن حابارلامالارعا تالداۋ جانە مونيتورينگ جۇرگىزىپ, كوميتەتتىڭ ءتيىستى قىزمەتتەرىنە جولدايدى. بىردە-ءبىر ءوتىنىش جاۋاپسىز قالمايدى. ازاماتتاردىڭ وتىنىشتەرى جان-جاقتى ءارى وبەكتيۆتى قارالۋ ءۇشىن مۇددەلى ورگانداردىڭ جانە باس بوستاندىعىنان ايىرۋ ورىندارىندا قوعامدىق باقىلاۋ جۇرگىزەتىن ۇيىمداردىڭ وكىلدەرى شاقىرتىلاتىن بولادى.