ەۋروپا ليگاسىنىڭ العاشقى ىرىكتەۋ كەزەڭىندە «قايرات» جەڭىسكە جەتسە, «ورداباسى» جەڭىلىس تاپتى.
الماتىلىق «قايرات» ورتالىق ستاديوندا ارمياننىڭ «نوا» كومانداسىن 4:1 ەسەبىمەن ويسىراتا جەڭىپ, ەۋروپا ليگاسىنىڭ ەكىنشى اينالىمىنا شىقتى.
ويىننىڭ سەگىزىنشى مينۋتىندا رەسەيلىك جارتىلاي قورعاۋشى كيريلل بوردىڭ ارقاسىندا «نوا» كۇتپەگەن جەردەن العا شىققانىمەن, «قايرات» ويىنشىلارى تەز ەسىن جيىپ, اراعا ءتورت مينۋت سالىپ قىرعىزستان ۇلتتىق قۇراماسىنىڭ جارتىلاي قورعاۋشىسى گۇلجىگىت الىقۇلوۆ گول سوقتى. ەسەپ – 1:1.
ەسەپ تەڭەسكەننەن كەيىن الاڭدا بەلسەندى بولعان «قايرات» ويىنشىلارى ءبىرىنشى تايمنىڭ سوڭىندا العا شىقتى. 35 مينۋتتا 36 جاستاعى برازيليالىق شابۋىلشى ۆاگنەر لاۆ الماتىلىقتار ساپىندا العاشقى گولىن سوقتى.
ەكىنشى تايمدا لاۆتىڭ قانجىعاسى تاعى مايلاندى. 70 مينۋتتا ۆاگنەر ەسەپتى 3:1-گە جەتكىزسە, 94 مينۋتتا ۆاگنەردىڭ سول قاپتالدان اسىرعان دوبىنا ءبىرىنشى بولىپ باسپەن سوققى جاساعان ەسەولا ويىننىڭ نۇكتەسىن قويدى. قورىتىندى ەسەپ – 4:1, «قايرات» كەلەسى كەزەڭدە!
«قايرات» (قازاقستان) – «نوا» (ارمەنيا) 4:1 (2:1)
گول سوققاندار: بور, 8 – 0:1; گۇلجىگىت الىقۇلوۆ, 12 – 1:1; لاۆ, 35 – 2:1; لاۆ, 70 – 3:1; ەسەولا, 94 – 4:1.
دوپتى يەلىك ەتۋ – 50% – 50%; سوققى – 15:11; ءدال سوققى – 9:3; بۇرىشتاما – 6:3; وفسايد – 6:2; سارى قاعاز – 2:2; ويىنشى الماستىرۋ – 3:3.
ال «ورداباسى» بولسا, ءوز الاڭىندا رۋمىنيانىڭ «بوتوشاني» كومانداسىنا 1:2 ەسەبىمەن جول بەرىپ, ەۋروپا ليگاسى ءتۋرنيرىن ەرتە اياقتادى. 12 مينۋتتا «ورداباسى» العا شىعۋعا مۇمكىندىك الدى, بىراق سەنەگالدىق جارتىلاي قورعاۋشى ابدۋللاي دياكاتەنىڭ 11 پەنالتيدەن ءمۇلت كەتتى. «سەن گول سوقپاساڭ, ساعان سوعادى» دەگەن فۋتبولدىڭ تانىمال ماقالى وسى جەردە تاعى ءبىر رەت ەسكە ءتۇستى. سەبەبى, ويىننىڭ 25 مينۋتىندا ء«بوتوشانيدىڭ» اۆستريالىق قورعاۋشىسى مارسەل حولتسمانن گول سوعىپ, كومانداسىن العا شىعاردى. «وردا» 31 مينۋتتا ەسەپتى تەڭەستىردى. كوماندا ويىنشىلارى وڭتۇستىك افريكالىق جارتىلاي قورعاۋشى مەي ماحلانگۋدىڭ ارقاسىندا ءبىر جەلپىنىپ قالىپ ەدى, اراعا ەكى مينۋت سالىپ حورۆاتيالىق شابۋىلشى ماركو دۋگاندجيچ ەسەپتى 2:1 جەتكىزىپ, رۋمىنيالىقتاردى كەلەسى كەزەڭگە شىعاردى.
«ورداباسى» (قازاقستان) – «بوتوشاني» (رۋمىنيا) 1:2 (1:2)
گول سوققاندار: حولتسمانن 25 – 0:1; ماحلانگۋ, 31 – 1:1; دۋگاندجيچ, 33 – 1:2.
دوپتى يەلىك ەتۋ – 48% – 52%; سوققى – 15:10; ءدال سوققى – 3:4; بۇرىشتاما – 5:4; وفسايد – 1:2; سارى قاعاز – 2:5; ويىنشى الماستىرۋ – 3:3.