وراق بارىسى ويداعىداي

جاز ىستىق, قۋاڭ بولسا دا ەگىس تاناپ­تارىن وڭدەۋگە مۇمكىندىك بولدى. جاۋىننىڭ ۇزاق ۋاقىت تامباۋى بىرقاتار اۋدانداردىڭ استىق ءتۇسىمىن ازايتتى. دەسە دە ماماندار تەك وپتيميستىك بولجامدار ايتۋدا. ماسەلەن, تامىزدىڭ ورتاسىندا وبلىستىق اكىمدىكتىڭ وتىرىسىندا وبلىستىق اۋىل شارۋاشىلىعى جانە جەر قاتىناستارى باسقارماسىنىڭ باستىعى ەربولات بەكشەنوۆ بيىلعى استىققا شارۋالار ەرتە كىرىسكەنىن ايتا كەلىپ, گەكتار بەرەكەسى 24,7 تسەنتنەردەن اينالاتىنىن جەتكىزدى. ال وبلىس اكىمى قۇمار اقساقالوۆ وراق بارىسى تۋرالى ۇكىمەتتە جاسا­عان بايانداماسىندا گەكتار ونىم­دىلىگى 14 تسەنتنەردەن عانا اينالىپ جاتقانىن ايتتى. «بۇگىنگى تاڭ­دا استىقتىڭ 14,7 پايىزى جينال­دى. بۇل بارلىق 2 988,5 مىڭ گەكتاردىڭ 439,3-ءى گەكتارى دەگەن ءسوز. باستىرىلعان استىق كولەمى 498,6 مىڭ توننا», دەدى ول. بىلتىرعى وراق ماۋسىمىندا گەكتار بەرەكەسى 18 تسەنتنەردەن اينالعان ەدى. بىراق ورتاشا كورسەتكىش تۋرالى ايتۋعا ءالى ەرتە, شىعىمدىلىعى ءداستۇرلى تۇردە جوعارى بولاتىن اۋداندار استىق ورۋعا ەندى عانا جاپپاي كىرىسىپ جاتىر.

سولتۇستىك قازاقستانداعى بار­لىق ەگىس القابى – 4,2 ملن گەكتار, سونىڭ 2,9 ملن گەكتارىنا بيداي ەگىلەدى. ال مايلى داقىلدار كولەمى – 922 مىڭ گەكتار. اكىم ازىرگە 22,5 مىڭ گەكتاردىڭ ونىمدەرى عانا جينالعانىن ايتتى. بۇل بارلىق مايلى داقىلدار ەگىلگەن القاپتىڭ 2,4 پايىزى عانا. قازىر گەكتار بەرەكەسى 9 تسەنتنەردەن بولىپ وتىر ەكەن. بارلىق باستىرىلعان مايلى داقىلدار كولەمى – 18,6 مىڭ توننا.

ءوڭىر باسشىسىنىڭ ايتۋىنشا, وبلىس ديقاندارى ورتاشا ەسەپپەن تاۋلىگىنە 160-170 مىڭ گەكتاردىڭ استىعىن جينايدى. بۇل وزىق تەحنيكالار ارقىلى قول جەتكىزىلىپ وتىرعان تابىس. بيىلعى وراققا 7,5 مىڭ كومباين قاتىسۋدا. سونىڭ ىشىندە 3,3 مىڭى جوعارى ءونىمدى, الىس شەتەلدىڭ تەحنيكالارى. اس­تىق تاسىمالىنا 5,2 مىڭ جۇك اۆتوماشينالارى جۇمىلدىرىلعان. جالپى, بيىل قىزىلجار ءوڭىرىنىڭ ديقاندارى 34,9 ملرد تەڭگەگە 1458 بىرلىك جاڭا تەحنيكا ساتىپ العان. سونىڭ ىشىندە 100-دەن اسا قىمبات كومبايندار بار.

ايتا كەتەتىن جايت, بيىل سول­تۇس­تىكتىك ديقاندار يمپورت الماس­تىرۋ اياسىندا قاراقۇمىق القابىن 2,5 ەسەگە, اسبۇرشاقتى 30 پايىزعا ۇلعايتتى. سونىڭ ناتيجەسىندە بۇرىنعى 1,7 مىڭ گەكتاردىڭ ورنىنا 4,2 مىڭ گەكتارعا قاراقۇمىق, بۇرىنعى 41 مىڭ گەكتاردىڭ ورنىنا 54 مىڭ گەكتارعا اسبۇرشاق ەگىلدى.

قۇمار اقساقالوۆ ۇكىمەتتەگى بايانداماسىندا ديقاندار مينەرالدى تىڭايتقىشتار سەبۋدى الداعى جىلى 10 پايىزعا دەيىن ارتتىرىپ, تاعى 30 مىڭ توننا ساتىپ الۋدى كوزدەپ وتىرعانىن جەتكىزدى. جەردەن الا بەرۋدى عانا ويلاماي, وعان بەرۋ دە قاجەت ەكەنىن قازىر ديقاندار دا تۇسىنگەن. جاڭا تەحنيكا ساتىپ الۋ بىلتىرعىمەن سالىستىرعاندا 20 پايىزعا, ال اقشاعا شاققاندا 1,5 ەسە كوبەيگەن. ال 2019 جىلى 23 ملرد تەڭگەگە 1264 بىرلىك تەحنيكا الىنعان ەدى.

ديقانعا وراق كەزىندە قولبايلاۋ بولاتىن ماسەلەنىڭ ءبىرى – جانار-جاعارماي جەتىسپەۋشىلىگى. ۇزاق جىلدار بويى وسى ماسەلە شەشىلمەي, ءدال وراق باستالعاندا كۇرت قىمباتتاپ ديقاننىڭ جۇيكەسىن جۇقارتاتىن. وسىعان بايلانىستى ق.اقساقالوۆ: «بيىل وبلىسقا 75 مىڭ توننا ارزانداتىلعان ديزەل ءبولىندى. ونىڭ ءبىر ءليترىنىڭ باعاسى – 172 تەڭگە. ءسويتىپ, ججم قاجەتتىلىگىن 84 پايىزعا وتەيمىز. قالعانىن ديقاندار وزدەرى تاۋىپ جاتىر. ءبىر سوزبەن ايتقاندا, جانار-جاعارماي بويىنشا تۇيتكىل جوق», دەدى.

وبلىستاعى استىق ساقتاۋ قوي­ما­لارىنىڭ سىيىمدىلىعى 6 ملن 600 مىڭ توننا. بۇل ءوڭىردىڭ قاجەت­تىلىگىن تولىق قامتاماسىز ەتەدى. قازىر قامبالار استىق قابىلداۋعا دايىن تۇر. «جالپى, قاجەتتى ءىس-شارالاردىڭ بارلىعى ۋاقىتىندا جانە تولىق اتقارىلدى. بۇل وراق ناۋقانىن بەلگىلەنگەن مەرزىمدە وتكىزۋگە مۇم­كىندىك بەرەدى. بيىل بيدايدىڭ باعاسى تاعى دا ءوسۋى مۇمكىن. سون­دىقتان نانعا قولجەتىمدى باعانى ۇستاۋ ماقساتىندا تۇراقتاندىرۋ قورىنا قاجەتتى 3 مىڭ توننا ۇن ساتىپ الىندى», دەدى وبلىس اكىمى.

سولتۇستىك قازاقستان وبلىسى