جاڭا وقۋ جىلىنىڭ جاڭالىعى جاقسىلىققا باستايدى

بۇگىندە ءبىلىم بەرۋ مەن دەنساۋلىق ساقتاۋ سالاسىن جەمقورلىق جايلاماعان مەملەكەتتەردىڭ دامۋى قارقىندى ەكەنىن كوز كورىپ, قۇلاق ەستىپ ءجۇر. ەندىگىدە الەمنىڭ وزىق ەلدەرىنىڭ جاقسى ۇردىستەرىن جانىمىزعا جاقىن تۇتساق, ورتالىق ازيادا عىلىم مەن ءىلىم جارىستىرعان ناعىز كوشباسشى ەلگە اينالارىمىز ءسوزسىز. بۇل ءۇشىن كەز كەلگەن سالادا شىن مانىندەگى تازالىق كەرەك. ءبىز ءسوز ەتكەلى وتىرعان ءبىلىم بەرۋ سالاسىناعى تسيفرلى جۇيە – سول جارقىن بولاشاققا باستايتىن داڭعىل جولدىڭ ءبىر تارماعى عانا.

«HR-Process» – پەداگوگيكالىق مەكە­مەلەردەگى بوس جۇمىس ورنىنا ورنالاسۋعا ءوتىنىش بەرۋ جانە ونى وڭدەۋ بارىسىن اۆتوماتتاندىرۋعا, ۇمىتكەرلەر مەن بوس ورىنداردىڭ دەرەكتەر قورىن قۇرۋعا, سونىمەن قاتار زاماناۋي اقپاراتتىق تەح­نولوگيالاردى قولدانۋ نەگىزىندە پە­دا­گوگيكالىق قۇرامدى ىرىكتەۋدىڭ تيىم­دىلىگىن ارتتىرۋعا ارنالعان تسيفرلى جۇيە.

وقۋشىلار سارايىندا وتكەن ءىس-شا­رادا شىمكەنت قالاسىنىڭ اكىمى مۇرات ايتەنوۆ جاڭا جۇيەنى تانىستىردى.

«مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس, شىم­كەنتتە بارلىق سالانى اۆتوماتتاندىرۋ جانە تسيفرلاندىرۋ بويىنشا بىر­قاتار جۇمىس جۇرگىزىپ جاتىرمىز. وسى سايت ارقىلى وقىتۋشى لاۋازىمىنا ۇمىتكەرلەر ونلاين رەجىمدە جۇمىس تابا الادى. پەداگوگيكالىق قۇرامدى ىرىك­تەۋدى اۆتوماتتاندىرۋدىڭ ماقساتى مەن ارتىقشىلىعى – ۇمىتكەردى تاڭداۋدا مەريتوكراتيا, جاريالىلىق جانە ايقىندىق قاعيدالارىن ساقتاۋ. جۇيە كونكۋرستىق ادىسكە نەگىزدەلەدى, پەداگوگيكالىق قىز­مەتكە ۇزدىك كادرلاردى ىرىكتەپ الۋعا مۇم­­كىندىك بەرەدى, جەمقورلىقتىڭ الدىن الادى. مۇعالىم بولىپ جۇمىسقا ور­­نا­­لاسقىسى كەلەتىن مامان پورتالعا ءوتى­نىش قالدىرادى. ول ادامنىڭ تالاپقا ساي­كەستىگى بالدىق شكالا بويىنشا انىق­تا­لادى. تسيفرلى جۇيە مۇعالىمنىڭ بىلىك­تى­لىگى قانداي ەكەنىن 75 پايىزعا انىق­تاپ بە­رەدى. ال مەكتەپتە قۇرىلاتىن مەم­لەكەتتىك كوميسسيا تۇپكىلىكتى شەشىمگە 25 پايىزداي عانا اسەر ەتەدى», دەيدى قالا اكىمى.

ارنايى كوميسسيا قۇرامىنا ءبىلىم بەرۋ ۇيىمىنىڭ ديرەكتورى, تاجىريبەلى ءپان مۇعالىمدەرى, پسيحولوگتار كىرەدى. الەۋمەتتىك جەلىلەردە كونكۋرستىق كوميسسيا وتىرىسىنىڭ ونلاين ترانسلياتسياسى جۇرگىزىلەدى. كونكۋرستىڭ بارلىق ناتيجەلەرى سايتتا اشىق جاريالانادى.

قازىر www.hr-process.kz سايتىندا پەداگوگتەر مەن قىزمەتكەرلەردى جۇمىس­قا قابىلداۋ بويىنشا 137 ءبىلىم بەرۋ ۇيى­مى تىركەلگەن. وندا 78 بوس جۇمىس ورنى بار ەكەنى كورسەتىلگەن.

اتالعان جوبادان تىس ءبىلىم سالاسىن­داعى جەمقورلىق ءىس-ارەكەتتەرىن جويۋ ءۇشىن قالا اكىمدىگى بىلەك سىبانا كىرىسىپ وتىر. ءوزى شەتەلدىڭ ىرگەلى جوعارى وقۋ ورنىن تامامداعان شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان قالا مەكتەپتەرىندەگى جەمقورلىقتى ءبىر­جولا بولدىرماۋدى كوزدەيتىنىن جەت­كىزدى. قالا اكىمىنىڭ ءبىرىنشى ورىنباسارى شىمكەنت­تە مەكتەپكە جۇمىسقا كىرۋ ءۇشىن اقشا سۇ­را­عانداردى اشكەرەلەۋ كەرەك دەپ سا­ناي­دى. وسى ماقساتتا ءوز تەلەفونىن قالدىرىپ, كەلەڭسىز جايتتى حابارلاعان تۇرعىنداردىڭ تالابىنا قۇلاق اسپاق.

ء«بىر وزگەرىس بولۋى كەرەك. مەكتەپكە اقشا بەرمەسەڭ, جۇمىسقا تۇرا المايسىڭ. مۇعالىم بولىپ پا, جوق تازالىق ساقتاۋشى بولىپ پا؟ ماڭىزدى ەمەس. وسىلاي بولىپ كەلدى, وسىلاي كەتە بەرەدى دەپ ويلايتىندارىمىز دا بار. ومىرىڭىزدە تىم بولماسا ءبىر رەت بەلسەندى بولىڭىزشى. شىمكەنت قالاسىندا مەكتەپكە جۇمىسقا كىرۋ ءۇشىن اقشا سۇراسا, تومەندەگى تەلەفونعا حابارلاسىڭىز. تەلەفون: 8(700)7007091. قىسىلماي كورگەنىڭىزدى بايانداي بەرىڭىز. ءسىز «ساتقىن» ەمەسسىز, زاڭدى سىيلاپ تۇرسىز! مىڭ اسقانعا ءبىر توسقان مىن­دەتتى تۇردە بولادى. اينالاڭىزدىڭ وزگەر­گەنىن كۇتپەڭىز. بۇل بەكەرشىلىك. ءوزىڭىز وزگەرىڭىز», دەدى الەۋمەتتىك جەلىدەگى تىكەلەي ەفيردە شىڭعىس مۇقان.

مەكتەپتەر وقۋ جىلىنا دايىن

مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس, شىم­كەنتتە ءبىلىم ۇيىمدارىندا جاڭا وقۋ جى­­­لىنا دايىندىق جۇمىستارى قار­قىن­­­­دى جۇرگىزىلىپ جاتىر. وسى رەتتە شىم­­­كەنت قالاسىنىڭ اكىمى مۇرات اي­تە­­نوۆ س.ەرۋباەۆ اتىنداعى №24 مەكتەپ- لي­­­­تسە­­يىنە بارىپ, 2020-2021 وقۋ جىلىنا دا­­­يىندىق جۇمىستارىنىڭ بارىسىن پى­سىق­تادى.

قالادا جاڭا وقۋ جىلى 742 ءبىلىم بە­رۋ مەكەمەسى جانە 320 مىڭعا جۋىق ءبى­لىم الۋشىمەن باستالعالى وتىر. قالا اكى­­مىنىڭ ايتۋىنشا, بيىل 13 مەكتەپ (6 جاڭا, 7 قوسىمشا) جانە 2 ونەر مەكتەبىنىڭ قۇرى­لىسى جۇرۋدە. جىل سوڭىنا دەيىن 5 100 ورىندىق 8 مەكتەپتىڭ (4 جاڭا, 4 قوسىمشا) جانە 300 ورىندىق 2 ونەر مەكتەبىنىڭ قۇرىلىسى اياقتالادى. ال 5 مەكتەپتىڭ قۇ­رىلىسى (2 جاڭا, 3 قوسىمشا) 2021 جىلى اياقتالادى. ناتيجەسىندە اپات­­­تى مەكتەپتەر سانى 2-دەن 1-گە, ءۇش اۋى­­­­سىمدى مەكتەپتەر سانى 19-دان 14-كە ازايادى.

«بيىل 1-سىنىپقا 24 مىڭنان اسا بالا كەلەدى دەپ جوسپارلانۋدا. ءبىلىم مەكە­مەلەرىنىڭ جىلىتۋ جۇيەلەرىن جوندەۋ جۇ­مىستارى تولىق اياقتالدى. جەكە قازان­دىقپەن جىلىتىلاتىن 25 مەكەمەگە 4 793 توننا قاتتى جانە 190 توننا سۇيىق وتىن جەتكىزىلىپ جاتىر. قازىر اعىم­داعى جوندەۋ جۇمىستارى اياقتالىپ, 15 مە­كەمەگە كۇردەلى جوندەۋ جۇرگىزىلۋدە. 17 مەكتەپكە سپورت الاڭدارى, 36 مەكتەپكە ىشكى اجەتحانالار ورناتىلۋدا. سونداي-اق سوڭعى ۇلگىدەگى بەينەباقىلاۋ كامەرالارى مەن 30 مەكتەپكە تۋرنيكەتتەر ورناتۋ ءۇشىن مەملەكەتتىك ساتىپ الۋ جۇمىستارى جۇرگىزىلىپ جاتىر», دەدى مۇ­رات دۇيسەنبەك ۇلى.

سونىمەن قاتار جاڭا وقۋ جىلىندا ساتىپ الىناتىن 11-سىنىپ وقۋلىقتارى مەن قالعان سىنىپتار ءۇشىن قوسىمشا وقۋلىقتاردىڭ 60 پايىزى تاسىمالدان­دى. بۇل تۋرالى ءبىلىم باسقار­ماسىنىڭ باسشىسى جانات تاجيەۆا ما­لىمدەدى. باس­قارما باسشىسىنىڭ ايتۋىنشا, 1-سى­نىپقا 24 مىڭنان اسا وقۋشىنى قابىلداۋ جوسپارلانعان. بۇ­گىنگە دەيىن 17 401 ءوتىنىش بەرىلگەن. قۇجات­تار ەلەكتروندى ۇكىمەت Egov.kz پورتالى جانە mektep.shymkent.edu.kz سايتى ارقىلى قابىلدانىپ جاتىر.

«شىمكەنت قالاسى جاڭا وقۋ جىلىن 745 ءبىلىم بەرۋ مەكەمەسىمەن باستاعالى وتىر. ولاردىڭ قاتارىندا مەكتەپ, با­لاباقشا, كوللەدج بەن قوسىمشا ءبىلىم بەرۋ مەكەمەلەرى بار. قالاداعى 172 مەكتەپكە 18 مىڭ جاڭا پارتا, سوڭعى ۇلگىدەگى بەينەباقىلاۋ كامەرالارىن ورناتۋ جوس­پارلانۋدا. ال ءبىلىم مەكەمەلەرىنىڭ جى­لىتۋ جۇيەلەرىن جوندەۋ جۇمىستارى تو­لىق اياقتالدى», دەدى باسقارما باسشىسى.

بيىل الەمدى جايلاعان ىندەت سالدارىنان قاۋىپسىزدىك شارالارىن ەسكەرىپ, ءبىلىم بەرۋ ۇيىمدارى جۇمىستارىن ونلاين وقۋ فورماتىندا جۇرگىزەتىنى بارشاعا بەلگىلى. ەندىگى باستى ماسەلە – تەحنيكا تاپشىلىعى مەن ينتەرنەت مۇقتاجدىعىن جويۋ. بۇل ماقساتتا جەرگىلىكتى اكىمدىك, قالالىق ءبىلىم باسقارماسى تاراپىنان بىرقاتار ناقتى جۇمىستار قولعا الىندى.

باسقارما باسشىسىنىڭ ايتۋىنشا, ا.قۇنانباەۆ اتىنداعى دارىندى با­لا­لارعا ارنالعان مامانداندىرىلعان گيم­نازيا مەكتەبى مەن «تسيفرلى قازاق­ستان» باعدارلاماسى اياسىندا دارىندى بالالارعا ارنالعان مامانداندىرىلعان IT ليتسەي-ينتەرناتى جانە كلاستەر سانا­تىنداعى 5 «IT مەكتەپ-ليتسەيى» قايتا قۇرۋ نەگىزىندە اشىلماق. قالالىق ءبى­لىم باسقارماسىنا قاراستى ءبىلىم ۇيىم­دارىنداعى جالپى كومپيۋتەر سانى 20 405 ەكەنى بەلگىلى بولدى. وتكەن شىلدە ايىندا 10 975 دانا كومپيۋتەر ساتىپ الىنسا, قوسىمشا قاجەتتىلىككە بايلانىستى جەرگىلىكتى بيۋدجەت ەسەبىنەن قىركۇيەكتىڭ بىرىنە دەيىن تاعى 5 مىڭعا جۋىق داناسىن جەتكىزۋ جوسپارلانعان.

ءبىلىم سالاسى تولىق تسيفرلى جۇيەگە كوشتى

شىمكەنت قالاسى ءبىلىم باسقارماسى­نىڭ ءباسپاسوز قىزمەتىنىڭ دەرەگىنە ساي­كەس جەرگىلىكتى اكىمدىكتىڭ قولداۋىمەن جا­ھاندىق جەلىنىڭ جىلدامدىعىن ۇل­عايتۋ جۇمىستارى جۇيەلى جۇرگىزىلۋدە. قا­شىقتان وقىعان جاعدايدا ينتەرنەت­كە مۇقتاج وقۋشىلارعا مەملەكەت بيۋد­جەتى ەسەبىنەن «قازاقتەلەكوم» اقتسيو­نەرلىك قوعامىنىڭ قالالىق فيليالى ارقىلى ارنايى تاريفتەگى امبەباپ-نو­مىرلەردى ۇلەستىرۋدىڭ مۇمكىندىكتەرى دە قا­راستىرىلدى. سونداي-اق توپتىق كونفەرەنتسيا ترانسلياتسياسىن ارنايى سەرۆەر ورناتۋ ارقىلى ۇيىمداستىرۋ كوزدەلگەن.

«وسى وقۋ جىلىندا بالالاردىڭ ونلاين رەجىمدە ساباق الۋىن قامتاماسىز ەتۋ ءۇشىن قالاداعى بارلىق ءبىلىم بەرۋ ۇيىمى جوعارى جىلدامدىقتى ينتەرنەتپەن قامتىلىپ جاتىر. وسى باعىتتاعى جۇمىستاردى كۇشەيتۋ ماقساتىندا قالا اۋماعى بويىنشا 11 بازالىق ستانسا ورناتۋ ورىندارى ايقىندالىپ, قازىر ءتيىستى جەر تەلىمدەرىنىڭ كوورديناتتارى بەلگىلەندى جانە مەملەكەتتىك اكتىلەرى راسىمدەلدى. سونىمەن قاتار وزگە دە قۇ­جات­تارى زاڭداستىرىلىپ, وسى اپتانىڭ اياعىنا دەيىن ەلەكتر ەنەرگياسىمەن قام­تاماسىز ەتۋ ماسەلەسى ناقتىلانادى. كە­لەسى اپتانىڭ سوڭىنا دەيىن بايلانىس وپەراتورلارى تاراپىنان ءتيىستى بازا­لىق ستانسالاردى ورناتۋ جۇمىستارى جۇرگىزىلىپ, نىسان تولىق ىسكە قوسىلادى. قالا اۋماعىنان انىقتالعان 11 جەر تەلىمى Google maps كارتاسىندا بەلگىلەنگەن. ولار جوسپار بويىنشا ن.نازارباەۆ داڭعىلى, ارعىنبەكوۆ پەن ايشا ءبيبى كوشەسىندە, قايتپاس, شىمسيتي-اسار قيىلىسى, قايناربۇلاق شاعىن اۋدانى, اسار شاعىن اۋدانىنداعى ىشكى اينالما جولى, شىمكەنت – الماتى تاس جولى­نان دوستىق شاعىن اۋدانى باعىتىنا قا­راي, تولەمەتوۆ – وتەگەنوۆ كوشەلەرىنىڭ قيى­­لىسىنا قويىلادى», دەيدى قالالىق تسيفر­لاندىرۋ باسقارماسى باسشىسى­نىڭ مىندەتىن اتقارۋشى دوسان الىبەكوۆ.

بۇگىندە شىمكەنت قالاسىنا قاراستى مەكتەپتەر «Bilim Iand – Onlinemektep.orq» ينتەرنەت پلاتفورماسىندا قا­شىق­تان وقىتۋعا تولىعىمەن دايىن. ءبى­لىم مەكەمەلەرى تولىعىمەن ينتەرنەت جە­لىسىنە قوسىلعان. قالا سىرتىنداعى ەلدى مەكەندەردە جانە ءبىلىم ۇيىمدارىندا ينتەرنەت جىلدامدىعىن 8 مب/س-تان 12 مب/س-قا دەيىن ۇلعايتۋ جونىندە ارنايى تاپسىرما بەرىلىپ, ءتيىستى جۇمىستار جۇرگىزىلۋدە.

سونىمەن قاتار مۇعالىمدەر مەن وقۋ­شىلارعا زاڭنامالاردا بەلگىلەنگەن تار­تىپتەگى عالامتور قىزمەتىنە قارالعان قار­­­­­جى ەسەبىنەن «قازاقتەلەكوم» اق ار­قى­­لى ينتەرنەت جەلىسىنە قوسىلعان ارنايى «امبەباپ-نومىرلەر» جانە قاجەتتى روۋتەرلەر بەرىلەدى. قالاداعى جالپى 30 كوللەدجدە قاشىقتان وقىتۋ «Smart Nation College» ينتەرنەت پلاتفور­ما­سىن­دا باستالادى. ءبىلىم بەرۋ پرو­تسەسى كە­زىندە پەداگوگيكالىق, ءىت, الەۋ­مەت­تىك-گۋ­مانيتارلىق باعىتتارداعى ما­مان­دىق­تار قاشىقتان وقىتىلادى.

وسى ورايدا سالالىق باسقارما وكىلدەرى جەكە سەكتورلارعا ينتەرنەت جەلىسىن ورناتاردا اتا-انالارعا بىرقاتار بايلانىس وپەراتورىنىڭ قىزمەتىن ۇسىنىپ وتىر. شىمكەنت قالاسىندا كابەل ارقىلى ين­تەرنەت ورناتۋمەن قازاقتەلەكوم, ترانس­تەلەكوم جانە كارتەل كومپانيالارى اينالىسادى. ءۇش وپەراتوردىڭ دا قىزمەت كورسەتۋ ساپاسى جاقسى.

«شالعاي ەلدى مەكەندەردە وقيتىن وقۋ­شى­لارعا ينتەرنەت قانشالىقتى قول­­جە­تىمدى بولماق؟» دەگەن سۇراق جاڭا وقۋ جىلى قارساڭىندا بارشامىزدى الاڭ­داتارى انىق. تۇيتكىلدى ساۋالعا اتالعان باسقارمانىڭ وكىلى جاۋاپ بەردى.

«بۇل ماسەلە – قالا اكىمىنىڭ قاتاڭ باقىلاۋىندا. شاھارداعى شالعاي تۇر­عىن الاپتاردى قىسقا مەرزىمدە سىمسىز ينتەر­نەتپەن قامتاماسىز ەتۋ شارا­لا­رى قابىلدانۋدا. ياعني جەكە ينۆەس­تور­لاردى تارتۋ ەسەبىنەن انتەننا-ماتچ­تا­لىق قۇرىلىستار سالىنادى جانە ول جەرگە بازالىق ستانسالار ورناتىلادى. بازالىق ستانسا ورناتۋ مۇمكىندىگى بول­ماعان جاعدايدا قامتۋ ايماعىن ۇل­عاي­تۋ جۇمىستارى جۇرگىزىلەدى. قالا اۋما­عىن­داعى 105 شاعىن اۋدان مەن تۇرعىن الاپتار ينتەرنەت جەلىسىمەن قامتاماسىز ەتىلگەن. ونىڭ ىشىندە ءموبيلدى ينتەرنەتكە – 74, سىمدى ينتەرنەتكە – 79, تال­شىقتى-وپتيكالىق بايلانىس ارناسىنا 49 شاعىن اۋدان قول جەتكىزگەن. بۇگىندە ينتەرنەت جەلىسىنە قاتىناۋ مۇمكىندىگى بار ءۇي شارۋاشىلىقتارىنىڭ ۇلەسى 90,7 پايىزدى قۇرايدى. ونىڭ ىشىندە 98,5 پا­يىزى ءموبيلدى كەڭ جولاقتى بايلانىس­قا, ال 21,8 پايىزى سىمدى كەڭ جولاقتى باي­لانىسقا قوسىلعان. ال ينتەرنەت جەلىسىن پايدالانۋشىلار ۇلەسى 80 پايىزدى, تىر­كەلگەن ينتەرنەت ابونەنتتەرىنىڭ سانى 75,5 پايىزدى قۇرايدى. بۇعان قوسا 20 شاعىن اۋداندا ينتەرنەت جەلىسى, ال 16 تۇرعىن الاپتا ءموبيلدى ينتەرنەت ساپاسى ناشار ەكەنىن دە اتاپ وتۋگە ءتيىسپىز», دەيدى دوسان الىبەكوۆ.

جۋىردا شاھار باسشىلىعى كارانتين­دىك شارالاردىڭ ۇزارتىلۋىنا بايلانىستى جەرگىلىكتى بيۋدجەتتى وڭتايلاندىرۋ ناتي­جەسىندە 11,2 ملرد تەڭگە ۇنەمدەلگەنىن جاريالاعان. وسى قازىنا قارجىسىنىڭ ءبىراز بولىگى, ناقتىراق ايتقاندا 989,8 ملن تەڭگەنى مەكتەپتەر مەن مەكتەپ-ينتەرناتتاردى ماتەريالدىق-تەحنيكالىق جاڭعىرتۋعا جۇمساۋ جونىندە شەشىم قابىلدانىپ, مۇنى قالالىق ءماسليحات دەپۋتاتتارى ءبىراۋىزدان ماقۇلداعان.

جاڭا تەحنولوگيا – زامان تالابى

جىل سايىن كۇز مەزگىلىندە ەلىمىزدەگى ءبىلىم بەرۋ مەكەمەلەرىندە مەكتەپ فورماسى مەن وقۋلىق ماسەلەسى تۋىندايتىنى جاسىرىن ەمەس. بيىل عالامدىق ىندەت سالدارىنان وقۋشىلار جاڭا وقۋ جىلىندا مەكتەپكە بارا المايتىن بولدى. سوندىقتان قازىر مەكتەپ فورماسىنا دەگەن قاجەتتىلىك جوق. ال شىمكەنت قالالىق ءبىلىم باسقارماسى وقۋشىلار مەكتەپ وقۋلىقتارىنان تارشىلىق كورمەيدى دەپ سەندىرۋدە. دەگەنمەن جاڭا ماۋسىمدا ونلاين وقۋدىڭ قاجەتتى قۇرالدارىنا دەگەن سۇرانىس ارتا تۇسپەك. سەبەبى بالالاردا ينتەرنەت جەلىسىنە قوسىلاتىن سمارتفوندار بولماسا, ونلاين وقۋعا قوسىلا المايدى.

كورشى ەلدەرمەن شەكارا تارس جابىل­عاسىن ەلدەگى تەحنيكا باعاسىنىڭ قۇنى دا اسپانداپ كەتتى. ونى ساتىپ الۋعا كەز كەلگەن اتا-انانىڭ قالتاسى كوتەرە بەرمەيتىنى تاعى بار. وسىنى ەسكەرگەن قالالىق ءبىلىم باسقارماسى الەۋمەتتىك از قامتىلعان وت­باسىلاردىڭ بالالارىنا تەحنيكا جاعى­نان ءبىر رەتتىك كومەك كورسەتۋدى باستاپ كەتتى.

ءۇشىنشى مەگاپوليستە الەۋمەتتىك وسال توپتاعى وتباسى بالالارىنىڭ سانى 35 798-ءدى قۇرايدى. ونىڭ ىشىندە از قام­تىلعان وتباسى بالالارى – 28 445, جەتىم بالالار – 685, ەرەكشە ءبىلىم بەرۋدى قاجەت ەتەتىن بالالار – 6 668. جانات ارىسبەكقىزى اتالعان قاجەتتىلىكتى قامتۋ ماقساتىندا 35 798 كومپيۋتەرلىك تەحنيكا (ونىڭ ىشىندە, كومپيۋتەر – 3 470, نوۋتبۋك – 31 556, پلانشەت – 772) جانە 35 798 ءموبيلدى بايلانىس مودەم الۋ ءۇشىن رەسپۋبليكالىق بيۋدجەتكە سۇرانىس بەرىلگەنىن مالىمدەدى.

قالانىڭ باس ۇستازىنىڭ ايتۋىنشا, قاشىقتان ءبىلىم الۋعا قاجەتتى تەحنيكالىق قۇرالى جوق 40 مىڭعا جۋىق وقۋشى انىقتالعان. ولاردىڭ باسىم كوپشىلىگىنىڭ اتا-انالارى جاڭا وقۋ جىلى باستالعانعا دەيىن پلانشەت نەمەسە ينتەرنەت جەلىسىنە قوسىلاتىن قالتا تەلەفون الىپ بەرۋگە كەلىسكەنىن ايتادى.

«ۇكىمەتتىڭ №64 قاۋلىسىنا سايكەس, الەۋمەتتىك كومەكتى قاجەت ەتەتىن 42 368 بالاعا 1 271 040 تەڭگە قارجى قارالىپ, جاڭا وقۋ جىلىندا «مەكتەپكە جول» اكتسياسى اياسىندا ءار بالاعا 30 مىڭ تەڭگە كولەمىندە ءبىر رەتتىك كومەك بەرىلەدى. بيىل مەكتەپ فورماسىن كيمەۋگە رۇقسات ەتىلدى. جاڭا وقۋ جىلىنا دايىندىقتى باستاعان اتا-انالارعا ايتاتىنىم, وسى قاراجاتتى العان سوڭ, ەگەر بالاڭىزدىڭ قاشىقتان وقۋعا سمارتفون نەمەسە نوۋتبۋك سىندى تەحنيكالىق مۇمكىندىكتەرى بولماسا, الدىمەن بالاڭىزعا قاجەتتى قۇرالداردى الىپ بەرۋگە اسىقساڭىزدار», دەيدى جانات ارىسبەكقىزى.