بيىل جاھاندى جايلاعان پاندەميا جاعدايىندا ەلىمىزدەگى تۇتىنۋشىلاردىڭ قۇقىقتارى قالاي قورعالۋدا؟
ساۋدا جانە ينتەگراتسيا مينيسترلىگىنىڭ تۇتىنۋشىلاردىڭ قۇقىن قورعاۋ كوميتەتى مەن ونىڭ اۋماقتىق دەپارتامەنتتەرىنە العاشقى جارتىجىلدىقتا 5682 ءوتىنىش تۇسكەن ەكەن. ال بىلتىر بۇل كورسەتكىش 6 مىڭنان استام بولعان. بيىلعى وتىنىشتەردىڭ ىشىندە جازباشا – 1874, جەدەل جەلىگە – 2393, Telegram-بوت ارقىلى – 670, ءمينيستردىڭ بلوگىنا 64 تۇتىنۋشى ءوتىنىش جازسا, اتالعان كوميتەت توراعاسىنىڭ بلوگىنا – 180, ال جەكە قابىلداۋلاردا 501 ءوتىنىش قارالعان.
تۇتىنۋشىلاردىڭ قۇقىقتارىن قورعاۋ كوميتەتىنىڭ باسقارما باسشىسى ءاليحان شاكەنوۆتىڭ ايتۋىنشا, وتىنىشتەردىڭ باسىم بولىگى بولشەك ساۋداعا بايلانىستى – 1637 ءوتىنىش, اۆياتاسىمالدار – 1568 شاعىم, كولىك قىزمەتى – 597, تۇرعىن ءۇي كوممۋنالدىق شارۋاشىلىعى – 350 ءوتىنىش, تۇرمىستىق قىزمەت كورسەتۋ – 318, تۋريستىك قىزمەتتەر – 275, ەلەكتروندىق ساۋدا – 156, قارجىلىق قىزمەتتەر – 78, قوعامدىق تاماقتانۋ – 58, مەديتسينالىق قىزمەتتەر – 48, بايلانىس قىزمەتى – 45, باسقالارى – 552.
ازاماتتاردىڭ ءوتىنىش بەرۋىنىڭ نەگىزگى سەبەپتەرىنە توقتالار بولساق, ساۋدا ورىندارىنىڭ تاۋار ساتىپ الىنعان كۇننەن باستاپ 14 كۇن ىشىندە ونى ايىرباستاۋدان نەمەسە قايتارۋدان باس تارتۋى, تاۋاردىڭ ساپاسىزدىعى, قىزمەتتەردىڭ/جۇمىستاردىڭ ساپاسىز ورىندالۋى (اۆتوكولىكتى, تەحنيكانى جوندەۋ, جيھاز جاساۋ بويىنشا ساپاسىز قىزمەتتەر), تاڭداۋدىڭ شەكتەلۋى (بەلگىلى ءبىر پروۆايدەردىڭ ينتەرنەتىنە قوسىلۋعا ماجبۇرلەۋ), الاياقتىق.
2020 جىلدىڭ ءبىرىنشى جارتىجىلدىعىندا تۇتىنۋشىلاردىڭ قۇقىقتارىن قورعاۋ كوميتەتىنىڭ اۋماقتىق دەپارتامەنتتەرى جالپى سوماسى 25 229 252 تەڭگەنى قۇرايتىن (24 659 802 تەڭگە – شەتەلدە دەمالۋ ءۇشىن, 569 450 تەڭگە ەل ىشىندە دەمالۋعا) كورسەتىلمەگەن تۋريستىك تۋرلاردىڭ قارجىسىن قايتارۋ بويىنشا كەلىپ تۇسكەن 93 ءوتىنىشتى قارادى, ونىڭ ىشىندە 10 966 581 تەڭگە تۇتىنۋشىلارعا قايتارىلدى. سونداي-اق كەيبىر وتىنىشتەر بويىنشا تاراپتار ساپار كۇنىن اۋىستىرۋ تۋرالى كەلىسىمگە كەلدى. ەڭ كوپ سۇرانىسقا يە تۋريستىك باعىتتار: تۇركيا, مىسىر, ەۋرووداق ەلدەرى, ىشكى تۋريزم بويىنشا – الماتى جانە تۇركىستان وبلىسى.
2020 جىلدىڭ 6 ايىندا وتكىزىلمەگەن ءىس-شارالارعا بايلانىستى جالپى سوماسى 709 620 تەڭگەنى قۇرايتىن 23 شاعىم كەلىپ ءتۇستى, ونىڭ ىشىندە 449 620 تەڭگە قايتارىلدى. بيلەتتەر نۇر-سۇلتان قالاسىنداعى «رۋكي ۆۆەرح» توبىنىڭ, ل.ۋسپەنسكايانىڭ كونتسەرتتەرىنە, بەلگورودتاعى «حالىق شىعارماشىلىعى» فەستيۆالىنە, «استانا وپەرا» تەاترىنىڭ قويىلىمدارىنا جانە تاعى دا باسقا ءىس-شارالارعا ticketon.kz سايتى, ياندەكس پوشتاسى ارقىلى جانە كونتسەرت زالدارىنىڭ كاسسالارىندا ساتىلىپ الىنعان.
مەيرامحانالاردا, ءدامحانالاردا جانە تاعى دا باسقا تاماقتانۋ ورىندارىندا ءارتۇرلى وتباسىلىق مەرەكەلەردىڭ وتكىزىلمەۋىنە بايلانىستى 9 304 000 تەڭگەدەن استام قاراجاتتى قايتارۋ ماسەلەسى بويىنشا 50 ءوتىنىش كەلىپ ءتۇستى. ونىڭ ىشىندە 7 895 000 تەڭگە قايتارىلدى, قالعان وتىنىشتەر بويىنشا جۇمىس جۇرگىزىلۋدە.
ايتا كەتۋ كەرەك, 2020 جىلدىڭ 6 ايىندا ءارتۇرلى سالا بويىنشا تۇتىنۋشىلارعا جالپى 85 ملن تەڭگەدەن استام قاراجاتتى قايتارۋعا كومەك كورسەتىلدى, ونىڭ ىشىندە جازباشا وتىنىشتەر بويىنشا – 42 820 370 تەڭگە, جەكە قابىلداۋلار قورىتىندىسى بويىنشا – 18 710 994 تەڭگە, جەدەل جەلىگە تۇسكەن وتىنىشتەر بويىنشا 24 427 332 تەڭگە تۇتىنۋشىلارعا قايتارىلدى.