قازاق ەلى قاي كەزدە دە توي تويلاعاندى, تويعا بارعاندى جاقسى كورگەن عوي. بۇگىنگە دەيىن «بار تاپقانىمىزدى تويعا شاشىپ» كەلدىك. ەندى بۇرىنعىداي شاشىلۋدى قازىرگى پاندەميا جاعدايى كەشىرمەيدى. الەمدى جاۋلاعان ىندەت جاعادان الىپ تۇرعاندا, ەل ازاماتتارى ۆيرۋسقا دا قاراماي توي تويلاپ, ارتى قايعىلى وقيعامەن اياقتالىپ جاتقانىن كوزىمىز كوردى, قۇلاعىمىز ەستىدى.
ءيا, ارينە توي – اعايىننىڭ باسىن قوساتىن, باۋىرمالدىقتى نىعايتاتىن, ءار وتباسىنىڭ قۋانىشىن پاش ەتەتىن سالتانات. بىراق توي-جيىندى, ءجون-جوسىقسىز شاشىلۋدى, ىسىراپشىلدىقتى دوعاراتىن كەز كەلدى دەپ ەسەپتەيمىن. قازىرگى قالىپتاسقان جاعدايدا جيعان-تەرگەنىمىزدى تويعا ەمەس, بىلىمگە, جاڭالىققا جانى قۇمار جاستاردىڭ عىلىم جولىنا تۇسۋگە, سولاردى ىنتالاندىرۋعا نەمەسە باسپانالى بولۋىنا جۇمساعانىمىز ابزال.
دەي تۇرعانمەن, توي تويلاۋعا تۇبەگەيلى قارسى ەمەسپىن. تەك تويدىڭ فورماتىن وزگەرتۋ كەرەك. ايتپەسە, الەمدە توي وتكىزۋدەن جارىسقا تۇسپەي-اق باس بايگەنى الاتىن حالقىمىز تويعا زاڭمەن تىيىم سالىنسا دا, تويلايتىندار تابىلادى. سوندىقتان توي يەلەرى بۇرىنعىداي 500-600 ادام ەمەس, تەك ەڭ جاقىن دەگەن ەت-جاقىندارىن عانا شاقىرىپ, ءزاۋلىم-ءزاۋلىم تويحانالاردا ەمەس, ءۇي جاعدايىندا وتكىزسە دەيمىن. ايتپەسە تويعا كەلەتىن 500-600 قوناقتىڭ جارتىسىن كەيدە ءوزىمىز دە تانىماي جاتامىز.
كەيىنگى جىلدارى ەلىمىزدە تويدى قۋانىش ءۇشىن ەمەس, ءبىر-بىرىمەن جارىسۋ ءۇشىن وتكىزەتىندەر كوبەيدى. بۇل جاعدايى بار, قالتالى ازاماتتارعا تۇك قيىن شارۋا ەمەس. ال جۇرتتان قالمايىن دەپ تىراشتانىپ, قوراسىنداعى سوڭعى مالىن ساتىپ, ول جەتپەسە بانكتەن كرەديت الىپ توي جاسايتىندار قانشاما. توي تويلاۋ ارقىلى داميتىن بولساق, قازاقستان الدەقاشان الپاۋىت ەلدەردى شاڭ قاپتىرىپ كەتەتىن ەدى. دامىعان ەلدەردىڭ قاتارىنا توي-جيىن ارقىلى ەمەس, ءبىلىمدى ۇرپاق تاربيەلەۋ ارقىلى عانا قوسىلاتىنىمىزدى تۇسىنسەك دەيمىز.
جۋىردا پرەزيدەنتىمىز قاسىم-جومارت كەمەل ۇلىنىڭ ءوزى دە: «توي قۋالايتىن ەمەس, وي قۋالايتىن كەزەڭمەن بەتپە-بەت كەلدىك. بۇل ءداۋىر – اقىل-ويدىڭ, عىلىم مەن ءبىلىمنىڭ, ەڭبەكتىڭ ءداۋىرى!» دەپ ايتقان بولاتىن. مەن دە پرەزيدەنتتىڭ ايتقانىن تولىق قولدايمىن.
باقتيار ارتاەۆ,
افينا وليمپياداسىنىڭ چەمپيونى