جاقىندا شاردارا اۋدانىندا ماقتا وندىرىسىمەن اينالىساتىن «ۇزىن اتا ماقتا» جشس زاۋىتى ءوز جۇمىسىن باستادى. جىلىنا 40-45 مىڭ توننا تازارتىلماعان ماقتانى وڭدەيتىن بۇل زاۋىت قۇرىلىسى ۇزىن اتا ەلدى مەكەنىندە 2012 جىلى باستالعان بولاتىن. قۇرىلىستىڭ جالپى قۇنى 900 ميلليوننان استام تەڭگەنى قۇراپ, ونىڭ ىشىندە «بيزنەستىڭ جول كارتاسى-2020» مەملەكەتتىك باعدارلاماسى اياسىندا 700 ميلليوننان استام تەڭگەنى (5 ملن. اقش دوللارى) «ەۋرازيالىق بانك» اق ارقىلى جىلدىق 7 پايىزبەن 7 جىل مەرزىمگە الىپتى.
جاقىندا شاردارا اۋدانىندا ماقتا وندىرىسىمەن اينالىساتىن «ۇزىن اتا ماقتا» جشس زاۋىتى ءوز جۇمىسىن باستادى. جىلىنا 40-45 مىڭ توننا تازارتىلماعان ماقتانى وڭدەيتىن بۇل زاۋىت قۇرىلىسى ۇزىن اتا ەلدى مەكەنىندە 2012 جىلى باستالعان بولاتىن. قۇرىلىستىڭ جالپى قۇنى 900 ميلليوننان استام تەڭگەنى قۇراپ, ونىڭ ىشىندە «بيزنەستىڭ جول كارتاسى-2020» مەملەكەتتىك باعدارلاماسى اياسىندا 700 ميلليوننان استام تەڭگەنى (5 ملن. اقش دوللارى) «ەۋرازيالىق بانك» اق ارقىلى جىلدىق 7 پايىزبەن 7 جىل مەرزىمگە الىپتى.
– وڭتۇستىك قازاقستان وبلىسىندا يندۋستريالاندىرۋ كارتاسىنا ەنگىزىلگەن جالپى سوماسى 448 ملرد. تەڭگەنى قۇرايتىن 150 جوبا جۇزەگە اسىرىلىپ, سونىڭ ارقاسىندا وبلىس اۋماعىندا 19 مىڭ جاڭا جۇمىس ورنى اشىلادى, – دەيدى وقو وڭىرلىك كاسىپكەرلەر پالاتاسىنىڭ ديرەكتورى نۇرجان التاەۆ. – ۇستىمىزدەگى جىلدىڭ ەكىنشى جارتى جىلدىعىندا وبلىستان يندۋستريا جانە جاڭا تەحنولوگيالار مينيسترلىگىنە جالپى سوماسى 600 ملرد. تەڭگەنى قۇرايتىن 104 جوبا قوسىمشا جىبەرىلدى. 2010-2012 جىلدارى وبلىس اۋماعىندا 58 جوبا ىسكە قوسىلىپ, 5 236 جاڭا جۇمىس ورنى قۇرىلعان. 2013 جىلى 50 جاڭا جوبانى ىسكە قوسىپ, 4 569 جاڭا جۇمىس ورنى اشىلادى دەپ جوسپارلانۋدا. ۇستىمىزدەگى جىلدا 8 ءىرى جوبا ىسكە قوسىلىپ 598 جاڭا جۇمىس ورنى اشىلعان.
ال, «ۇزىن اتا ماقتا» جشس باسقارما توراعاسى باقىتجان تىلەۋجانوۆ بۇل زاۋىت تابيعي گازبەن جۇمىس ىستەپ, سونىڭ ەسەبىنەن شىعارىلاتىن ءونىمنىڭ وزىندىك قۇنىنىڭ تومەندەۋىنە سەپتىگىن تيگىزەتىن جالعىز جوبا ەكەنىن ايتادى. «ەلىمىز بويىنشا وسىنداي جوبادا سالىنعان ءوندىرىس ورىندارى از. 2012-2013 جىلدىڭ ماقتا جيناۋ ماۋسىمىندا زاۋىتتا ورناتىلعان قۇرال-جابدىقتى كاليبرلەۋ ماقساتىندا تازارتىلماعان ماقتانىڭ 5 مىڭ تونناسى ءوندىرىلدى. وندىرىلگەن ماقتانىڭ نۇسقاسى رەسەي فەدەراتسياسى, قىتاي, ۋكراينا مەملەكەتتەرىنە جىبەرىلىپ, جوعارى ساپاسىنا ۇزدىك باعا بەرىلدى», دەيدى زاۋىت باسشىسى.
مەكەمەدە تۇراقتى 200-دەن استام جاڭا جۇمىس ورنى قۇرىلسا, ماقتا جيناۋ ماۋسىمىندا مىڭنان استام جاڭا جۇمىس ورنى اشىلادى دەپ جوسپارلانۋدا. ۇستىمىزدەگى جىلى زاۋىت باسشىلىعى 5 مىڭ توننادان استام ماقتا وڭدەۋدى جوسپارعا قويدى. سونداي-اق, رەسەي, قىتاي جانە ەۋروپا ەلدەرىمەن ماقتانى جەتكىزۋ تۋرالى كەلىسىمشارتتارعا قول قويىلعان. الداعى ۋاقىتتا مەكەمە باسشىلىعى ءوندىرىستى ۇلعايتىپ ماقتا مايىن, جەم قوسپالارىن, پيلەتتەردى شىعارۋدى, سونداي اق, توقىما ءوندىرىسىن قۇرۋدى جوسپارعا ەنگىزدى. سونىمەن قاتار, وقو كاسىپكەرلەرگە قىزمەت كورسەتۋ ورتالىعى مەكەمەگە ەكسپورتتى قولداۋ باعدارلامالارى اياسىندا كومەك كورسەتپەك.
جالپى العاندا, وڭتۇستىك قازاقستان وبلىسى بويىنشا اق التىندى ەگۋدە شاردارا اۋدانى الدا كەلەدى. ەندى ولار ماقتالارىن تازارتۋ ءۇشىن الىسقا سابىلىپ شارشامايدى. بيىل تاناپتاردان 55 مىڭ توننا ماقتا جيناپ العان شاردارالىقتار ەندى ءوز ونىمدەرىن جاڭادان اشىلعان زاۋىتتا وڭدەيتىن بولادى. ءوندىرىس سوڭعى ۇلگىدەگى قىتاي تەحنولوگياسىمەن جابدىقتالىپ, جۇمىس تولىعىمەن اۆتوماتتاندىرىلعان. زاۋىتتىڭ ماقتا قابىلدايتىن 30-دان اسا تسەحى جۇمىس ىستەيدى.
– «ۇزىن اتا ماقتا» زاۋىتى – وبلىسىمىزدىڭ يندۋستريالاندىرۋ كارتاسىنا ەنگىزىلگەن نىسان. زاۋىتتىڭ ىسكە قوسىلۋى – اۋداننىڭ الەۋمەتتىك-ەكونوميكالىق جاعىنان وسۋىنە ەلەۋلى ۇلەس قوسادى, – دەيدى شاردارا اۋدانىنىڭ اكىمى قامىتبەك ايتورەەۆ.
ورالحان ءداۋىت,
«ەگەمەن قازاقستان».
وڭتۇستىك قازاقستان وبلىسى,
شاردارا اۋدانى.
––––––––––––––––
سۋرەتتەردى تۇسىرگەن
ارمان ابدىراش ۇلى.