ءبىزدىڭ بۇل شاعىن ماقالامىزعا ارقاۋ بولىپ وتىرعان ازامات – 10 جىلعا باس بوستاندىعىنان ايىرىلىپ, بۇگىندە قىزىلوردا قالاسىنداعى زك169/5 مەكەمەسىندە جازاسىن وتەپ جاتقان باقىتجان ەسەنباەۆ دەگەن وتانداسىمىز. ونىڭ قولىنان شىققان كوزدىڭ جاۋىن الاتىن ءتۇرلى كەمەلەر ماكەتى تالايدى تامساندىرماي قويمايدى. بۇگىندە شەبەردىڭ «قورجىنىندا» كەمە, ۇشاق جانە باسقا دا بۇيىمدار بار.
قىزىلوردا وبلىسى بويىنشا قىلمىستىق-اتقارۋ جۇيەسى دەپارتامەنتى (قاجد) تاراپىنان جولدانعان مالىمەتتە باقىتجان زك169/5 مەكەمەسىنە 2017 جىلى جازاسىن وتەۋگە كەلگەن. ەرەكشە ونەر يەسىنىڭ بۇل كاسىپكە قالاي كەلگەنى جونىندە قىزىلوردا وبلىسى بويىنشا قاجد ۇسىنعان اقپاراتتا باقىتجان بىلاي دەپتى: «مەن بۇل مەكەمەگە تۇسكەن جىلى الدىمەن كىرپىش زاۋىتىندا جۇمىس ىستەدىم. جۇمىسى اۋىر بولدى. كەيىن تۇراقتى ءبىر ىسپەن اينالىسىپ, ونىڭ ۇستىنە ءتيىستى جالاقىمدى الىپ وتىرايىن دەدىم. بالا كۇننەن كەمەنىڭ كاپيتانى بولۋدى ارمانداۋشى ەدىم. سول ارمانىمدى شاعىن كەمە ماكەتىن جاساۋ ارقىلى جۇزەگە اسىرعاندايمىن. ءبىر كۇنى اعاش تسەحىندا جۇمىس ىستەپ جاتقان جىگىتتەردىڭ ىسىنە قاراپ, قاتتى قىزىقتىم. نەگىزى, قولونەرمەن اينالىسۋ ادامعا ەرەكشە اسەر سىيلايدى. ءار قولدان شىققان دۇنيەنى بار ىنتاڭمەن بەرىلىپ جاساپ, ناتيجەسىندە جۇرت قىزىعارلىقتاي كەرەمەت بۇيىم شىقسا, ەڭبەگىڭنىڭ جەمىسىن كورگەندەي بولاسىڭ».
باقىتجان كەمەنى جاساۋ ءۇشىن الدىمەن قاعازعا ونىڭ ماكەتىن سىزىپ الادى ەكەن. ودان كەيىن ونىڭ قاڭقاسىن ازىرلەۋ ءۇشىن ءتيىستى اعاش دايىندايدى. «كەمە جاساۋعا كوكتەرەك اعاشىن تاڭداپ العان دۇرىس. ويتكەنى ول يىلگىش, كەمە جاساۋ ءۇشىن تاپتىرمايتىن اعاش. بۇل جۇمىس اسا سابىرلىق پەن توزىمدىلىكتى قاجەت ەتەدى. ءبىر كەمە جاساۋ ءۇشىن شامامەن ون كۇن مەن ءبىر ايدىڭ اراسىندا ۋاقىت كەتەدى. ياعني شاعىن كەمەنى 7-10 كۇندە, ال ۇلكەن كەمەنى جاساۋ ءۇشىن ءبىر اي ۋاقىت كەتۋى مۇمكىن. وندا دا قولىڭدا قاجەتتى ماتەريالدار بولسا», دەپتى شەبەر.
«باقىتجان ەسەنباەۆتىڭ جۇمىسىنا قاراپ وتىرىپ, ونىڭ ءوز كاسىبىن اسا سۇيىسپەنشىلىكپەن اتقاراتىنىن بايقادىق. قولىنا العان ءار اعاشقا مۇقيات قاراپ شىققان شەبەر كەمەگە تاڭداپ العان اعاشتارىن ارنايى قۇرالدارىمەن تازارتۋدى باستاپ كەتتى. اعاشتى تەگىستەپ شىقان سوڭ, كەرەك ولشەم بويىنشا كەسىپ, ءبىر-بىرىنە جاپسىرىپ شىقتى. ءتىپتى كەمەنىڭ جەلكەنىن تاڭداۋعا دا اسا ءبىر ەرەكشەلىكپەن ءمان بەرەدى ەكەن. جەلكەندى كوبىنە كەمەنىڭ تۇسىنە قاراپ تاڭداپ الاتىن كورىنەدى. بىرنەشە بولشەگى مەن وتە كوپ قۇرامنان تۇراتىن كەمەنى جاساپ جاتقان باقىتجاننىڭ قولى قولىنا جۇقپايدى. بىرەسە سىزىپ, ولشەم بىرلىكتەرىن سالىستىرسا, ەندى بىردە ونى كەسىپ, ءبىر-بىرىنە ءتۇيىستىرىپ كورىپ جاتادى. ءبىر قىزىعى, كەمە جاساۋ ءۇشىن ەشقانداي شەگە مەن بۇراندانىڭ قاجەتى جوق ەكەن. ءيا, شەبەردىڭ تۋىندىسى تامساندىرماي قويمايدى», دەلىنگەن قىزىلوردا وبلىسى بويىنشا قاجد ۇسىنعان اقپاراتتا.
الداعى ۋاقىتتا ءتۇرلى كۇردەلى كەمە قۇراستىرۋعا بەل بۋعان باقىتجاننىڭ قولىنان بۇگىندە 40-قا جۋىق سۋ كولىگىنىڭ ماكەتى دايىندالىپتى. شەبەرلىك پەن تاباندىلىقتى تالاپ ەتەتىن بۇل كاسىپتى ءناسىپ ەتكەن جازاسىن وتەۋشىنىڭ جەكە ومىرىنە دە توقتالا كەتەيىك.
ب.ەسەنباەۆ قىزىلوردا وبلىسى, سىرداريا اۋدانى, تەرەڭوزەك كەنتىندە دۇنيەگە كەلگەن. اتا-اناسىنىڭ بىرەۋدىڭ الا ءجىبىن اتتاما دەپ وسىرگەن ءتالىم-تاربيەسىنە قۇلاق اسپاعانىنا قازىر قاتتى وكىنەدى ەكەن. بوستاندىقتا جۇرگەندە جەكە شارۋا قوجالىعىن باسقارىپ, كاسىبىن دوڭگەلەتىپ جۇرگەن كاسىپكەر سول ءبىر جاڭساق ىسكە نە ءۇشىن بارعانىن كۇنى بۇگىنگە دەيىن ءوزى دە تولىق تۇسىنبەيتىن كورىنەدى.
جۇبايى قايتىس بولعاننان كەيىن جالعىز قىزىمەن جانە قارت اناسىمەن قالعان باقىتجان جان كۇيزەلىسىن باستان وتكەرگەن ءتارىزدى. ايتپەسە, اقىلشى اناسى بار, قىر گ ۇلىندەي قۇلپىرعان قىزى مەن شاعىن كاسىبى بار ازاماتقا ەسىرتكى ساتىپ نە بولدى؟ ون جىلعا كەسىلگەن جىگىتتىڭ ەندىگى ارمانى – بوستاندىققا امان-ەسەن شىعىپ, قارت اناسى مەن قىزىنا قامقور بولىپ, ەل قاتارلى ءومىر ءسۇرۋ.