"استانا موتورس" كومپانياسى ماقتاارالدىقتارعا ءۇي جيھازدارىن سىيعا تارتتى

بۇگىن ءۇي جيھازدارىنىڭ العاشقى لەگى ورگەباس اۋىلىنا كەلىپ, قۇرىلىس جۇمىستارى اياقتالعان بىرنەشە ۇيگە تاراتىلدى. قايىرىمدىلىق ءىس-شاراسىنا تۇركىستان وبلىسى اكىمىنىڭ ورىنباسارى مەيىرجان مىرزاليەۆ, اۋدان اكىمى باقىت اسانوۆ جانە كومپانيانىڭ باس ديرەكتورى بەكنۇر نەسىپباەۆ قاتىسىپ, تۇرعىنداردى ۇلكەن قۋانىشقا بولەدى.

"اۋدانىمىزعا كەلگەن قيىنشىلىقتى جەڭۋگە كومەكتەسىپ, دەمەۋشىلىك جاساپ جاتقان كاسىپكەرلەرىمىز وتە كوپ. مىنە, بۇگىن ەلىمىزدەگى برەندتەردىڭ ءبىرى "استانا موتورس" كومپانياسى سۋ باسقان ورگەباس جانە فيردوۋسي اۋىلدارىنىڭ تۇرعىندارىن ءۇي جيھازدارىمەن قامتاماسىز ەتۋدە. ول ءۇشىن كومپانيانىڭ باسشىلىعى مەن ۇجىمىنا اۋدان تۇرعىندارىنىڭ اتىنان شىن جۇرەكتەن العىس ايتامىن", دەدى اۋدان باسشىسى باقىت ناسىرحان ۇلى.

جيناقتالعان ءۇي جيھازدارىن وتاندىق "ديانا 3د" كاسىپورنى وندىرگەن. ەكى كىسىلىك كەرەۋەت, ايناسى بار ءۇش ەسىكتى شكاف, كەرەۋەت جانىندا تۇراتىن 2 تۋمبا جانە ماتراتستان تۇراتىن جيناقتالعان جيھازدىڭ جالپى قۇنى 118 600 تەڭگەنى قۇرايدى. 

"مىڭداعان ادامدار كەنەتتەن ۇيلەرىنەن جانە تولىققاندى جۇمىس ىستەۋ مۇمكىندىگىنەن ايىرىلدى دەگەن قايعىلى حابار ءبىزدى قاتتى الاڭداتتى. بۇگىنگى تاڭدا سۋ باسقان اۋىلدارداعى ءومىر مەملەكەت پەن جەكە قاراجاتتاردىڭ ەسەبىنەن قايتا قالپىنا كەلتىرىلۋدە. "استانا موتورس" ءوز كەزەگىندە قاراجات ءبولىپ, جاڭا ۇيگە قونىستانۋشىلارعا ءۇي جيھازدارىن تارتۋ ەتۋدە. بۇل سۋ اپاتىنان زارداپ شەككەن ءاربىر وتباسى ءۇشىن جاڭا باقىتتى وقيعانىڭ باستاماسى بولسىن!" دەدى كومپانيانىڭ باس ديرەكتورى بەكنۇر نەسىپباەۆ.

ايتا كەتەيىك, اعىمداعى جىلدىڭ 1 مامىر كۇنى وزبەكستان رەسپۋبليكاسىنداعى "ساردوبا" سۋ قويماسىنىڭ اپاتقا ۇشىراۋىنان ماقتاارال اۋدانىنداعى 5 اۋىلدى سۋ شايىپ كەتكەن بولاتىن.

قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ۇشىن Telegram جەلىسىندە بىزگە جازىلىڭىز.