سەناتور: بيۋدجەت قاراجاتىنىڭ ءتيىمدى يگەرىلۋىن قامتاماسىز ەتۋ اسا ماڭىزدى

سەناتور سىرىم اۋدانىنا ارنايى بارىپ, جۇرگىزىلىپ جاتقان جول جوندەۋ جۇمىستارىنىڭ جاي-كۇيىمەن تانىستى. سونداي-اق, مەكتەپتەردىڭ جاڭا وقۋ جىلىنا دايىندىق جانە كوشەلەردى اباتتاندىرۋ ماسەلەلەرىنە ەرەكشە كوڭىل ءبولدى.

سونىمەن قاتار ناريمان تورەعاليەۆ اۋداندىق اۋرۋحانادا بولىپ, مەديتسينالىق قىزمەتكەرلەرمەن كەزدەستى. جەرگىلىكتى مامانداردىڭ ايتۋىنشا, قازىرگى تاڭدا اۋدان بويىنشا كوروناۆيرۋس ىندەتىن جۇقتىرعان ناۋقاستاردىڭ ءبارى دەرلىك ەمدەلىپ شىققان. بۇگىندە تەك 7 ازامات ەم-دوم قابىلداپ جاتىر. دەپۋتات اۋداندىق اۋرۋحانادا جانە جەرگىلىكتى ءدارىحانالاردا پاندەميامەن كۇرەس ءۇشىن قاجەتتى ءدارى-دارمەكتىڭ جەتكىلىكتى ەكەنىن دە ءوز كوزىمەن كورىپ شىقتى.

ودان بولەك, سەناتور جىمپيتى-كەناشى سۋ قۇبىرىنىڭ قۇرىلىسىمەن تانىستى. بۇل نىساننىڭ ۇزىندىعى 77 شاقىرىمدى قۇرايدى. جالپى قۇنى – 2,2 ميلليارد تەڭگە. ناريمان تورەعاليەۆ ايماقتا اۋىز سۋ ماسەلەسى وتە وزەكتى ەكەنىنە نازار اۋدارىپ, بۇل جوبانىڭ اۋدان ءۇشىن ماڭىزى زور ەكەنىن جەتكىزدى.

اتالعان سۋ قۇبىرى «وڭىرلەردى دامىتۋ» مەملەكەتتىك باعدارلاماسى اياسىندا رەسپۋبليكا بيۋدجەتىنىڭ ەسەبىنەن سالىنىپ جاتىر. بۇگىندە قۇرىلىس جۇمىستارى اياقتالىپ قالعان. قازىردىڭ وزىندە سورعى ستانساسىنىڭ عيماراتى دايىن تۇر.

ايتا كەتەيىك, كەناشى ەلدىمەكەنىندە ءۇش سكۆاجينا بار. اتالعان سۋ كوزدەرى شاعىرلىوي, بۇلان, جامبىل, قوسوبا اۋىلدارىن اۋىز سۋمەن قامتاماسىز ەتۋگە مۇمكىندىك بەرەدى. وسى رەتتە سىرىم اۋدانىندا ەلەكتر جەلىسىن تارتۋ جۇمىستارى دا قارقىندى جۇرگىزىلىپ جاتقانىن اتاپ وتكەن ءجون.

اۋداندا اتقارىلىپ جاتقان جۇمىستاردىڭ جاي-كۇيىمەن تانىسىپ شىققان سەناتور جەرگىلىكتى بيلىك وكىلدەرىنە بيۋدجەت قاراجاتىنىڭ ءتيىمدى جۇمسالۋىن ۇدايى باقىلاۋدا ۇستاۋ كەرەكتىگىن ايتتى. دەپۋتات اسىرەسە, ءوڭىر تۇرعىندارى ءۇشىن الەۋمەتتىك ماڭىزى بار نىسانداردى سالۋ بارىسىندا باقىلاۋ جۇمىستارىن كۇشەيتۋ قاجەتتىگىن دە تىلگە تيەك ەتتى.

قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ۇشىن Telegram جەلىسىندە بىزگە جازىلىڭىز.