بىرىككەن ۇلتتار ۇيىمى كۇنىن اتاپ ءوتۋ شەڭبەرىندە كەشە وسى حالىقارالىق بەلدى ۇيىممەن بىرلەسىپ مەملەكەتتىك باسقارۋ اكادەمياسىندا ەلىمىز سىرتقى ىستەر مينيسترلىگىنىڭ ۇيىمداستىرۋىمەن «بۇۇ-نىڭ قازاقستانعا كەلۋىنە – 20 جىل» تاقىرىبىندا دوڭگەلەك ۇستەل بولىپ ءوتتى.
بىرىككەن ۇلتتار ۇيىمى كۇنىن اتاپ ءوتۋ شەڭبەرىندە كەشە وسى حالىقارالىق بەلدى ۇيىممەن بىرلەسىپ مەملەكەتتىك باسقارۋ اكادەمياسىندا ەلىمىز سىرتقى ىستەر مينيسترلىگىنىڭ ۇيىمداستىرۋىمەن «بۇۇ-نىڭ قازاقستانعا كەلۋىنە – 20 جىل» تاقىرىبىندا دوڭگەلەك ۇستەل بولىپ ءوتتى.
اتالعان شاراعا حالىقارالىق ۇيىمداردىڭ, ديپلوماتيالىق كورپۋستىڭ وكىلدەرى, قازاقستان پرەزيدەنتى جانىنداعى مەملەكەتتىك باسقارۋ اكادەمياسىنىڭ تىڭدارماندارى, عىلىم مەن اكادەميالىق توپ, بۇۇ جانە باق ماسەلەلەرى جونىندەگى ساراپشىلار قاتىستى. سەمينارعا قاتىسۋشىلار الدىندا ەلىمىز سىرتقى ساياسات ۆەدومستۆوسى باسشىسىنىڭ ورىنباسارى الەكسەي ۆولكوۆ ءسوز الىپ, سىرتقى ىستەر ءمينيسترى ەرلان ىدىرىسوۆتىڭ قۇتتىقتاۋ حاتىن وقىپ بەردى.
سونداي-اق بۇۇ-نىڭ قازاقستانداعى تۇراقتى وكىلى ستيۆەن تۋلل ءوزىنىڭ قۇتتىقتاۋ سوزىندە ادام قۇقىقتارىنا نەگىزدەلگەن بۇۇ ماقساتى بەيبىتشىلىكتى ارتتىرۋ بولسا, ونىڭ جۇزەگە اسىپ جاتقاندىعىنان حاباردار ەتتى. تۇراقتى وكىل وسى رەتتە «قازاقستان-2050» ستراتەگياسىنىڭ قابىلدانۋى بولاشاقتى ناقتى باعدارلاۋ ەكەندىگىنە توقتالىپ, قازاقستاننىڭ جاھاندىق دەڭگەيدە ايماقتاعى ىقپالدى كۇشكە يە بولۋى قاجەتتىگىنە نازار اۋدارتتى.
بۇدان كەيىن بۇۇ حالىقارالىق كۇنىن اتاپ وتۋگە جينالعانداردى بۇۇ باس حاتشىسى پان گي مۋن بەينەۇندەۋ ارقىلى قۇتتىقتادى. وسى جەردە وتكەنگە ءسال شەگىنىس جاساساق, 1945 جىلدىڭ 24 قازانى – بۇۇ جارعىسى قابىلدانعان كۇن ۇيىمنىڭ حالىقارالىق كۇنى دەپ اتالىپ ءجۇر. بۇل كۇندى مەرەكەلەۋ 1948 جىلدان باستالسا, جىل سايىن وسى كۇنى ءارتۇرلى كەڭەستەر, پىكىرلەسۋلەر مەن فوتوكورمەلەر ۇيىمداستىرىلىپ, بۇۇ تابىستارى پاش ەتىلەدى.
1992 جىلى 2 ناۋرىزدا بۇۇ مۇشەسى اتانعان قازاقستان ۇيىمنىڭ بارلىق ءىس-شارالارىنا بەلسەندى قاتىستى جانە ونىڭ اياسىندا ءىرى حالىقارالىق فورۋمداردى وتكىزۋگە مۇرىندىق بولدى. قازاقستان وسى تۇرعىدان كەلگەندە ءوزىن بۇۇ-نىڭ بەلسەندى مۇشەسى ءارى ءوز ىسىنە جاۋاپتى ەل ەكەنىن دالەلدەي ءبىلدى.
ورتالىق ازيا جونىندەگى سۋبوڭىرلىك ءوفيسىنىڭ (الماتى قالاسىندا ورنالاسقان) ديرەكتورى نيكولاي بوتەۆ 2015 جىلدان كەيىنگى دامۋدىڭ اسپەكتىلەرىنە قۇرىلعان بايانداما جاسادى. ونىڭ ايتۋىنشا, بۇگىنگى ۇدەرىستەر بۇۇ جۇمىسىنا اسەر ەتپەي قويمايدى, سوندىقتان دا ۇلتتىق كونسۋلتاتسيالار ماڭىزى ارتۋدا. بۇعان دەيىن تۇراقتى دامۋعا نەگىز قالايتىن جاپپاي ورتا ءبىلىم بەرۋ, كەدەيشىلىكپەن كۇرەسۋ جانە ۆيچ-سپيد-ءتىڭ الدىن الۋ سياقتى ماسەلەلەر قامتىلىپ كەلسە, 2015 جىلدان باستاپ تالاپ تۇبەگەيلى وزگەرۋى مۇمكىن. قازىردىڭ وزىندە 60-قا تارتا اگەنتتىكتەر مەن ۇيىمدار بىرىگىپ, جۇمىس توپتارىندا ەسەپتەر دايارلاۋعا كىرىسىپ تە كەتىپتى. بۇعان ساراپشىلاردان وزگە 100-گە تارتا ەلدىڭ ۇلتتىق كونسۋلتاتسيالارى اتسالىسىپ جاتسا كەرەك.
سونداي-اق, جينالعان قاۋىم الدىندا ءسوز سويلەگەن قازاقستان پرەزيدەنتى جانىنداعى مەملەكەتتىك باسقارۋ اكادەمياسىنىڭ رەكتورى بولاتبەك ابدراسيلوۆ ورايى كەلگەندە مەملەكەت باسشىسى ن.نازارباەۆتىڭ ەلىمىزدىڭ اياعىنان نىق تۇرۋىنداعى بۇۇ ءرولىن جوعارى باعالايتىنىن جەتكىزدى. جانە دە ول ۇيىمنىڭ ەلىمىزدە نارىقتىق رەفورمالاردى جۇرگىزۋگە, مامانداردى دايارلاۋعا, ەكونوميكانىڭ ءارتۇرلى سالاسىن قايتا قۇرۋعا قوسقان ۇلەسىن دە اتاپ كەتتى.
جالپى, سەمينارعا قاتىسۋشىلار قازاقستان رەسپۋبليكاسىنىڭ بۇۇ-مەن ءوزارا قارىم-قاتىناسى ىرعاقتى تۇردە دامىپ كەلە جاتقاندىعىن اتاپ كورسەتتى. ماسەلەن, قازاقستان 2013-2015 جىلدار ارالىعىندا بۇۇ-نىڭ ادام قۇقىقتارى جونىندەگى كەڭەسىنىڭ مۇشەسى بولىپ تابىلادى.
قورىتا ايتقاندا, قازاقستان بۇۇ-نىڭ ەلىمىزدىڭ دامۋىنا قوسقان ۇلەسىن, اسىرەسە, تاۋەلسىزدىكتى جاڭادان العان جىلدارداعى قولداۋىن جوعارى باعالايدى. ەكولوگيالىق زارداپتى سانالاتىن سەمەي جانە ارال وڭىرلەرىن الەۋمەتتىك-ەكونوميكالىق وڭالتۋعا, حالىق دەنساۋلىعىنا, بالا قۇقىعىنا, گەندەرلىك تەڭدىككە بايلانىستى ماسەلەلەردى شەشۋدەگى جاردەمىنىڭ ماڭىزى زور.
اسقار تۇراپباي ۇلى,
«ەگەمەن قازاقستان».
--------------------------------
سۋرەتتى تۇسىرگەن
ەرلان وماروۆ.