بۇگىن الماتىداعى №5 قالالىق ەمحانانىڭ جالپى تاجىريبەلىك دارىگەرى لاۋرا مالدىباەۆا قالانىڭ وڭىرلىك كوممۋنيكاتسيالار قىزمەتى الاڭىندا وتكەن ونلاين-بريفينگتە كارانتين كەزىندە قالا تۇرعىندارىنىڭ مەديتسينالىق قىزمەتتەردى قالاي الاتىندىعى تۋرالى باياندادى.
قالا تۇرعىندارىنىڭ قاۋىپسىزدىگى جانە مەديتسينالىق مەكەمەلەر اۋماعىندا كوروناۆيرۋس ينفەكتسياسىنىڭ تارالۋىنىڭ الدىن الۋ ماقساتىندا, قالالىق ەمحانالاردا ونلاين-كەڭەستەر ۇيىمداستىرىلدى. كەڭەس الۋ بارىسىندا پاتسيەنتتەر ەمدەلۋگە تاعايىنداۋلار الىپ, اناليز تاپسىرۋعا جانە جوسپارلى تۇردە اۋرۋحاناعا جاتقىزۋعا جولداما الدى.
"ونلاين كەڭەس جاقسى ناتيجە بەردى. ناۋقاستاردىڭ شاعىمدارىن, جان-جاقتى بەرىلگەن مالىمەتتەرىن تىڭداۋ ارقىلى انتيبيوتيكوتەراپيا قاجەت پە, جوق پا, سونى انىقتاۋعا بولادى", - دەدى لاۋرا مالدىباەۆا.
ونلاين كەڭەس دارىگەرلەرگە ناۋقاستاردى قاداعالاۋعا, ۋاقتىلى كومەك كورسەتۋگە مۇمكىندىك بەرگەنىن اتاپ ءوتتى.
ونلاين-كەڭەستەر ماۋسىم ايىنان بەرى وتكىزىلىپ كەلەدى. №5 قالالىق ەمحانانىڭ 3 مىڭنان استام پاتسيەنتى, ولاردى قىزىقتىراتىن ماسەلەلەر بويىنشا ونلاين كەڭەس الدى.
"كۇنىنە ءبىر دارىگەر 30 ونلاين-كەڭەس بەرەدى. كەڭەستەر ءتۇرلى باعىت بويىنشا جۇرگىزىلەدى. كوبىنەسە پنەۆمونيا, ەنتىگۋ, كەۋدە ايماعىنداعى اۋىرسىنۋ, دەنە قىزۋىنىڭ جوعارىلاۋى ماسەلەلەرى بويىنشا كەڭەس بەرىلەدى. كوبىنە تەراپەۆتىك باعىت بويىنشا كەڭەستەر بەرىلەدى", - دەدى لاۋرا مالدىباەۆا.