ەلىمىزدە تامىز ايىنىڭ ءۇشىنشى جەكسەنبىسى سپورت كۇنى رەتىندە بەلگىلەنگەن. وسى مەرەكە قارساڭىندا «ازاماتتارعا ارنالعان ۇكىمەتتىڭ» فرونت-وفيستەرى ارقىلى قانشا سپورتشى اتاق پەن ساناتقا يە بولعانى ەسەپتەلىپ, بۇل تاراپتا بيىلعى جەتى اي ىشىندە 1 544 مەملەكەتتىك قىزمەت كورسەتىلگەنى انىقتالدى, - دەپ حابارلايدى Egemen.kz.
«قر ەڭبەك سىڭىرگەن جاتتىقتىرۋشىسى», «قر ەڭبەك سىڭىرگەن سپورت شەبەرى», «قر حالىقارالىق دارەجەدەگى سپورت شەبەرى», «بىلىكتىلىگى جوعارى دەڭگەيدەگى جوعارى ساناتتى جاتتىقتىرۋشى», «جوعارى ساناتتى ۇلتتىق سپورت تورەشىسى», «ۇلتتىق سپورت تورەشىسى» جانە تاعى باسقا دا بىرقاتار اتاق-ساناتتاردى بەرۋ تۋرالى مەملەكەتتىك قىزمەتتەردى الۋ ءۇشىن تاپسىرىلاتىن قۇجاتتاردىڭ ءتىزىمى اتاق-ساناتتىڭ دارەجەسىنە قاراي ءارتۇرلى. ونىڭ ۇستىنە بۇل قىزمەتتەر بىرنەشە كەزەڭنەن تۇراتىندىقتان, مەرزىمى دە 24 جۇمىس كۇنىن قۇرايدى.
سپورتتىق اتاق پەن ساناتتارعا قاتىستى قىزمەتتەر جەكە تۇلعالارعا تەگىن كورسەتىلەدى. ناتيجەسىندە قىزمەت الۋشىنىڭ قولىنا حقو-دا سپورتتىق اتاق بەرۋ تۋرالى كۋالىك نەمەسە بىلىكتىلىك ساناتىن بەرۋ تۋرالى كۋالىك, ءتيىستى ومىراۋعا تاعاتىن بەلگى نەمەسە سپورتتىق اتاقتار مەن بىلىكتىلىك ساناتتارىن بەرۋ تۋرالى بۇيرىقتىڭ كوشىرمەسى نەمەسە دالەلدى باس تارتۋ تۋرالى جاۋاپ ۇسىنىلادى.
ايتا كەتۋ كەرەك, ازاماتتار سپورتتىق اتاق پەن ساناتتاردى حالىققا قىزمەت كورسەتۋ ورتالىقتارىندا عانا ەمەس, سونداي-اق سپورت جانە دەنە شىنىقتىرۋ سالاسىنداعى وكىلەتتى ورگان مەن egov.kz ەلەكتروندىق پورتالى ارقىلى دا راسىمدەي الادى.