17 تامىزدان باستاپ كارانتين شارالارى جەڭىلدەتىلەدى. وسىعان بايلانىستى, ەلورداداعى ءىرى ساۋدا ورىندارى سانيتارلىق تالاپتاردى ساقتاۋى ءتيىس. ونى قالالىق اكىمدىك پەن سەس قىزمەتكەرلەرى تەكسەرىپ ءجۇر, - دەپ حابارلايدى Egemen.kz قازاقستان ۇلتتى ارناسىنا سىلتەمە جاساپ.
ءىرى ساۋدا ورتالىقتارى كارانتيننىڭ اياقتالۋىن اسىعا كۇتىپ ءجۇر. دايىندىقتارى دا جاقسى. كىرەبەرىسكە قىزۋ ولشەيتىن قۇرىلعىلار, عيمارات ىشىنە جاعالاي انتيسەپتيكتەر قويعان. بىراق, قالادا جۇرگىزىلگەن رەيد كەزىندە كەمشىلىكتەر دە انىقتالىپتى.
"كارانتين تالابى جەڭىلدەسە, ساۋدا ۇيلەرىندە ادامنىڭ كوبەيەتىنى ءبىرىنشى كەزەڭدە-اق كورىنگەن. سول كەزدە 1,5-2 مەترلىك قاشىقتىق ساقتالۋى قيىن بولعان. وسى ماسەلە ءالى دە كۇردەلى", - دەيدى ماماندار.
مەيرامحانالار مەن ءدامحانالار, وتەلدەر دە قوناق كۇتۋگە قامدانىپ جاتىر. ءبىرى دايارشىلارعا ارنايى ماسكا كيگىزسە, ءبىرى كليەنتتەرىنە تەگىن ماسكالار دايىنداپ قويعان.