پارلامەنت ءماجىلىسىنىڭ حالىقارالىق ىستەر, قورعانىس جانە قاۋىپسىزدىك كوميتەتىندە جۇمىس توبىنىڭ مۇشەلەرى «قازاقستان رەسپۋبليكاسى مەن قىتاي حالىق رەسپۋبليكاسى اراسىنداعى سوتتالعان ادامداردى بەرۋ تۋرالى شارتتى راتيفيكاتسيالاۋ تۋرالى» زاڭ جوباسىن قارادى. بۇل تۋرالى پارلامەنت ءماجىلىسىنىڭ ءباسپاسوز قىزمەتى حابارلادى.
وتىرىستا ءماجىلىس دەپۋتاتى, جۇمىس توبىنىڭ جەتەكشىسى قۋانىش سۇلتانوۆ 2011 جىلعى 22 اقپاندا بەيجىڭ قالاسىندا جاسالعان وسى شارتتىڭ ماڭىزىن اتاپ ءوتتى. اتالعان شارتتىڭ ىسكە اسىرىلۋى تۋرالى باس پروكۋراتۋرا حالىقارالىق ىنتىماقتاستىق دەپارتامەنتى شارتتىق-قۇقىقتىق جۇمىس باسقارماسىنىڭ باستىعى ايبەك نۇراحمەتوۆ قىسقاشا مالىمدەمە جاسادى. «بىزدە قىتاي تاراپىمەن ۇستاپ بەرۋ جانە قىلمىستىق ىستەر بويىنشا قۇقىقتىق كومەك كورسەتۋ تۋرالى حالىقارالىق شارتتار بار. بۇل شارت ەكى مەملەكەت اراسىنداعى سوتتالعان ادامداردى ولار جازالارىن ودان ءارى ءوز وتانىندا وتەۋ ءۇشىن اۋىستىرۋ مۇمكىندىگىمەن بايلانىستى ماسەلەلەردى رەتتەيدى. وسىنداي شارتتار ءازىربايجان, تۇركىمەنستان, ۋكراينا, يسپانيا جانە تۇركيا ەلدەرىمەن جاسالعان. «قازاقستان رەسپۋبليكاسىنىڭ حالىقارالىق شارتتار تۋرالى» زاڭىنىڭ 11 بابىنا سايكەس, وسى شارت راتيفيكاتسيالاۋعا جاتادى. سەبەبى, ادام جانە ازاماتتىڭ قۇقىقتارى مەن بوستاندىقتارىنا قاتىستى بولىپ وتىر»,-دەدى ءسوز ورايىندا ا. نۇراحمەتوۆ.
جيىنعا قاتىسقان دەپۋتاتتار ءۋاليحان بيشىمباەۆ, سەرىكباي نۇرعيساەۆ جانە نۇرعالي ءاشىم جوعارىدا اتالعان شارتقا قاتىستى بايانداماشىعا سۇراق قويدى. ول بويىنشا قىلمىسكەرلەردى ترانزيتتەۋ ءىسى مەن ولاردى كىمدەر الىپ جۇرەتىنى, ەكى مەملەكەتتىڭ قىلمىستىق زاڭناماسىندا بۇل توڭىرەكتەگى قولعا الىناتىن جۇمىستار رەتتەلگەن بە دەگەن ماسەلە قوزعالدى. ال حابارلاماشى بارلىق ىستەردىڭ زاڭ شەڭبەرىندە اتقارىلاتىنىن جەتكىزدى.
وتىرىستى قورىتىندىلاعان جۇمىس توبىنىڭ جەتەكشىسى ق. سۇلتانوۆ قازاقستان مەن قىتاي اراسىنداعى ىنتىماقتاستىق بايلانىستىڭ جوعارى دەڭگەيدە ەكەنىن مالىمدەپ, شارتتىڭ ماڭىزىنا تاعى ءبىر مارتە توقتالىپ ءوتتى.
اتالعان زاڭ جوباسىن الداعى ۋاقىتتا ءماجىلىستىڭ جالپى وتىرىسىندا قاراۋ ماسەلەسى قاراستىرىلۋدا.
ءامىرحان الماعانبەتوۆ.