«ەمبىمۇنايگاز» اق-نىڭ دەپارتامەنت ديرەكتورى راۋان سابىروۆ بالا كەزىنەن تاريحي جادىگەرلەرگە قىزىعۋشىلىق تانىتىپتى. ويىن بالاسى بولسا دا, عاسىرلار قويناۋىنان سىر شەرتەر قۇندى جادىگەرلەردى جيناي بەرىپتى. جاقىندا ءوز قورىندا ساقتالعان سونداي جۇزگە جۋىق جادىگەردى «حان وردالى سارايشىق» مۋزەي كەشەنىنە سىيعا تارتتى.
مۋزەي قىزمەتكەرلەرى ويىلعان تاڭبالار بەينەلەنگەن قىش ىدىس, قۇمىرا, كەزدىك, قولا جەبە سەكىلدى جادىگەرلەردى ءبىزدىڭ زامانىمىزعا دەيىنگى IV-VI عاسىرلارداعى سارماتتار داۋىرىنە جاتقىزادى.
– بالالىق شاعىم قىزىلقوعا اۋدانىندا ءوتتى. سول كەزدە بالالار قۇم اراسىنان تاۋىپ العان جەبەلەردى قولدان جاسالعان ساداققا قاداپ, ويناپ جۇرگەنىن تالاي كوردىم. تاريحي جادىگەرلەرگە قىزىعۋشىلىعىمدى قالىپتاستىرعان, سىرى كەتسە دە, سىنى كەتپەگەن مۇنداي قۇندى جادىگەرلەر اۋىلداعى ۇيىمىزدە كوپ ەدى. وسىدان بىرنەشە اي بۇرىن «حان وردالى سارايشىق» مۋزەي كەشەنىنە كەلگەنىم بار. سوندا مۇنداعى جادىگەرلەردىڭ كوپشىلىگىن ەلورداداعى مۋزەيگە الىپ كەتكەنىن ەستىدىم. سول سەبەپتەن, ۇيدەگى كوللەكتسيامدى قازاقستاندىقتار مەن ەل قوناقتارى كوپتەپ كەلەتىن وسى مۋزەي كەشەنىنە تاپسىرۋدى ۇيعاردىم, – دەيدى راۋان سابيروۆ.
«حان وردالى سارايشىق» مۋزەي كەشەنى قىزمەتكەرلەرىنىڭ ايتۋىنشا, سارمات داۋىرىندەگى جادىگەرلەر – وتە سيرەك كەزدەسەتىن قازىنا. سونداي-اق مۋزەي تۇركى تەكتەس جانە قازاقتىڭ قولدانبالى مادەنيەتىنىڭ جادىگەرلەرىمەن تولىقتى. وتاندىق مۇنايشى راۋان سابىروۆ مۋزەي كەشەنىنىڭ اۋماعىنا تىگىلگەن كيىز ءۇيدى بەزەندىرۋگە ارنالعان تۇلكى تەرىسىن دە قوسا سىيعا تارتتى. ايتپاقشى, مۇنايشى جىگىت تاريحي گەولوگيالىق كارتالاردى, مينەرالدى اسىل تاستاردى دا جيناپ ءجۇر. ونىڭ بۇل قادامى «ەمبىمۇنايگاز» اق-نىڭ باس كەڭسەسىندە كونە تاريحتان سىر شەرتەتىن گەولوگيالىق مۋزەي اشۋعا سەبەپ بولىپتى.
اتىراۋ وبلىسى