قاي كەزدە بولسىن جاستار قوعامنىڭ بەلسەندى توبى, قوزعاۋشى كۇشى سانالادى. ال قازىرگىدەي قيىن ساتتەردە جاستارىمىزدىڭ ەل ىسىنە بەل شەشە كىرىسىپ, وزدەرىنىڭ ىزگىلىكتى ءىس-قيمىلدارىمەن كورىنۋى كوڭىلگە جىلىلىق ۇيالاتپاي قويمايدى.
بۇگىن ءبىز از عانا ۋاقىت ىشىندە تەك نۇر-سۇلتان قالاسىنا عانا ەمەس, باشقۇرتستاندا دا تانىمال بولعان ەلوردالىق «اقبوزات» باشقۇرت ەتنو-مادەني ورتالىعى توراعاسىنىڭ ورىنباسارى زاكير بيكمۋحامەتوۆ تۋرالى از-كەم ءسوز قوزعاماقپىز. ەلوردالىق قازاقستان حالقى اسسامبلەياسىنا زاكيردىڭ كەلگەنىنە كوپ ۋاقىت بولعان جوق. وسى ارالىقتا ول تالاي مادەني-بۇقارالىق ءىس-شارالارعا بەلسەنە قاتىسىپ جۇرگەن جاستاردىڭ بىرىنە اينالدى.
قازىرگى تاڭدا ءبىز ءۇشىن تەك قانا دەنساۋلىعىمىز عانا ەمەس, سونىمەن قاتار رۋحىمىز سىنالىپ جاتىر. وسى ورايدا حالىق دەنساۋلىعىنا الاڭداعان جاستار دارىگەرلەرگە, ناۋقاستارعا كومەكتەسۋدى ازاماتتىق پارىزى سانادى. ناقتىلاي ايتقاندا جاستار وكىلدەرىن ناۋقاستار مەن دارىگەرلەرگە كومەكتەسۋ ءۇشىن اۋرۋحاناعا ەرىكتى سانيتار بولىپ بارۋدى ءجون دەپ تاپتى. مىنە, وسىنداي شەشىم قابىلداعان جاستاردىڭ ءبىرى – زاكير.
زاكيردىڭ اكەسى قاتتى اۋىرىپ قالدى. ول اكەسىن اۋرۋحاناعا جاتقىزعاننان كەيىن اۋىر ساتتەردە ەڭ قىمبات ادامنىڭ جانىندا بولۋ تۋرالى شەشىم قابىلدادى. سودان ول مەديتسينالىق تەكسەرۋدەن ءوتىپ, نۇر-سۇلتان قالاسىنداعى 1-ءشى قالالىق اۋرۋحانانىڭ ەرىكتى سانيتارى بولىپ جۇمىس ىستەي باستادى.
بىراق, ۇلكەن وكىنىشكە قاراي, ىندەت زاكيردىڭ اكەسىن دە اينالىپ وتپەدى...
زاكير وسىنداي ۇلكەن قايعىعا مويىماستان اۋرۋحاناداعى جۇمىسىن تاستاماي, ەرىكتى تۇردە سانيتارلىق قىزمەتىن جالعاستىرا بەردى. ول مورالدىق جاعىنان قيىن جاعدايدا جۇرسە دە ناۋقاستاردى كۇتۋ بويىنشا كۇندەلىكتى جۇمىسىنا بارلىق ۋاقىتىن ارنادى. ەگەر ءبىر ناۋقاستىڭ جاعدايى تۇزەلىپ, اۋرۋى جەڭىلدەسە, زاكير ءۇشىن ەڭبەگىنىڭ ەش بولماعانى.
وسىنداي كۇردەلى جاعدايدا ۆولونتەر بولۋ شەشىمىن ەرلىك, ىزگىلىك جانە پاراساتتىلىقتىڭ ۇلگىسى دەپ ايتۋعا بولار. ءبىزدىڭ قاراپايىم جاس زامانداسىمىز – زاكير بيكمۋحامەتوۆ اينالاسىنا وسىنداي جارقىن ۇلگى كورسەتە ءبىلدى.
ەلوردالىق قازاقستان حالقى اسسامبلەياسىنىڭ بارلىق يگى ىستەرىنىڭ بەلسەندى قاتىسۋشىسى ز. بيكمۋحامەتوۆ قازىرگىدەي قيىن كەزەڭدە ۇرەيگە بوي الدىرماي, سابىرلىلىق تانىتۋ, تارتىپكە باعىنۋ وتە ماڭىزدى دەپ ەسەپتەيدى.
– مەنىڭ زامانداستارىم وسىنداي اۋقىمداعى ۇلكەن قاۋىپكە بۇرىن-سوندى تاپ بولعان جوق. ءبىزدىڭ حالقىمىزعا بۇل سىن-قاتەردى ءتۇسىنۋ جانە قابىلداۋ ماڭىزدى. سول كەزدە ءبىز قانشاما قيىندىقتاردى باستان وتكەرىپ, ولاردى جەڭە بىلگەن اتا-بابالارىمىزدىڭ جەڭىستى دە جەمىستى جولىن ساتىمەن جالعاستىرا بىلگەن بولامىز. قيىن ۋاقىتتا تۇراقتىلىقتى ساقتاۋ كەرەك, ال تارتىپكە باعىنۋ وتە ماڭىزدى. ۇرەيگە بوي الدىرماۋ قاجەت, الايدا بوساڭسۋعا بولمايدى, – دەيدى.
زاكيردىڭ بەلسەندى ءىس-ارەكەتى جاستار ءۇشىن قاشاندا ۇلگى دەپ نىق ايتا الامىز. ونىڭ تاڭداعان جولى – ەڭبەك. ەندەشە ەرىكتىنىڭ قاراپايىم ەڭبەك جولى جاستار ءۇشىن ۇلگى-ونەگە بولۋى كەرەك.