بالىقتى اۋلاۋدىڭ دا زاڭمەن بەكىتىلگەن قاعيداسى بار. الايدا, بەكىرە تۇقىمداس باعالى بالىقتار قورىنا سۋىق قولىن سۇعاتىندار مۇنى ەلەي بەرمەيدى.
دەگەنمەن, وبلىستىق پوليتسيا دەپارتامەنتىنىڭ باستىعى قامزا ۇمبەتقاليەۆتىڭ ايتۋىنا قاراعاندا, بيىلعى التىايدا بالىق قورىن قورعاۋعا قاتىستى قۇقىقبۇزۋشىلىقتاردى تومەندەتۋدىڭ مۇمكىندىگى ارتتى. بۇعان اسىرەسە, براكونەرلىك ءۇشىن بەرىلەتىن جازانىڭ قاتاڭداتىلۋى وڭ ىقپالىن تيگىزىپ وتىر. سونداي-اق, كارانتين رەجيمىنىڭ ساقتالۋىن قامتاماسىز ەتۋ ماقساتىندا جۇرگىزىلگەن ءىس-شارالاردىڭ اسەرى ءتيىپتى.
"جىل باسىنان بەرى جۇرگىزىلگەن پروفيلاكتيكالىق ء ىس-شارالار كەزىندە تابيعات قورعاۋ زاڭدىلىعى 337 رەت بۇزىلعانى انىقتالدى. ونىڭ 305-ءى بالىق قورىنا قول سۇعۋشىلىققا قاتىستى بولدى. وسىعان بايلانىستى پوليتسيا قىزمەتكەرلەرى 57 قىلمىستىق ءىس قوزعادى. قر اكىمشىلىك قۇقىقبۇزۋشىلىق تۋرالى كودەكسىنىڭ 383-بابىمەن (بالىق اۋلاۋ جانە بالىق رەسۋرستارى مەن باسقا دا سۋ جانۋارلارىن قورعاۋ قاعيدالارىن بۇزۋ) 276 حاتتاما تولتىرىلدى" دەيدى دەپارتامەنت باستىعى قامزا ۇمبەتقاليەۆ.
پوليتسيا قىزمەتكەرلەرى التى ايدا قۇقىق بۇزۋشىلارعا 3 ملن تەڭگەدەن استام ايىپپۇل سالدى. ايىپپۇلدىڭ 1,5 ملن تەڭگەدەن استامى ءوندىرىلدى. زاڭسىز ساۋدا اينالىمىنان 9 توننادان استام بالىق تاركىلەندى. ونىڭ ىشىندە 999 كيلو بەكىرە تۇقىمداس باعالى بالىق تۇرلەرى بار. سونداي-اق, زاڭسىز بالىق اۋلاۋشىلاردان 284 اۋ مەن 2 سۋدا ءجۇزۋ قۇرالى الىندى.