تاجىكستان رەسپۋبليكاسىنىڭ ازاماتى بوبورادجاب دجاۆليەۆ تۋعان جەرىنە, وتباسىنا ورالماعانىنا جيىرما جىل بولىپتى. سوناۋ 2000 جىلى تابىس تابۋ ءۇشىن رەسەيگە بارعان ساپارىنان ءالى ورالا الماي ءجۇر. بىردە ماسەكەۋدە, ەندى بىردە تۋلادا قۇرىلىس جۇمىستارىمەن اينالىسىپتى. ال بىلتىر كوشەدە جۇرگەن وعان اتىراۋلىق لەونتي دەمياشەۆ كەزدەسىپتى. بىراق تاجىكستان ازاماتى اتىراۋعا قاشان, قالاي كەلگەنىن ەسىنە تۇسىرە المادى.
– تابىس تاۋىپ, ەلىمە ورالامىن دەپ ويلادىم. قۇجاتتارىمدى جوعالتىپ الدىم. كومەك سۇرايتىن تانىستارىم دا جوق. سوققىعا جىعىلعاننان بولۋ كەرەك, كوپ نارسەنى ۇمىتىپ قالامىن, – دەيدى تاجىكستاندىق بوبورادجاب دجاۆليەۆ.
وزگە ەلدە قۇجاتسىز, جيىرما جىل بويى وتباسىنان جىراقتا ءجۇرۋ كىمگە وڭاي دەيسىز؟ سول سەبەپتەن, لەونتي دەمياشەۆ ونى ساياجايىندا پانالاتىپ, كۇندەلىكتى ازىق-ت ۇلىكپەن قامتىدى. مەديتسينا سالاسىندا جۇمىس ىستەيتىن تۋىستارى ارقىلى ميگرانتتىڭ دەنساۋلىعىن تۇزەۋىنە, تاجىكستانداعى وتباسىن تابۋىنا كومەكتەستى. قازىر ميگرانتتىڭ اعاسى تابىلىپ, ەكەۋى ءبىر-بىرىمەن تەلەفون ارقىلى سويلەسىپتى. ال دۋشانبەدە تۇراتىن وتباسى مەن تۋىستارى ونى جيىرما جىلدان بەرى سارعايا كۇتىپ وتىر.
– مەنىڭ ماقساتىم – قۇجاتتارىن رەتتەپ, وتباسىمەن قاۋىشۋىنا كومەكتەسۋ. بىرنەشە ايدان بەرى مەن دە, وتباسىم دا وعان باۋىر باسىپ قالدىق. بىراق ونىڭ دا وتباسى, تۋىستارى بار عوي. مەن سولاردى تاۋىپ بەرۋگە اۋەدە ەتكەن ەدىم. ال ونىڭ وتباسى مەن اعايىن-تۋىسىنىڭ جىلۋىن سەزىنبەگەنىنە جيىرما جىل ءوتتى, – دەيدى لەونتي دەمياشەۆ.
بوبورادجاب دجاۆليەۆتىڭ قۇجاتتارىن رەتتەۋگە ءبىر ايداي ۋاقىت قاجەت. قازىر ول ارنايى ورتالىقتا تۇرىپ جاتىر.
اتىراۋ