تۇركىستان وبلىسىندا پوليتسەيلەر كارانتين كەزىندە تۇرعىندار مەن ءدارىحانالاردىڭ جوعارى سۇرانىسقا يە دارىلىك پرەپاراتتاردى جانە مەديتسينالىق قۇرال-جابدىقتاردى جوعارى باعامەن زاڭسىز ساتۋ جايتتارىن انىقتاۋ بويىنشا رەيدتىك جانە پروفيلاكتيكالىق ءىس-شارالاردى جالعاستىرۋدا, دەپ حابارلايدى Egemen.kz
ماسەلەن, تۇركىستان وبلىسى سوزاق اۋدانىنداعى ءدارىحانالاردىڭ بىرىندە ءدارى-دارمەكتەردى نەگىزسىز جوعارى باعامەن ساتۋ جايتى ورىن الدى. جەرگىلىكتى پوليتسياعا سوزاق اۋدانى قۇمكەنت اۋىلىنىڭ ءدارىحاناسىندا ءدارى-دارمەكتەردى جوعارى باعامەن ساتقانى تۋرالى حابارلاما كەلىپ تۇسكەن.
اتالعان جايتتى تەكسەرۋ ماقساتىندا جەرگىلىكتى جەرگە قۇرامىندا پوليتسيا قىزمەتكەرلەرى مەن باسقا دا مۇددەلى ورگانداردىڭ وكىلدەرى بار ءموبيلدى توپ شىعادى.
وسىلايشا سوزاق اۋداندىق پوليتسيا ءبولىمىنىڭ قىزمەتكەرلەرى ءدارىحانا ساتۋشىسىنىڭ تۇتىنۋشىلاردىڭ بىرىنە 10 دانا "تەرافليۋ", "تسەفوزاليننىڭ" بەس امپۋلاسى جانە 5 مەديتسينالىق ءشپريتستى 4 مىڭ تەڭگەدەن استام قارجىعا, ياعني بەلگىلەنگەن باعادان ەكى ەسە قىمبات ساتقانىن انىقتادى.
وسى جايت بويىنشا جينالعان ماتەريالدار قر دەنساۋلىق ساقتاۋ مينيسترلىگىنىڭ تۇركىستان وبلىسى بويىنشا فارماكولوگيالىق كوميتەتىنە زاڭدى شەشىم قابىلداۋ ءۇشىن جىبەرىلدى. جالپى العاندا كارانتين كەزىندە تۇركىستان وبلىسى پوليتسيا دەپارتامەنتىنىڭ پوليتسەيلەرى مەن جەرگىلىكتى پوليتسيا قىزمەتىنىڭ قىزمەتكەرلەرى ءدارى-دارمەك پەن مەديتسينالىق قۇرالداردى جوعارى باعامەن زاڭسىز ساتۋدىڭ 52 جايتىن انىقتاعان.